Read Angguruk Yali AYUB 16 Bible Online

AYUB 16 - Angguruk Yali bible

AYUB 16

¹Elifas inowen ele ibagma Ayuben hebeloho hiyag utuk lit,

²”Haren ehenon hikit toho anden anggoloenam hol haruk latikik. Hit obog tohowen Ayub indi seyap tul peruk lit henele ehep angge famen an nindi angginap nabehep.

³Noenam welamuhukmu hiren homhomo fu ruruk hag toho alem elehon uruk lahebon ari umbusuhup? Nungge fahet haren hele anggoloenam hiyag nutuk lahen?

⁴Hit an nubalma welalep halug hiren henele ehep hag toho anden oho ele. An nunggul kani haruk lit nele fano roho hiyag hesele.

⁵Anden hit onggon heneplema hit hinindi se alep.

⁶Nele imin halug ouk nubam werehon eleg atmisi fug. Nele uk fug angge welatmin halug oho ouk ino nubam welatmisi.

⁷Allahn alem angginon eke hag eke hag an nubam monde fik waharukmen eneg an nine mondabi eleg atisi. Aren siyahap naptisimu Allahn nirim peruk ahun ari men mangno roho welamul fug ulug notsi nowesi an numbahalug larusa.

⁸Aren sen naptisimu an nebe nuwag eneg atikik. Ari atikikmu aben an yet niyaruk lit hun ariyen siyag ane tirisiyon fahet alem ari ubam atisi peruk.

⁹Allah an men seli roho wereg lit il olok toho yet niyaruk. Undama ahe laharukmu ayeg kilit matuk lit an al senggeloho nuwatuk.

¹⁰Ap luhaloho waling nasug lit nuwabul ulug enembilik iya ruruk. Noroholeanggen tag toho nuwatuk lit inda yako ninggaliyap naptuk.

¹¹Allahn ap onolokon ininggikmu numbaharisi. Allah enepeleg inap ininggikmu hik niyarisi.

¹²An nindi yuwag toho weregman Allahn an elel naplug nanduhunmu sen nasug lit al sahaloho nuwatisi. Tog fam nuwatmin ulug an il misig yatma unduhuk nubaharisireg

¹³an tog tahan nabil laruk lit indi niya fug angge nanggirang ahako folok toho nuwatisimu namiye sihon kinangma wambirisi.

¹⁴Ap ekeyen ap seliyon inibam elehet huk toho ohowon halog toho ilkal isaruk hag toho Allahn ouk alem eke hag eke hag monde fik waharuk lit an siyahap naptuk.

¹⁵An nindi siyahen fesi lahaboho wereg lit nine elehen kinangma yinggig lahi.

¹⁶An uba longgon kali-kale urukmen eneg nil hik-hak uruk.

¹⁷Anden we tem toho siyag ane nindimu werehon hirahuk fug angge Allah fam sembahyang uruk lit ninggiken oho nolok ane tirikik fug.

¹⁸An nuwatukmu namep kinangma wambirisiyon kinangen saluk fug! An nuwatusa ane fahet ayeg wabuhup ulug nele hi roho uruk lahiyon hirahuk fug!

¹⁹Ketiya noluk welahi li oho ap an yet niyarukon eke poholma wereg. An ili og naptuk ahun ino lehoma wereg.

²⁰An noriyen inda yag naptuken an uba nim-nim Allah weregma lahap haruk lahi.

²¹An ili og naptukon inowen Allah men suwahal uruk lit alem an nubam werehon haloho umbuhu.

²²Mo-mo angge ilig am wirig am tuk fugmu an lahuk ambehen nin suhuloho waruhuk fuhen alem nubam werehon ari folo-folo kong tukag.