Read Angguruk Yali KELUARAN 8 Bible Online

KELUARAN 8 - Angguruk Yali bible

KELUARAN 8

¹NINIKNI Allahn Musa fam ele hiyag utuk lit, ”Mesir inap onowe ambeg lamihinteg hiyag itmihinon tu, ’NINIKNI Allahn te, ’Numalikisiyen An nubam sembahyang ik lalusan hiyag isamihin.

²Lalihip ulug hiyag isamihin fug halug Anden hunusimin ulug yahiye anggolo monde fuhukmu kinang aru keleg aruhu.

³Ik Nil oho yahiye eneg aruhureg ikman wilip atuk lit hat hibam o le keyet nohoruk lahen keyet kuruk lamuhup. Hat hamingmingangge men humalikisi obog toho inibam oho, suburu esetuk ambeg oho, roti wiratuk ambeg oho keleg atuk laruhu.

⁴Yahiye arimano solok toho hat men hamingmingangge humalikisi Mesir inap obog toho enebene laharuk lamuhup,’ irisi,’ uhun,” ulug Allahn Musa hiyag itfag.

⁵Nin eke Musa fam hiyag utuk lit, ”Harun fam, ’Wanggun seneg lahenon aru ik suwonet toronet sene yenggelehonet fil leg hamihinmu yahiye ikman wilip atuk lit Mesir kinang obog toho keleg aruhu,’ ulug hiyag itmihin,” ibagma

⁶Harun inowen wanggun ik obog toho fil leg hibagma yahiye anggolo ikman wilip atfareg kinang obog toho yahiye eneg atfag.

⁷Yahiye eneg atfagma hal inap o Mesir werehon arimanowen oho hal fam wal harukmu yahiye anggolo ikman wilip atuk lit kinang obog toho keleg atuk latfag.

⁸Keleg atuk latfagma ap suwon inowen Musa men Harun men wol enepfareg ele hiyag isaruk lit, ”HINIKNI Allah ubam, ’Yahiye aruma elehap tin,’ ulug sembahyang ilihipmu eleg amusama anden HINIKNI Allah fahet wam eserik lalihip ulug hunumalikisi hiyag isahuk,” ibag.

⁹Ari ibagma Musa inowen, ”An nindi nahiyeg toho hat men hamingmingangge humalikisi Mesir inap obog toho fahet sembahyang uruk laruhuk. Hup nungge sul sembahyang uhuken hiyag nitmihin! Sembahyang uhukmu yahiye aruma henebene werehon men o le ke werehon men eleg amuhupmu we ik Nil ikma eneg tot welamuhup,” ulug hiyag itfagma

¹⁰ap suwon inowen, ”Sono An fahet sembahyang uhun,” ulug hiyag itfag. Hiyag itfagma Musa inowen, ”Haren heng ehenon hikit toho sembahyang uhuk. Uhukon ari famen Allah NINIKNI hahon eke winon wereg eleg ulug holuk aruhu.

¹¹Aren yahiye hat hamingmingangge humalikisi Mesir inap obog toho enebene werehon men o le ke werehon men elehap tubusuhumu ik Nil ikma eneg tot welamuhup,” ibag.

¹²Ari ibareg Musa men Harun men ap suwon ibamen wilip atug libareg Musa inowen, ”Yahiye ap suwon ebene monde ferikinon arimano elehap tin,” ulug NINIKNI Allah fam sembahyang ibag.

¹³Musa sembahyang ibahon ino NINIKNI Allahn hol hibareg yahiye o le ke werehon men o pumbuk ke werehon men yabuk ke werehonet obog toho ware fisibag.

¹⁴Ware fisibagma Mesir inaben wareg angge arimano palu ril yat toho laharukmu Mesir kinang atogman atogma amben siyag anggolo ruruk latfag.

¹⁵Yahiye arimano war atukmu Mesir inap onowe inowen yet hibareg NINIKNI Allahn ibag ane hikit toho indi imbik wamburuk lit Musa men Harun menen hiyag utuk ane holfag fug.

¹⁶Holfag fugmu NINIKNI Allahn Musa fam hiyag utuk lit, ”Haren Harun fam, ’Wanggun fam kinang lilog teg ke ware femihinmu itano o Mesir atogman atogma kinang lilohon ul hahon werehon ino elemiyaha atmisi,’ ulug hiyag itmihin,” ibag.

¹⁷Ari ibagma Harun inowen wanggun fam kinang ware ferikim o Mesir atogman atogma kinang lilohon elemiyaha atfareg ap enebeneyet enembohom enebeneyet obog toho hililip eneptuk latfag.

¹⁸Hililip eneptuk latfagma hal inaben, ”Niren oho hal fam wal hul,” ulug turuk latfag angge famen teko libag fug. Teko libag fugmu elemiyaha arimanowen ap enebene enembohom fene hililip enesugmu

¹⁹hal inaben onowe suwon fam, ”Elemiyaha aruma Allahn monde fik waha,” ulug hiyag itfag angge famen NINIKNI Allahn ibag ane hikit toho ap suwon ino indi imbik wamburuk lit Musa men Harun menen hiyag utukon holfag fug.

²⁰Holfag fugmu NINIKNI Allahn Musa fam ele uruk lit, ”Sono hubet-habet Mesir inap onowe ino ik Nil ayegma larukmu hat at olohotma lahun. Lahunteg hiyag uruhunon te tu, ’NINIKNI Allahn te, ’Numalikisiyen An nubam sembahyang ik lalusan hiyag isamihin,’ irisi.

²¹Aren te, ’Lalihip imihin fug halug hat men hamingmingangge humalikisi Mesir inap obog toho inibam Anden hombum monde fik waruhukmu o Mesir kinang keleg teg laruhu angge famen

²²o Gosyen An numalikisi wereg ambeg hombum monde fik waruhuk fug. Kinang Gosyen fam hombum eleg laruhumu haren yet hahunteg, An nubahet Israel inap INIKNI Allahn kinang tu fam ine roho turuk lit hombum aruma monde fik waharisi ulug holuk aruhu.

²³An numalikisi Israel inap eneko embeseruk lit hat humalikisi unubam eneg alem angginon enehangge o sono tubuhuk,’ irisi,’ ulug ap suwon ino hiyag uruhun,” ibag.

²⁴Ari ibareg NINIKNI Allahn hombum anggolo monde fibagma Mesir inap onowe ibam o le ke, amingmingangge inibam o le keyet kuruk lit Mesir inap obog toho hombum arimanowen unusurukmu asengseng haruk latfag.

²⁵Hombumen asengseng ane turuken ap suwon inowen Musa men Harun men wol enepfareg, ”O Mesiren wilip am fug angge kinang aru famen Hinikni Allah fahet wam eserik lalihip,” ulug hiyag isibag.

²⁶Hiyag isibagma Musa inowen, ”O Mesir aruman Allah NINIKNI fahet wam esetukmu Mesir inaben yet nisahupteg tuk fug ane turuk ulug inindi siyag aruhumu helep fam nunusuk nowen o aruman wam esebuhuk fug angge famen

²⁷NINIKNI Allahn hiyag nisarisi ane hikit toho hup hinahanam lahukteg lekman eserik lahuk,” ibag.

²⁸Ibagma ap suwon inowen, ”Fano ehenma Allah HINIKNI fahet lekman wam eserik lalihip ulug hiyag hisaruk lahi angge famen yatma la fug angge we horogman esetuk lit An nubahet sembahyang ilihip,” ibag.

²⁹Ari ibagma Musa inowen, ”Ketiya an laminteg NINIKNI Allah fam sembahyang iminmu sono hombum hat hamingmingangge men humalikisi Mesir inap henebene werehon aruma eleg amuhup angge famen haren nit nunubam hele si ane uruk lit, ’HINIKNI Allah fahet wam eserik lalihip fug,’ ulug alele og nenebuk fug,” ibag.

³⁰Ibareg Musa ino ap suwon ibamen wilip atfareg NINIKNI Allah fam sembahyang ibagma

³¹holfareg hombum Mesir inap onowe amingmingangge men umalikisi obog toho enebene welatfahon arimano elehap tibagma eke misig oho welatfag fug angge famen

³²ap suwon inowen indi imbik wamburuk lit lalihip ulug Israel inap unubam hiyag isibag fug.