Read Angguruk Yali AYUB 17 Bible Online

AYUB 17 - Angguruk Yali bible

AYUB 17

¹An nine mondabi eleg atisimu amusun toho welam fug angge war aruhuk. War aruhukmu kinangma sal nabuhubon horog teg.

²An inda yag naptuk inaben waling nasug. Iren an nubam suwahal urukon fahet wenggel harukmen eneg welahi.

³Nori sehelimuwon ekeyen an nibil atuk elehen Haren eneg an ili og nabin!

⁴An nori inindi anggar aruhu rohon ulug Haren inindi sohuwap eneptikin. Iren an apmayap nabuhup tohon ulug Haren yet enesug lahen.

⁵Aben enele uruk lit, ’Ap ekeyen huhulangge hilihiyon fibir amul ulug ori wol eneptuk angge famen inggareg umalikisi wol eneptuk elehen suburu obok haruk,’ uruk ane ari an nubam hikir aruhu rohon!

⁶Ap o pumbuk kema-kema werehonen an nolohotma wasubag sup tebeseruk lit inda yako ninggaliyap naptuk.

⁷Nindi siyahap naptuk ane ariyen an nil hubun atisimu nebe obog toho ap ahuhe hag atikik.

⁸Ari roho nubam teko larisi ane fahet ap fano welahe peruk inap enekolen yuk lagmag uruk. It siyag ane nunubam wereg eleg perukon arimanowen an fahet Allah nirim peruk ahun wereg ulug enelmahip toho yet niyaruk angge famen

⁹ap Allah fam indi wirik toho wenggel harukon inowen kalem pikiron laruk ane umbusuhu fug. At siyag ane turuk elehon ino sebe roho ine aruhu.

¹⁰Hit obog toho an niraham watlihipmu anden kim hisarukmen hit sehelimuwon misig oho indi anggat tehon welatmisi fug.

¹¹An noluk welahiyon obog aruhu sambil horog tehen an nindimuwen tu men ari men tuhuk ulug wenggel haruk lahiyon hikir aruhu fug.

¹²An noriyen hup fahet o sakan teg uruk lit o hik tegman o seleg arik oho reg ulug hiyag nutuk.

¹³Ap warehon wereg ambeg an nibam aruhumu o hik tegma nohoruk laruhuk ulug nindimu sehet toho wenggel haruk lahi.

¹⁴An wareg angge sal nabuhup ambeg fam anden nikni uruk lit imbalo fam nisinga, nehe uruk lahi.

¹⁵Nangginoho an fano aruhuk ulug wenggel haruk laruhuk? An fano aruhuk ane ap sa oluk teg?

¹⁶An ap warehon wereg ambeg wambuhuk sambil an nin hebeloho fano aruhuk peruk lahi ane ari an men ambiyeg wambuhuk. Ap warehon wereg ambeg an fano aruhuk ulug wenggel haruk ane ino men an men ambiyeg wareg lit yinggig lamuhuk,” ibag.