Read Angguruk Yali AYUB 22 Bible Online

AYUB 22 - Angguruk Yali bible

AYUB 22

¹O Teman ahun Elifas inowen ele uruk lit,

²”Ap kinangmonen Allah aseher angge og um teg ano? Eleg-o, ap inindi anggat teg inaben turuk ane we ininggareg enesehet fahet eneg turuk.

³Haren fano ane turuk lahenon ariyen At mondabi ineyon fano welaruhu ano? Hat Allahn peruk ane hikit toho laruk lahenon ari feneyen nungge-nungge Allah inggikmu aruhu fug.

⁴Allahn hat komo yig hutuk lit, ’An nubahet hakol toho welahenon An nirim,’ ulug alem angginon hubam umbuk fug teg.

⁵Hat holok anggolo reg lit siyag ane til-wil noruk lahen.

⁶Hat hare ekeyen paleg angge fahet ayeg waroho og hum fug tehen palehon fahet fobik og nuruhun ulug enehangge at asum we misig enehon hilaruk lahen.

⁷Ik obok harukon haren ik og utuk lahen fug. Suburu obok harukon suburu og utuk lahen fug angge famen

⁸nine roho wereg lit nunuk su reg lahireg mun angge man angge an atmin ulug kinang obog toho ilmig taruk lahen.

⁹Hiyap yuwohon let nabin ulug hambeg waharukon arimano aliyek ulug yanggal eneptuk lit malik suwarehon inine elehon oho let enebuk fug angge embeseruk lahen.

¹⁰Ari fahet hat walinggoho yebangge anggolo yep tegma hat hapelegman alem ekeyon-ekeyon inam atukmu hakolen yuk lagmag uruk lahen.

¹¹O hiken hil hupnig hag toho weregman ik fu waharuk lit hat hondo haptuk.

¹²Suhal mondabi palimu werehon ino yet himin! Suhal ino emberimu Allah poholma wereg lit yatma wereg.

¹³Ari regma hat hele uruk lit, ’Mun ane man ane teko larukon fahet Allah oluk am fug teg. Hina ambolma wereg lit alem ap unubam werehon arimano haloho umbuk fug teg.

¹⁴Allah hina anggulohen mapmu regma pohol atog ke la wam turuk lit kinangma teko laruk ane yet ha fug teg,’ uruk lahen.

¹⁵Ari roho uruk lit haren te ap tam welatfahon unubabut onolokon laruk latfag abunggalem an oho laruk laruhuk peruk lahen ano?

¹⁶It arimano war atuk li uwanma ik fu waharuk lit kinang ahakoma lahalug o halog toho walug laruk hag toho ir oho siyag atfag.

¹⁷Iren Allah ubam enele uruk lit, ’Hat mondabi hineyonen nungge-nungge nunubahet turuk lahen fugmu nit nunumbahalug lag!’ uruk latfag angge famen

¹⁸Allah inowen mun angge man angge fanowon og isaruk latfagma inibam keleg teg latfag. It Allah ele sobir isarukon arimanowen wenggel haruk ane an nirim.

¹⁹Ap ari hahon siyag atukmu yet isalug ap siyag ane turuk elehon arimanowen inda yako ininggaliyap eneptuk lit

²⁰’Ap nit men seli roho welatuson arimano eleg atusama iren lin isarusa angge indoken narisi,’ uruk.

²¹Hat nin hebeloho fano welaruhunen Allah men seliyap turuk lahen ane embeselug hininggik ahandip toho welamuhup.

²²Aren komo haptuk ane holtuk lit awene hindimu foroho laruhun.

²³Hat At mondabi ineyon ambeg hebeloho waruhun halug Aren hat hebeloho unduhuk hubahaku. Mun ane man ane siyahon hibamen wilibi feseruk lit

²⁴emas ili rurukon haren foroho lahenon obog toho oko wahunteg ik firig teg ambeg helep anggen eneg weregma sehelimu hik isa lahun.

²⁵Hik isa lahunmu emas ili rurukon men perak mondabi umbagpag turukon men ubalma Allah mondabi ineyon ino hat fahet welaruhu.

²⁶Hat hinggali eleg toho At olohotma unduhuk lit At mondabi ineyon fahet hahiyeg toho welaruhun.

²⁷Haren At ubam sembahyang urukmu Aren hol hiyaruk laruhu. Haren te Allahn let nabuhu ane fahet nungge-nungge og uruhuk ulug sali emberuk lahenon hikit toho og utuk laruhun.

²⁸Anden tu men ari men tuhuk ulug kong toho emberuk laruhun ane hikit toho teko lahu. Hat o kema-kema laruk laruhunmu seleg fanowon hubam aruhu.

²⁹Allahn ap enebe hemet til noruk inap arimano apmayap eneptuk, ininggareg apmayap taruk inap let eneptuk.

³⁰Ap alem unubam wereg elehon Aren windat eneptuk lit hat hinggikmu siyahon tag teg elehon oho windat habuhu,” ulug hiyag itfag.