Read Angguruk Yali AYUB 23 Bible Online

AYUB 23 - Angguruk Yali bible

AYUB 23

¹An nubabut fano reg lahi ibag ane Elifas inowen ele ibagma Ayuben hebeloho hiyag utuk lit,

²”An nindi siyahen ngesekum turuk lahiyon hondo rimin pihi angge famen o yoho haren Allah fahet ehenon nirimen At ubam suwahal imin.

³At wereg ambeg noluk teg lalereg ambeg lele.

⁴Lelereg un ane an nubam lombohap naptuson pikirap timinen tu men ari men hiyag itmin ulug fano roho wenggel halug alem an nubam werehon seleg toho hiyag etle.

⁵Aren hebeloho hiyag netep ane anden holtereg fuki roho wenggel hele.

⁶At ineyonen indi niya fug angge an nubam suwahal elep ano? Eleg-o, Aren an nele urukmu hol neyelep peruk lahi.

⁷An men At men suwahal ila halug Aren an fahet ap ubabut fanowon wereg pelepma alem kong toho emberuk ahun inggikmuwen an mondabi wilip ale angge famen

⁸an yali fil lahuk halug At welaruhu fug, hubula fil lahuk halug oho At yet hahuk fug.

⁹Ik elerukmu wereg ano ulug yami rurukmen At welaruhu fug. At ik ambutmu hiraho lit wereg halug anden yet hahuk fug.

¹⁰An kema-kema laruk lahimu Aren yet niyaruk. Aren an nubabut fano wereg ano ulug wal niyarukmen emas mondabi umbagpag turukon hag toho wereg ulug oluk atep.

¹¹An kalem fanowon embeselug la fug angge At uyug soptuk ambeg fuki roho kim halug ombolim laruk latikik.

¹²At ele uruk ane an nindimu foroho lit tu men ari men turuk laruhun ulug komo naptuk ane suhan isaruk lahi fug angge famen

¹³Allah misig ino nin am fug angge weregma ap san Haren tuhuk peruk lahen ane tuk fug ulug senebuk teg? At indimuwen tuhuk ulug wenggel haruk ane obog toho hikirap turuk.

¹⁴Aren kong toho emberisiyon hikit toho an nubam turuk laruhu. Fobik oho tuhuk peruk ane anggolo indimu foroho lit teg.

¹⁵Ari fahet an At olohotma nakolen namelmel toho welahi. At fahet wenggel harukmu naliplip naptuk.

¹⁶Allah mondabi ineyon inowen an nakolap naptisimu nindi fir atisi.

¹⁷O hiken waling nasug lit weregma nilen yet ha fug angge wereg lit mondabi siyag aruhuk,” ibag.