Read Angguruk Yali AYUB 1 Bible Online

AYUB 1 - Angguruk Yali bible

AYUB 1

¹Ap misig unuk te Ayub o Us[1] welatfag. Indi wirik toho Allah fam wenggel haruk lit siyag ane timin fug ulug Allahn peruk ane eneg turuk latfag.

²Turuk latfareg ap umalik sabiren, hilani umalik hinahan indag enepfareg

³ambohom teng-teng angge foroho latfag. Foroho latfahon arimano wam domba teng-teng angge 7.000, wam unta 3.000, wam sapi 1.000, wam keledai 500 welatfag. Ayub amingmingangge oho teng-teng angge welatfagma yali fil inap arimano at eneg tung ahun welatfag.

⁴Welatfagma at umaliki arimano misihim-misihim it inindiyen inibam wal taneg seni esetuk latfag. Seni osoho felug nit men seni nulen watihip ulug enerekisi hinahan hondog eneptuk latfag.

⁵Seni ari roho esetuk latfagma likiyamon hubet Ayub ino in atlug numaliki inindimuwen Allah ninirim peruk lit siyag ane turusa halug Allahn elehap timisi ulug umalikisi wal taneg fahet wam waroho yaltuk latfag. Ari hag-toho likiya hupmu turuk latfag.

⁶Misihim Allah otsi poholmon NINIKNI Allah ambeg larukmu Iblis ino oho ambiyeg libag.

⁷Libagma NINIKNI Allahn Iblis ino fam, ”Keman waharuk lahen?” ulug umung hibagma, ”O pumbuk obog toho walinggoho larikikteg waharuk lahi,” ibag.

⁸Ibagma, ”Namingmingangge Ayub pen ha larikinteg wahen? O kema-kema at ino hahon ap eke wereg eleg. Indi pikit toho An nubam wenggel haruk lit siyag ane timin fug ulug Anden peruk lahi ane eneg turuk lit wereg,” ulug Iblis fam ibag.

⁹Ibagma, ”Haren anggolo og utuk lahenon ari fahet Hat hubam eneg wenggel hiyaruk.

¹⁰Haren at uhe malik men aren angge obog toho wanggi waroho fet enesug lit aren turuk latisiyon Haren let turuk latikinmu ambohom anggolowen kinang keleg uruk latisi.

¹¹Aren angge arimano obog toho siyahap tuhunmu Hat hubam lukuram siyahon sipuk toho pet habuhu,” ulug Iblis inowen Allah hiyag itfag.

¹²Hiyag itfagma, ”Yoho, aren angge obog toho hat hinggikmu embeminmu haren famen siyahap tik wambuhun. We ebe re waruhun fug,” ulug hiyag itfagma Iblis ino Allah embeselug wilip atfag.

¹³Misihim Ayub umalikisi ap anggeyet hiyap anggeyet o Ayub amloho wandabon ibam suburu men ik anggur men naruk lit welatfag.

¹⁴Welatfagma ap misig Ayub ambeg watfareg hiyag utuk lit, ”Hambohom sapi arimanowen kinang hebeltuk angge lisoho walug larukmu wam keledai heyon arimano fuma fil hoholangge naruk lit weregma

¹⁵o Syeba inap arimanowen[2] hamingmingangge nunusik wahasareg wam arimano hilalug lahasama an namu eneg wilip ahireg hiyag hirik wahi,” ulug hiyag itfag.

¹⁶Ap inowen ele hiyag itikim ap eke watfareg hiyag utuk lit, ”Indok humon poholman wambik wahareg wam dombayet foroho inap arimanowet nenggekma an namu eneg wilip ahireg hiyag hirik wahi,” ulug hiyag itfag.

¹⁷Ap inowen ele hiyag itikim ap eke watfareg hiyag utuk lit, ”O Kasdim inap[3] palu hinahan wahasareg pin kuruk lit hamingmingangge wam unta foroho inap arimano karog fam unusehesareg unta arimano helehesama an namu eneg wilip ahireg hiyag hirik wahi,” ulug hiyag itfag.

¹⁸Ap inowen ele hiyag itikim ap eke watfareg hiyag utuk lit, ”Hat humalikisi ap anggeyet hiyap anggeyet hamloho wandabon ibam suburu men ik anggur men naruk lit weregman

¹⁹lek filen siyelu humon waharuk lit o ino tukum toho humalikisi obog toho hondo enebehekma war ahasama we an eneg noluk atug wilip ahireg hiyag hirik wahi,” ibag.

²⁰Ari ibagma Ayub in atfareg indi siyahen asum wan teg latfahon tararag tibisibareg oruk paltuk latfag. Palfareg kinangma ying atlug sembahyang uruk lit,

²¹”An nebe eneg nisinga ahummuwen indag atik iyag nahun ari roho nebe eneg war aruhuk. NINIKNI Allahn og nitisiyon arimano inggarehen helehekma At unuk eneg wel turuk latmin,” ibag.

²²Ele ari roho uruk lit nungge fahet alem arimano nubam embehek ulug Allah fam indi siyag toho wenggel hibag fureg ambilik fam oho siyag ane ubam ibag fug.