Read Angguruk Yali AYUB 12 Bible Online

AYUB 12 - Angguruk Yali bible

AYUB 12

¹Hiyag itfagma Ayuben hebeloho ele uruk lit,

²”We tem toho hit hinindi anggat teg hinap welahebon hag toho winon wereg eleg. Hit war amuhupmu ap inindi anggat toho wenggel haruk ane eleg aruhu.

³Hit hinindi anggat teg lahep hag toho an oho nindi anggat teg lahi angge re hit henepma welahi fug. Hit henele ehebon ari ap obog toho onoluk.

⁴Allahn nele hol niyamisi ulug ubam sembahyang uruk latikik nahun an noriyen inda yag naptuk. An nindi misig toho fano ane eneg tirikik angge famen aben ninggaliyap naptuk.

⁵Ap alem angginon unubam atukon arimano ap inindi yuwag toho werehonen ininggaliyap eneptuk. Unuyug salog-malog angge roho wat tarukon arimano ap unuyuhen sobir eneptuk.

⁶Onolok ane turukon arimano inindi yuwag toho inibam wereg. Allah ino niren seneg lit apmayap turuk lahe ulug ele ying turuk inap arimano ap misihen oho elel eneptuk eleg.

⁷Enele hiyag numusa ulug wam fam kapal himin! Amul nabusa ulug suwe hinog og isimin!

⁸Haren kinang fam umung hamihinmu kinangen anggul hapmisi. Ikan ik ahummu werehonen enele hiyag humusa.

⁹It obog toho onolukon tu: Mun angge man angge Allah inggik ineyonen werehap tibag.

¹⁰Lebe ruruk angge obog toho At inggik fam wereg. Ap obog toho At famen eneg onoluk wereg.

¹¹Suburu unduk fano ano ulug ambilikanggenen nek haruk hag toho ap ekeyen ele fano uruk ano ulug ap isanggowen fuki roho hol haruk.

¹²Ap sabalon hubulu wilibihon eneg inindi anggat teg lit mun ane man ane onoluk peruk lahe angge famen

¹³Allahn eneg mun ane man ane alem obog toho oluk teg lit ine wereg. At eneg indi anggat teg lit tu men ari men timin ulug fuki roho wenggel haruk.

¹⁴Aren nungge-nungge halog turuk halug ap misihen oho hebeloho wibuk fug teg. Aren ap eke sok laroho kilaptuk halug ap ekeyen sok husuk fug teg.

¹⁵Aren ik latuk halug kinang obog toho lilog atuk. Aren ik husuruk halug ik fu waharuk lit kinang obog toho hebel-pebel isaruk.

¹⁶At ine reg lit timin perukon obog toho teko laruk. Ap un ke larukonet amu ke lawag ulug hondog eneplug larukonet At inggikmu wereg.

¹⁷Ap suwon komo eneptukon arimano Aren inindi nonghonga feseruk. Alem haltuk inap arimano inindi sohuwap eneptuk.

¹⁸Ap suwonen ap ininggik hele wat eneptukon Aren lol eneptuk lit ininggareg hele waroho o winama imbisik laruk.

¹⁹At olohotma unduhuk inap imam Aren miyaloho hik isaruk lit ap suwon-suwon amusun toho welamuhuk perukon arimano apmayap eneptuk.

²⁰Ap onoriyen enele hol isarukon enembilik siyahap eneptuk lit ap sabalonen fuki roho wenggeltuk ane elehap turuk.

²¹Ap onowesi roho werehon Aren ininggaliyap eneptuk lit ap enehako roho turukon inine elehap eneptuk.

²²Alem hirako werehon Aren inamap turuk lit hik tegma werehon selehap turuk.

²³Aren ap o pumbuk wal toho werehon enebe anggolowap eneptuk. Aren o pumbuk arimano elehap eneptuk. Aren ap o pumbuk kema-kema werehon enengginang hiyale feruk. Aren ap o pumbuk arimano yanggal eneptuk.

²⁴Aren o pumbuk wal toho sen enesug inap inindi nonghonga feserukmu anggenma kebunggalem yaho eleg ke la wam turuk.

²⁵Ik olokon nalug nenek turuk inap mulilik la mulilik wam turuk hag toho o hik tegma fag-fag angge ril laruk,” ibag.