Read Angguruk Yali AYUB 18 Bible Online

AYUB 18 - Angguruk Yali bible

AYUB 18

¹O Suah ahun Bildad inowen ele uruk lit,

²”Nori, noenam welamulteg hit henele sibiling-sibiling ane uruk lahebon embeselihip? Hit hinindimu fano wenggel halihipteg nenele fag toho hiyag umul.

³Ayub, nare, nit ninindi sohu roho wereg ulug wenggel haruk lahen ano? Nungge fahet haren nit fahet wam inindi anggat teg elehon hag toho wereg peruk lahen?

⁴Hat hindi holok haruk lit hinggareg wisal taruk lahen. An fano welaruhuken kinang atogman atogma ap enele teng ukag peruk lahen? An fahet helep humon imbil-imbil enemumu lawag peruk lahen ano?

⁵We tem toho ap Allahn peruk ane windal isarukon arimano iral war atuk hag toho siyag amuhupmu indok inibam werehon oho war aruhu.

⁶Hindali ahaluwe inibam hundutukon war aruhumu mondabi hik aruhu.

⁷Uyug ine roho laruk ane eleg aruhumu orog-orog laruk laruhu. Tu men ari men tuhuk ulug wenggel haruk ane ariyen uyug salog-malog angge roho wat tahu.

⁸Kalemma larukmen kiling elma mako wamburuk lit yebangge elma luhur aruhu.

⁹Sapna kahalegma ampunpun angge teberukon ino fam uyuhen soptukmen e ungguleho ino wamburuk lit at hondo ruhu.

¹⁰At waruhu ke hele watuk ahele kinangma salegma at larukmen luhur aruhureg ilil aruhu.

¹¹Alem siyahon eke hag eke hag umu filen ahamu filen waharuk lit at muko larukmu noluk welatminen kema lamin ulug sat toho la wam turuk.

¹²Ap suburu obok harukonen mag-mag naruk hag toho ap siyahap eneptuk angge ariyen hun ari namin ulug nangno reg lit wereg. At mako wambukag ulug ap unusuruk angge inowen kahaleg lit wereg.

¹³Salukangge ubam atuk lit ahap sali-sali narukmen eneg wereg. Ouk ap unusurukon inowen inggik ke uyug ke saluk turuk.

¹⁴Indi yuwag toho weregman ibamen inggik lisoho walug ap enekolap eneptuk ahun suwon olohotma laruk.

¹⁵Mun angge man angge aren tohon ibamen wilibi feseruk lit fobik oho ap welamuhup fug ulug saho foloho siye ruruk.

¹⁶At ino e hag toho weregma apma fil umanggen lilog atuk lit palimu inggik ilim atuk.

¹⁷At ino mondabi eleg aruhumu fobik kinang atogman atogma ap misihen oho at fahet wenggel ha fug angge unuk oho uruk laruhu fug.

¹⁸Aben o seleg teg ambehen o hik tegma hik isaruk lit kinangman yanggaluhup.

¹⁹At ori sehelimu umalikisi umbusagsi welamuhup fug, at ibam oho aren ondohowonen endebuhubon misig oho oluk welaruhu fug.

²⁰Alem angginon ari ubam atukon fahet ap hubula fil yali fil werehonen hol haruk lit enekolen unuwag elek-elek angge ruruk lamuhup.

²¹Ari hag toho ap Allah fahet apeleg toho wereg lit olok ane turukon fam teko larukmu ebeyet ibamet mondabi siyag aruhu,” ibag.