Read Angguruk Yali AYUB 19 Bible Online

AYUB 19 - Angguruk Yali bible

AYUB 19

¹Ayub inowen ori fam ele uruk lit,

²”Nungge fahet hiren henele urukmen warukmen nuwatuk hag toho nindi siyahap naptuk lahep?

³Nininggali puk fug angge hininggik numenam apmayap naptuk lit nele yong naptuk lahep.

⁴Anden siyag ane teleyonen hit hunubam alep fug.

⁵Hit hininggareg fahet fano peruk lit an apmayap naptuk lahep. Asengseng toho welahiyon fahet tam siyag ane tirisiyon ino ketiya inam atuk peruk lahep.

⁶Allahn siyahap tirisi ulug honoluk toho welamek! Aren yebangge yep tirisireg sen naptisi.

⁷Alem elegman nuwatuk ulug nele hum toho urukmu ap misihen oho holtusa fug. Let nabik maniyek uruk latikikmu nibil atusa fug.

⁸An lahuk perikik ke Allahn siye emberuk lit hika feserisimu fag-fag angge turuk lahi.

⁹Aren an nanggengge obog toho hilaruk lit nunuk palimu werehon siyahap tirisi.

¹⁰Allahn nuwatmin ulug walinggoho kilap nasug. E heneko hik isaruk hag toho anden fano welaruhuk perikik ane Allahn elehap turukmu war atukon horog toho laruk lahi.

¹¹An nubahet seliyon peruk lit olok haruk ane indok ambulpul hag toho turuk.

¹²At otsiyen an nuwabul ulug luhaloho watlug elehet mapmu wereg lit an nibam walinggoho kilap nasug.

¹³Allahn siyahap tirisi ahun men mangno roho welamul fug ulug notsi nowesi an numbahalug larusa. An noriyen an fahet pog ahun peruk.

¹⁴Nit nununggul unuk misihon oho an nambeg waharuk eleg. Nindi enesug lahiyonen an numbaharuk.

¹⁵Ap pohon an nibam welatuson arimanowen an fahet wenggel haruk eleg. Namingmingangge hiyap angge arimanowen an fahet o winama ahun peruk.

¹⁶An namingmingangge wol turuk lahimu pok atuk. Nele anggoloenam hiyag utukmu eneg holtuk.

¹⁷Nuheyen nele amben fahet me ape ruruk. Nori yuhonen oho me enepeyen an niraham waharuk eleg.

¹⁸Malik toronen apmayap naptuk. In atuk lahimu inda yag naptuk.

¹⁹An men suburu kuroho naruk latukukonen oho enelmahiben an nolohotma wasubag sup isaruk. Anden nindi enesug latikikonen hebeloho an fahet inirim nasug.

²⁰An nuwag eleg atisimu nunu eneg wereg lit war am hag teg lahi.

²¹Nori, Allah inggiken nuwatisimu hiren an hinindi neyemek!

²²Nungge fahet Allahn nuwatil laruk hag toho hiren oho nuwatil laruk lahep?

²³Anden uruk lahi ane aru fobik oho wenggel haruk lamuhuben hahareg lalep peruk lahi.

²⁴Longgo uhu ulug yaha fam helep sali roho hahare fuhup.

²⁵An ili og naptukon poholma wereg ulug noluk toho welahi. Obog-obogma At ino an nibil arik waruhu.

²⁶Nahap filik atisimu nuwag oho eleg atisimu nunu eneg wereg lit[5] Allah yet hahuk.

²⁷An nilanggenen At ebe yet hahuk. At ino an men mangno roho welamuhuk ulug nindi ouk toho wenggel haruk lahi.[6]

²⁸Hit hinindimuwen wenggel haruk lit, ’Alem at ubam werehon fag tukag ulug indimu habultuk lamul,’ peruk lahep.

²⁹Ari peruk lahep angge famen Allahn karog fam hunusik oho turuken henekol toho welamek! Allah indimu olok haruk lit ap siyag ane turukon unusuhuk peruk lit wereg. Alem ap obog toho unubam werehon Allahn kong tuhu ulug honoluk toho welamek!” ulug hiyag isibag.