Read Angguruk Yali AYUB 13 Bible Online

AYUB 13 - Angguruk Yali bible

AYUB 13

¹Ari ibareg Ayuben nin ele uruk lit, ”Alem anden ihiyon ari obog toho an nilen yet harikikteg nisanggo fam hol harikikmu nindi anggar atisi.

²Hit hinindimuwen honoluk teg lahep hag toho an oho noluk teg lahireg hit henepma welahi fug.

³Anden Allah mondabi ine werehon fam nele imin. An nubam alem wereg eleg ulug hiyag itmin.

⁴Hit henele si ane uruk lit un ane nubam lombohap naptuk lahep. Hal ninap welahe uruk lahep angge famen an hihit nabuk fug teg lahep.

⁵Hit henele uk fug angge welalep halug aben hit fahet inindi anggat teg inap wereg peruk lalep.

⁶Anden siyag ane tirikik fug ulug Allah fam suwahal imin ane hiren fuki roho holeg latihip.

⁷Henele si ane uruk lahebon ari Allah ahiyehap tul ulug ehep ano? An nele ying naptuk lahebon fahet Allahn fano pemisi ulug uruk lahep ano?

⁸Allah ibil amul peruk lahep ano? At ubalma alem haloho umbul peruk lahep ano?

⁹Allahn hit hunubam alem werehon yami relep halug hiren hayen pelep ano? Ap unubam nenele si ane uruk lahe hag toho Allah ubam oho uk teg lahe peruk lahep ano?

¹⁰Allah ibil amulteg Ayub ubam un ane lombohap tul ulug hunundama hirako wenggel haruk lahep halug Allahn tem toho hit komo yig hisahu.

¹¹At palimuwon olohotma hit henekol toho welahep fug ano? Henekolen yuk turuk lahep fug ano?

¹²Hit henele uruk lahep ane pukolong siyahon hag toho wereg. Henele ine roho komo naptuk lahep ane ari kinang lilibug turukon hag toho wereg.

¹³Nori, an nubam henele uruk lahebon ari imbisiyek! An nele iminmu alem fanowon oho siyahon oho nubam atmisi halug fano.

¹⁴Nungge fahet noluk welaruhuk ulug sat toho timin? Fano war aruhuken nele imin.

¹⁵Allahn tem toho nuwaruhu, Aren windat nabuhu fug ulug noluk angge famen anden fano ane eneg turuk latikikon fahet fag toho hiyag itmin.

¹⁶Allah fahet nirim perukon arimano At olohotma la fug teg angge famen an At olohotma lelereg nele hiyag etlema fano atle.

¹⁷Ketiya nele seleg toho hiyag hisaminon fuki roho holeg lamek!

¹⁸An nubam alem wereg eleg ulug an noluk teg lahireg hit hunubam suwahal imin.

¹⁹Ap san an nubam suwahal imin perukon wereg ano? Wereg halug an fano war aruhuken nele uk fug angge welatmin.

²⁰Nikni Allah, an Hat fahet nakolen hirag aruhuk tohon alem piren fahet heng haptuk lahi:

²¹Hat hinggik an nubam emberuk latikinon ino imbik wamburuk lit nin hebeloho nakolap naptuk laruhun fug!

²²Hat hele imihinmu anden hebeloho hiyag hitmin. An nele iminmu Haren hebeloho an hiyag nitmihin.

²³Nombarenam anden Hat hele embeselug siyag ane turuk latikik? Haren fano peruk lahen ane sobir isalug nolok ane turuk latikikon an hiyag nimin!

²⁴Nungge fahet Haren an nubahet ap seliyon hag toho wereg peruk lit hambol yig nutug horohole saloho welahen?

²⁵An inggilangge siyelu walug larukon hag toho welahiyon nungge fahet Haren nakolap naptuk lahen? Hoholangge lilohon hag toho welahiyon nungge fahet Haren mug naplug waharuk lahen?

²⁶An nebe kabinimu siyag ane turuk latikikon hapeleg atisi fugmu Ayub sat harukmen eneg welaruhu ulug alem angginon nubam emberuk lahen.

²⁷An o kema-kema lahu rohon ulug nuyug e fo rehon fam kilap naptikinteg yet nasug lahen.

²⁸An sum mamaken il kong turukon hag toho welahi. E fubut turuk lit tamuloho wamburukon hag toho siyag aruhuk,” ibag.