Read Angguruk Yali AYUB 11 Bible Online

AYUB 11 - Angguruk Yali bible

AYUB 11

¹Ayuben ele ibagma o Naama ahun Zofar inowen hebeloho hiyag utuk lit,

²”Ap ekeyen ele hemet toho uruk halug areyen fano ehen uruk ano? Ap ekeyen ele urukmen warukmen wereg halug areyen hebeloho hiyag um fug teg ano?

³Hele sibiling-sibiling ane ehenon ari aben holeg lit welamul puk teg ano? Hele winik-wonog toho ehenon ari fahet aben pet nabusa fug peruk lahen ano?

⁴Haren te nele tem toho ihiyon fahet Allahn ubabut fano reg puhu ehen.

⁵Allah inggarehen ele uruk lit hat komo haplep fano peruk lahi.

⁶Allahn mun ane man ane alem obog toho indimu forohowon aben wenggel ha fug tehon hat fag toho hiyag hetlep halug hat hindi anggar atuk lit siyag ane anden turuk latikikon minggiroho winon Allahn ambolmayap tirisi ulug holuk atep.

⁷Alem Allahn undama forohowon haren wenggel hehen ha reg? At mondabi ineyon ubabut haren wirim ha reg lahen?

⁸At pohol emberimu laharukon olohotman haren nanggintuk lahen? Ap warehon wereg ambeg apma fil Ar oho wereg ulug haren fuki roho wenggel ha reg lahen ano?

⁹Kinang men ik saho ahik ahum men yatma wereg angge famen At apma eneg wereg.

¹⁰Aren ap eke alem ubam embemin ulug ap ino iraham lalug senetuk halug ap san ari tuk fug ulug senebuk teg?

¹¹Ap unubabut siyahon arimano Allahn isaruk. Ap onolok ane turukon arimano At olohotman hirag am fug teg.

¹²Wam eliyen ap umalik indag ta fug teg hag toho ap sohuwon eke indi anggar am fug teg.

¹³Hat hindi wirik toho At ubam wenggel haruk lit hinggik At ibil leg haruk laruhun!

¹⁴Siyag angge hat hinggik fam tag tehon puhun turuk lit hat hibam siyag angge welaruhu fuhen yet teg laruhun.

¹⁵Ari turuk laruhun halug hinggali eleg toho horohole leko hine roho unduhuk lit hakol eleg toho welaruhun.

¹⁶Hat asengseng toho welatikin ane ik wirig atuk lit longgo uruk hag toho longgo uhumu hapeleg aruhu.

¹⁷Hat fano roho welaruhun ane ino mo anum pulmu wereg hag toho welaruhumu aben seleg toho yet haruk lamuhup. O hik tegman mo lahik waharuk laruhu.

¹⁸Fano ane eneg nubam welaruhu ulug wenggel haruk lit hindi yuwag toho welaruhun. Walinggoho yet halug alem elehen hindi se roho nohoruk laruhunmu

¹⁹ap misihen oho hat elel haptuk laruhu fug. Ap anggolo hindi nisimin ulug hambeg waharuk lamuhup.

²⁰Ap unubabut onolokon arimanowen nonoluk welamul ulug hirag atuk ambeg elehen inindi nonghong uruk lit enehap ouken war ala peruk lamuhup,” hiyag itfag.