Read Angguruk Yali KELUARAN 9 Bible Online

KELUARAN 9 - Angguruk Yali bible

KELUARAN 9

¹Lalihip ulug hiyag isibag fugmu NINIKNI Allahn Musa fam hiyag utuk lit, ”Mesir inap onowe ambeg lamihinteg, ’Ibrani ninap NINIKNI Allah inowen ele irisiyon te, ’An numalikisiyen An nubahet sembahyang ik lalusan hiyag isamihin,’ imihin.

²’Lalihip ulug hiyag isamihin fug halug

³An ninggik ineyonen henembohom kuda, keledai, unta, sapi, domba, kambing arimano obog toho unubam ouk alem suwon monde fuhuk.

⁴Ouk ino Mesir inap enembohom unubam monde feruk lit Israel inap enembohom eneko umbusuhukmu iren tohon eke misig oho war amuhup fug.

⁵O sono tuhukon fahet nele aru uruk lahi,’ imihin,” ulug NINIKNI Allahn ibag.

⁶Likiyamon NINIKNI Allahn ibag ane hikit toho Mesir inap enembohom obog toho war atukmu Israel inap enembohom misig oho war atfag fug.

⁷War atfag fugmu Mesir inap onowe suwon inowen Israel inap enembohom fano wereg ano ulug yet ha lalihip ulug ap mon enepfag. Mon enepfahon arimano libareg yet hibagma Israel inap enembohom misig oho war atfag fuhon holfag angge famen ap suwon inowen indi imbik wamburuk lit, ”Israel hinap lalihip,” ulug hiyag isibag fug.

⁸Hiyag isibag fugmu NINIKNI Allahn Musa men Harun men unubam ele uruk lit, ”Indok munggaltuk ambehen ul hininggik indanggenma ololop toho walihipteg hat Musan ap suwon olohotman pohol fil hik isamihin.

⁹Hik isamihinmu ahe ino o Mesir kinang obog toho hondo atmisireg ap hiyap wam unubam wamburuk lit pot yig enepmisimu mulen wilip atuk laruhu,” ibag.

¹⁰Hiyag isibag ane hikit toho Musa men Harun menen indok munggaltuk ambehen ul wibareg Mesir inap onowe ambeg libareg Musa inowen ul ino pohol fil hik isibagma ap hiyap wam obog toho unubam pot yig enepfagma mulen wilip atuk latfag.

¹¹Mesir inap obog toho pot yig eneptuk lit hal inap unubam oho pot yig enepfagma Musa ambeg la fug teg latfag angge famen

¹²NINIKNI Allahn tam ibag ane hikit toho Mesir inap onowe indi arikap tibagma Musa men Harun men enele holuk fug anggeyen lalihip ibag fug.

¹³Lalihip ibag fugmu NINIKNI Allahn Musa fam ele uruk lit, ”Sono hubet Mesir inap onowe ambeg lahunteg hiyag uruhunon tu, ’Ibrani ninap NINIKNI Allah inowen ele uruk lit, ’Numalikisi An nubam sembahyang ik lahuben hiyag isahun,’ irisi.

¹⁴Aren te, ’An nele holuhun fug halug Anden hat men hamingmingangge men humalikisi Mesir inap obog toho hunubam alem mondabi angginon umbuhukmu kinang atogman atogma An Allah hahon eke wereg eleg ulug holuk aruhu.

¹⁵Tam An ninggik ineyonen hat humalikisi men ouk alem suwon fam hunuselema hit kinangman eleg alep angge famen

¹⁶An nine roho turuk lahiyon yet niyahupmu ap kinang atogman atogma werehon arimanowen An nunuk onoluk amuhup ulug hunumbaharikik.

¹⁷Hunumbaharikik angge famen hat hinggareg palimuwap taruk lit lalihip irikin fug.

¹⁸Lalihip irikin fugmu sono mo tiya hagma Anden osit soho anggen hahon suwon wal tiyag sambilen ketiya oho o Mesir tuman harikip fuhon pilabik waruhuk.

¹⁹Osit helep hahon ino pilabik waruhukmu ap men wam men olma la fug angge selma welamuhubon obog toho osit inowen unusuhumu war amuhup tohonen, ’Nambohom men nanggengge selma werehon men lilog teg ambeg kilap enebiyek,’ ulug hotsi hiyag isahun,” ibag.

²⁰NINIKNI Allahn ibag ane ari Mesir inap onowe otsi winonen hol hibareg enekolen enemingminganggeyet enembohomet inibam hondoko kilap enepfag.

²¹Otsi winonen Allahn ibag ane ari osokowa feseruk lit enemingminganggeyet enembohomet inibam hondoko kilap enebuk fug angge selma imbisibag.

²²Selma imbisibagma NINIKNI Allahn Musa fam hiyag utuk lit, ”Hinggik pohol fil leg hamihinmu o Mesir kinang obog toho fam osit soho anggen hahon ino wamburuk lit ap men wam men yabuk men hondo rimisi,” ulug hiyag itfagma

²³Musa inowen wanggun tomuk pohol fil leg hibagma NINIKNI Allahn ululu sipuk toho ilabut lebeg turuk lit osit helep hahon humon Mesir inap unumbasi welatfag liyen tulug alem teko libag sambil oho yet hibag fuhon pilabik watfag.

²⁵Osit inowen kinang atogman atogma abet wamet selma welatfahon arimano obog toho unusibag. Yabukmu wereg angge siyahap turuk lit e obog toho sanog toho hondo ribag.

²⁶Hondo ribag angge famen Israel inap welatfag ambeg o Gosyen kinang ino fam eneg osit helep hahon ino wambik watfag fug.

²⁷O Gosyen wambik watfag fugmu Mesir inap onowe inowen Musa men Harun men wol enepfareg hiyag isaruk lit, ”Ketiya anden siyag ane tirikik ulug fag toho uruk lahi. HINIKNI Allahn tem toho turukmu an numalikisi menen Allahn peruk ane turuk latukuk fug.

²⁸Allahn ululu sipuk toho osit aruwen nunusurukmu asengseng anggolo roho welahereg HINIKNI Allah ubam sembahyang ilihip. Sembahyang ilihip halug tuma amusun toho welamuhup fuhen o aruwen wilip amuhup ulug hiyag hisahuk,” ibag.

²⁹Ari ibagma Musa inowen, ”O aruwen wilip atminteg ariya ninggik leg haruk lit NINIKNI Allah fam sembahyang iminmu ululu men osit helep hahon men eleg atmisi halug kinang aru NINIKNI Allahn ngi rehon fahet hat holuk atmisi angge famen

³⁰har oho hotsi oho NINIKNI Allah fahet henekol toho welahep fuhon an noluk,” ibag.

³¹Hekel sum urukon owil turukmu roti jelai anggen ket wilip atuk li osit ino wamburuk lit obog toho siyahap tibag.

³²Roti gandum anggen men anggen winon uwan wilip atfag fuhon arimano eneg siyag atfag fug.

³³Enele uruk latfareg Musa ino Mesir inap onowe ino embeselug o pumbuk inowen wilip atfareg inggik leg haruk lit NINIKNI Allah fam sembahyang ibag. Sembahyang irikim itano ululu men osit men soho anggen hahon ino men eleg atfag.

³⁴Eleg atfagma Mesir inap onowe inowen yet hibag angge famen Allahn peruk ane hikit toho turuk latfag fug. Otsiyen oho inindi imbik wamburuk latfag.

³⁵NINIKNI Allahn Musa feneyen tam ibag ane hikit toho ap suwon inowen lalihip ulug Israel inap hiyag isibag fug.