Read Angguruk Yali AYUB 2 Bible Online

AYUB 2 - Angguruk Yali bible

AYUB 2

¹Misihim Allah otsi poholmon NINIKNI Allah ambeg larukmu Iblis eke ambiyeg libag.

²Libagma Allahn Iblis ino fam, ”Hat keman waharuk lahen?” ulug umung hibagma, ”Ap wereg ambeg obog toho o pumbuk walinggoho larikikteg waharuk lahi,” ibag.

³Ibagma, ”An namingmingangge Ayub pen ha larikinteg wahen? O kema-kema ap at ino hahon te wereg eleg. Indi pikit toho An nubam wenggel haruk lit siyag ane timin fug ulug Anden peruk lahi ane eneg turuk lit wereg,” ibareg, ”Alem elegman aren angge siyahap tuhun ulug An nindi kahal naptikinmu siyahap tirikik angge famen ambol yig num fug angge nubam eneg wenggel haruk,” ulug Allahn Iblis fam ibag.

⁴Ibagma Iblis inowen, ”Saplangge nubam wenggel haruk peruk lahen? Ninggareg nahap siye napmisi ulug aren angge obog toho embeserisi.

⁵At inggareg ebe waruhunmu eneg Hat hubam lukuram siyahon sipuk toho pet habuhu,” ulug hiyag itfag.

⁶Hiyag itfagma NINIKNI Allahn te, ”Yoho, ari ehenma at ebe hat hinggikmu embeminmu ebe pinggi wabuk fug angge ahap eneg warik wambuhun,” ulug Iblis fam hiyag itfag.

⁷Hiyag itfagma wambibareg Ayub fam saluk tibagma unggulmuwen uyugmu obog toho yowilangge eneg welatfag.

⁸Welatfagma ulmu hur atfareg helep ele ohowon wibareg ahap seng turuk latfag.

⁹Seng turuk latfagma uhe inowen, ”Nungge fahet we Allah ubam eneg wenggel haruk lahen? Allah fam lukuram sipuk toho pet timihinteg war atmihin,” ibag.

¹⁰Ibagma Ayuben te, ”Haren uruk lahenon enepeleg hiyaben uruk hag toho uruk lahen. Allahn fanowon og nisaruk latisimu hilaruk latukuk angge famen siyahon tu og nisarukmu nungge fahet umbusul?” ulug uhe fam hiyag itfag. Ari roho uruk lit nungge fahet alem siyahon tu nubam embehek ulug indi siyag toho wenggel hibag fureg ambilik fam oho Allah ubam siyag ane ibag fug.

¹¹Ayub ino ori hinahanen Ayub alem angginon ubam atisi urukmu hol hibareg Ayub ambeg watfag. Ap eke o Teman ahun unuk Elifas, eke o Suah ahun Bildad, eke o Naamah ahun unuk Zofar it arimanowen pen ha lulteg indi seyap tul ulug watfag.

¹²Waharuk lit yatman yet harukmen ap amuwon orohole hag latfagma uba humon yatuk latfag. Uba yatuk lit enesum tararag tibareg kinang alinlan pohol fil hik isaruk lit fesi enebene lahapfareg

¹³at iraham kinangma hur atfag. At indi anggin anggolo ulug enele eleg angge weregman eneg hup hunduhuk ilingge hunduhuk sabiren atfag.