Read Angguruk Yali AYUB 15 Bible Online

AYUB 15 - Angguruk Yali bible

AYUB 15

¹Ayuben ele ibagma o Teman ahun Elifas inowen ele uruk lit,

²”Ayub nare, homhomo fu ruruk hag toho haren alem elehon eneg ehen. Ap eke indi anggat teg lit hahen haren saplangge ehen ane hikit toho elep fug.

⁴Ap Allah fahet enekol haruk ane men At ubam inindi wirik toho wenggel haruk ane men haren siyahap turuk lahen.

⁵Hinggarehen siyag ane milal taruk lahenon ariyen ap enele ying eneptuk inaben uruk hag toho uruk lahen.

⁶Anden alem hubam emberuk lahi fug angge famen hat hambiliken ehen ane ariyen alem hinggarehen hubamap tehen.

⁷Hat ap tamon indag atik inag ano? Allahn tom uwan wal tuk fugmu hat tam wereg atik inag?

⁸Allah otsi poholmon arimano men enele sahaltuk lit palu roho weregma har oho wereg lit iren urukon hol harikinmu hat hindi eneg anggar atisi ano?

⁹Alem nit nenepelehon hat eneg holukon ke? Niren wenggeltuk lahe fuhon haren nunggeyon wenggel haruk lahen?

¹⁰Hat hikni ahap oluk tegma nit niniknisi hubulu wilibig lit inindi anggat toho wenggel haruk ane nit milal neneptuk latusa.

¹¹Allahn hat onggon haptuk ane fahet nirim peruk lahen ano? Niren nenele fano roho hindi seyap haptuk laheyon fahet siyag peruk lahen ano?

¹²Nungge fahet hat hindi inahan turukmu hil holok toho yet nisaruk lahen?

¹³Nungge fahet hundama ahe laharukmu Allah fam seliyap turuk lit hele siyag toho uruk lahen?

¹⁴Ap kinangmon siyag ane turuk elehon eke wereg peruk lahen ano? Hiyaben indag eneptukon siyag angge unubam tag teg elehon misig oho wereg eleg.

¹⁵Allahn notsi malaikat unubabut fano wereg peruk eleg. At olohotma pohol oho fano reg eleg.

¹⁶Ap kinangmon arimanowen amben mondabi siyahon eneg turuk. Iren onolok ane eneg turukon ari ik nil-wil norukon hag toho wereg.

¹⁷Hat hindi anggar amag ulug anden yet harikik ane hiyag hitminon holeg lamin.

¹⁸Ap inindi anggat tehonen milal naptusa ane anden hiyag hitmin. Milal naptusa ane ari obog toho atam it iniknisiyen amul enepfag.

¹⁹It iniknisi enemu kinang Allahn og isibahon fam weregma ap pohon inindi kahal eneptukon it men wereg latfag fug.

²⁰Olok ane turuk ahun war atuk ane fahet akolen inel-hanel urukmen eneg wereg.

²¹Aren hol harukmen aplohok hum toho turukmu akolen yuk lagmag uruk. Indi yuwag toho weregman yoholiyangge hilaruk inap ambeg waharuk.

²²An o hik tegman wilip aruhuk ulug wenggel haruk ane eleg atuk. Misihim aben pinggi ware fusuhup.

²³Suwe hamaleyen ap olok ane turuk ahun ino war aruhumu nit nahuk ulug nangno ruruk. Nangno rurukmu aren yet isalug o hik atuk sambil horog teg ulug oluk.

²⁴Ap suwon eke tog elma laruk hag toho alem ekeyon-ekeyon hulu-hala roho ubam waharuk.

²⁵An nahako nahunen Allah fahet nirim ulug inggik leho lit At mondabi ineyon ino men seliyap turuk.

²⁶Sing wan teg lit Allah apmayap timin ulug ahako roho tog abik laruk.

²⁷Nahum hum amag ulug ebe fit tarukmu ebe ine roho wereg lit indi winik-wonog uruk.

²⁸Winik-wonog uruk lit o pumbuk ap seliyonen olunap tibisibag ambeg o wit taruk. O halog toho lin isaruk lit siye ribag ambeg arimano at ngi atuk angge famen

²⁹ngi aruhu angge arimano mondabi seneg laruhu fug, at tung toho wereg ane eleg aruhu.

³⁰Eleg aruhumu hun ino o hik tegma welaruhu ambehen nin wilip aruhu fug. At ino e hag toho weregma indoken inggik nahumu ebe Allah ambilik ahe fu isarikim mondabi longgo uhu.

³¹At ino nungge-nungge alem elehon fam himbit toho welaruhu fug. Himbit alep halug onggo nungge-nungge helelep fug.

³²At sabal am fugmen war aruhu. E ino famen nin hebeloho inggik wilip aruhu fug.

³³Hun ino hele anggur hag toho weregma anggen ket ilanggen turukmu tahanoho wamburuk. At ino e hag toho weregma anggen uwan uk fugmu owil loloho wamburuk.

³⁴Ari hag toho Allah fahet ninirim peruk inap arimano unumalikisi ondoko laruk lamuhup fug. Inil hubun amag ulug uang aben og isarukon fam inibam wit taruk angge famen o arimano indoken han nahu.

³⁵It enehummu alem siyahon eke hag eke hag foroho lit onolok ane eneg indag taruk. It unundaman ap enele ying eneptuk ane eneg wilip atuk,” ibag.