Read Angguruk Yali AYUB 10 Bible Online

AYUB 10 - Angguruk Yali bible

AYUB 10

¹Ibareg Ayuben nin ele uruk lit, ”An noluk wereg ane fahet me nape naptuken nindi anggin haruk lahi ane wilibi fesemin.

²Anden Allah fam iminon tu: Haren alem nungge fahet an nubam suwahal uruk lahen? Ayuben siyag ane tu tirisi peruk lahenon hiyag nimin!

³Haren holok ane turuk lahenon fahet hahiyeg haruk lahen ano? Nungge fahet Hat hinggarehen wal tinag angge fahet hambolmayap turuk lit onolok inaben tuhuk peruk ane teko lawag ulug inineyap eneptuk lahen?

⁴Ap inilen yet haruk hag toho Haren oho hilen yet haruk lahen ano?

⁵Hat hubabut ap kinangmon amusun toho welam fug angge war atukon hag toho welahen ano?

⁶Ap misihen oho an Hat hinggikmuwen taluk nabuk fug teg ane Hat holuk. Anden siyag ane tirikik fuhon oho Hat holuk angge famen nungge fahet Ayub inowen siyag ane tirisi ano ulug yami rurukmen eneg welahen?

⁸Hat hinggiken lal naptik inag nahun ketiya hebeloho siyahap napmin peruk lahen ano?

⁹Kinang fam kubag wituk hag toho Haren an lal naptik inag ane wenggel himin. Ketiya an lilibug toho kinangap napmin peruk lahen ano?

¹⁰Ap ahaluwe famen werehap naptuk lit nisinga ahummuwen lal naptik inag.

¹¹Nuwag men numanggen men ahandip turuk lit nunu topno rebelug nahap selma hililip naptik inag.

¹²An hindi niyaruk lit nolukap naptik inareg fano oluk welamag ulug fet nasug latikin angge famen.

¹³Hat hindimuwen hirako wenggel haruk lahen ane an noluk toho welahiyon tu:

¹⁴Ayub inowen siyag ane turuk ano ulug Anden fuki roho yet haruk lit alem ubam werehon nambolmayap tuhuk fug peruk lahen.

¹⁵Alem nubam wereg halug mondabi siyag aruhuk. Alem nubam eleg halug oho nakolen kunuk toho welaruhuk. Haren an apmayap naptuk lahenma ninggali haruk lahi aneyen nundama keleg teg.

¹⁶An nakol eleg toho in atle halug olomeneyen pak watmin ulug muko laruk hag toho Haren an mug naplug waharuk lit hine roho turuk lahen ane ariyen nakolap naplen.

¹⁷Haren an nubam nin sebe roho holok ane turuk lit Ayuben siyag ane turukmu yet harukuk uruk inap eke hag eke hag wol eneptuk lahen. Ap seliyonen an wabukag ulug hundig-hundig mon enebik waharuk lahen.

¹⁸Nungge fahet Haren an nisinga ahummuwen indag naptikin? Aben an uwan yet niya fugmu nisinga ahummuwen war atle fano.

¹⁹An wareg angge indag atlema aben kinangma sal naplep halug ap onoluk werehon hag toho welale fug.

²⁰An war aruhukon horog toho welahireg we tot nahiyeg toho welaruhuken numbahin.

²¹Folo-folo nong aruhukteg o hik tegma lahuk ambehen nin suhuloho waruhuk fug.

²²O ino mondabi sungguk-sanggak tegma o sakan teg angge famen hik teg lit eneg wereg,” ibag.