Read Angguruk Yali AYUB 20 Bible Online

AYUB 20 - Angguruk Yali bible

AYUB 20

¹O Naama ahun Zofar inowen ele uruk lit,

²”An nindi inahan anggolo naptuken nindi imbik wambuk fug teg lahireg nele imin.

³Haren nit komo yig nesehenon fahet ninggali hihi angge famen anden fano wenggel hihireg hebeloho hiyag hitmin:

⁴Amukasi Allahn ap wal turuk lit kinangma imbibag liyen tulug Allahn peruk ane windal isarukon arimano we il misihim enehiyeg toho wereg lit enehiyehen sini yunggultuk ane folo-folo eleg atuk ulug hat holuk.

⁶Ap ari hahon uwag yat teg lit poholma laharukmu unggul hina men hunduhuk lalep halug oho

⁷yog aren witukon hag toho mondabi eleg alep. Eleg alepma ap at yet haruk latuson arimanowen, ’Hun ino kema wereg?’ ulug kapal helep.

⁸Hubanggo nei walug in atug wenggel harukmu eleg atuk hag toho ar oho mondabi longgo uhu.

⁹Ibam nin suhuloho waruhu fugmu at inilen yet haruk latusonen nin yet hahup fug.

¹⁰Ele si ane uruk lit mun angge man angge aben tohon hilaruk angge arimano ininggareg ngi inap hebeloho og isahu. At umalikisi ininggikmu eleg angge wereg lit ap winon unubam heng enebil laruk lamuhup.

¹¹At kabini reg lit inggik ine roho turuk angge famen ine roho turuk ane ari at men ambiyeg war aruhu.

¹²Hun ariyen siyag angge nek harukmen unduk fano turuken amusun toho ambilikmu munggig latug

¹⁴pil harukmen ahummuwen nin atuk lit pisanggo olokonen ap fato eneptuk hag toho ahummu fato ruruk.

¹⁵Ap enenggengge yoholiyangge hilalug pil isaruk angge famen me wiruhumu nin hebeloho wilip aruhu. Tor angge werehon Allah inggarehen ahummuwen wilibi fesehu.

¹⁶Mun angge man angge pil isaruk angge arimano sig anggolo reg lit pisanggo olokonen ap unusuruk hag toho ar oho ware fesehup.

¹⁷War aruhureg ag owe men kin hahaluwe men ik laruk hag toho eleg am fug angge mondabi anggolo werehon aren nin yet hahu fug.

¹⁸Ayeg waroho hilaruk angge arimanowen ahiyehap tuk teg angge famen inggareg na fug angge hebeloho ap og isaruk laruhu.

¹⁹Ap inilaheg toho werehon indi isa fug angge uyuhen sobir isaruk. O inggarehen wit ta fug angge aben wit taluhon hilaruk.

²⁰Mun angge man angge mag-mag naruk angge famen ubam atuk eleg. Anggengge anggolo seneg angge famen inggarehen windat ta fug teg.

²¹Nahum ouk toho namin ulug mun angge man angge obog toho pil isarukmu we tor angge aren umbusuhuwon welaruhu fug angge famen at fano roho wereg ane folo-folo eleg aruhu.

²²Yi angge ti angge inggikmu seneg lit indi se roho weregman keman wahileg keman wahileg alem angginon eke hag eke hag ubam waharuk laruhu.

²³At ahum ouk amag ulug Allahn indimu indok ambulpul hag toho ulog turukon osit soho anggen hahon ubam pilabik waruhu.

²⁴Ap seliyon ekeyen karog besi ineyon fam watmin ulug turukmu at seleg wilip aruhu angge famen ap ekeyen sehen suhunim fam ware fesehu.

²⁵Ware fesemin ulug tog ine roho pising turukmu hun ino arik keyen ahako folok toho tog ambiyang lebeglu lebeg turuk hag toho ambolma wilip aruhu. Wilip atukmu harukmen hun ino akolen yuk lagmag uhu.

²⁶At ubam mondabi hik aruhumu indok aben munggaltuk elehonen aret ibam we tor angge werehonet han nahu.

²⁷Poholen siyag ane aren turukon inamap turukmu kinangen alem ubam werehon fag tuhu.

²⁸Allahn olok toho tuhu sambil ino fano-fano angge ibam forohowon obog toho eleg aruhu.

²⁹Ari hag toho Anden peruk lahi ane windal isarukon unubam tuhuk ulug Allahn sali emberukon hikit toho teko lahu,” ibag.