Read Angguruk Yali AYUB 14 Bible Online

AYUB 14 - Angguruk Yali bible

AYUB 14

¹Ayub inowen ele uruk lit, ”Ap hiyaben indag eneptukmu amusun toho welam fugmen alem eke hag eke hag unubam atuk.

²E owil fano yihik feruk angge famen we tot welatug loloho wamburuk hag toho ap oho ari hag toho turuk. Enehime pingga rurukon folo-folo teng uruk hag toho longgo uruk.

³Allah Nikni, An oho war aruhuk nahun welahi angge famen nungge fahet an Hat halukema numbaharuk lit unggum angginon nubam emberuk lahen?

⁴Ap obog toho unubabut siyag toho eneg wereg lit alem fanowon misig oho tuk fug teg.

⁵Ap indag eneptukon sali Haren winag haruk lit onoluk welamuhubon hili kong toho emberuk lahenma aben pisan tuk fug teg.

⁶Enemu inindi yuwag toho welamag ulug enele ying eneptuk ane umbusuhun. Aben yabuk sat toho witlug hupmu kel taruk hag toho kel taruk lamuhup.

⁷E aben mutuk angge famen fobik irat famen asimit wilip atuk.

⁸Umanggen kinangma fubur atukmu irat mutuk ambeg ino oho filik atuk angge famen

⁹ik we tor angge ubam kuruk halug oluk atuk. E suk ket laharukon hag toho asimit lahaptuk.

¹⁰We ap war atukon mondabi eleg atuk. War atug laruk ambeg kema laruk ulug nit nenepeleg.

¹¹Ik yenggelehon mowen yet harukmu eleg atuk. Laruk ahik oho o hibi humon laharukmu mondabi firig atuk.

¹²Ari hag toho ap oho war atug nin onoluk atuk eleg. Pohol eleg am fugmu war atug nohoruk ambehen in amuhup fug.

¹³Ap warehon wereg ambeg hiraho nubahakun! An hiraho lit weregman eneg Haren an nubam holok peruk ane eleg aruhu. Nin mangno roho welamuhuken wenggel hiyahuk sambil tu ulug kong toho umbuhun.

¹⁴Ap war atukon nin hebeloho onoluk am teg? An asengseng toho welahi ane eleg alep ulug likiya hupmu nangno ruruk lahi.

¹⁵Haren an wol naplen halug anden, ’Nikni welahi,’ elema Haren ninggiken wal tiyag ulug hindi neyelen.

¹⁶An o kema-kema larukmu yet neyelenteg Haren let naptuk lalen. Anden siyag ane turuk laheyon fahet wenggel haruk lalen fug.

¹⁷Siyag ane nubam werehon Haren elehap telen. Tam hare ane turuk latikikon oho puhunap naplen.

¹⁸Tom yaron halog toho wambuhup. Helep humon imbil-imbil enemumu lahup.

¹⁹Helep ik ine roho laruk lit serep turukmu tor atuk. Osit hum toho narukmu masahen kinang obog toho walug laruk. Ari hag toho Haren ap enele ying eneptukmen eneg iren fano welamuhuk peruk ane eleg atuk.

²⁰Haren waroho apmayap eneptukmu inindi siyahen onorohole hilik toho weregma mondabi lalihip ulug yanggal eneptuk lahen.

²¹Unumalikisi palimu amuhup ane iniknisi enepeleg toho welamuhup. Unumalikisi apmayap eneptukmu oho wenggel isaruk lamuhup fug.

²²We ininggareg unubam ouk eneptukon men inindi anggin toho wenggel haruk ane men eneg onoluk toho welamuhup,” ibag.