Read Angguruk Yali AYUB 24 Bible Online

AYUB 24 - Angguruk Yali bible

AYUB 24

¹Aben siyag ane turukmu Allahn yet isaruk eleg ibag ane Ayuben nin ele uruk lit, ”Nungge fahet Allah mondabi ineyon inowen tu sambil men ari sambil men alem haloho emberuk laruhuk ulug kong toho emberuk eleg? Kong toho embelep sambil arimano mun ane man ane haltukmu At onoluk inaben yet helep.

²Ap misihen kinang nareyen tohon hilamin ulug kinang hili hikip toho imbik laruk. Ap ekeyen are ambohom hilalug foroho lit wereg.

³Ekeyen hiyap yuwohonen paleg angge fahet fobik og nuruhun ulug enehangge ambohom hilaruk. Malik suwarehon enembohom ininggikmuwen taluk toho hilaruk.

⁴Ap inine elehon kalemma larukmen miyaloho leg isaruk. Inilaheg toho werehon arimano enekolen hirag arik laruk.

⁵Olomene suburu oboken naruk angge yami ril laruk hag toho ap inilaheg toho werehon arimanowen oho nit nunumalikisi fahet suburu yami rik lul ulug anggenma lalug lisag toho iniyabuk wit taruk.

⁶Iren ap winon iniyabukmu suburu yahal taruk lit ap onolokonen hele anggur anggen paltuk li we tor angge embeserukon arimano tahan taruk.

⁷Enesum wan tarukon elehen hubanggo enebiye nohoruk. O sun waharuk li oho sum hililip toho nohorukon elehen sun toho nohoruk.

⁸Tom fam larukmen osit humon unubam pilabik waharukmu owik elehen helep fam lombog atuk.

⁹Hiyap yuwohonen unumalikisi ag mondotukmen aben malik arimano ininggik kililim toho hilaruk lit inisingasiyen paleg angge fahet unumalikisi enemingminganggeyap eneptuk.

¹⁰Sum wan turukon elehen enebiye laruk lit roti anggen aben tohon paloho unumaloma ha roho walug laruk. Walug laruk angge arimano ininggareg na fug tehen suburu obok haruk.

¹¹E zaitun anggen tahanoho e iraroho yahowon honggolegma pereltuk lit hele anggur anggen paloho pete ruruk. Pete ruruk angge arimano ininggareg na fug tehen ik obok haruk.

¹²Ap war atuk lit o pumbukmuwen enele ya nga urukmu aben mep toho unusurukon arimanowen enele hi roho uruk angge famen Allahn hol isa fug angge ap it siyahap eneptukon misig oho alem unubam emberuk eleg.

¹³It unubabut onolokon arimanowen o seleg fanowon fahet ninirim peruk lit o seleg tegma laruk ane enepelehen laruk eleg.

¹⁴O sakan tik ohoma ap arimano in atug ap inine elehen inilaheg toho werehon unusik laruk. Hup atukmu ap enenggengge yoholiyangge hilil laruk.

¹⁵Ap nare uhe pal tamin perukon inowen aben yet niya nowen ulug o hup atmisimu eneg norohole sum fam saloho hiyap ino hilak lamin ulug wenggel haruk.

¹⁶Ap winon o hubanggo ap enenggengge hulul ulug inibam ubahat fo roho kuruk. O unukoho ininggareg inibam sok laroho wereg lit hirag atuken o seleg fanowon enepeleg toho wereg.

¹⁷O hik fahet enekol eleg toho wereg lit hubanggo fahet unukoho wereg peruk.

¹⁸Hiren henele uruk lit,[7] ’Ik fu waharuk lit alinglongangge walug laruk hag toho ap onolokon arimano folo-folo longgo uruk. It enengginang Allahn huluwap turukmu hele anggur yatuk ambeg siyag atuken anggen tahan taruk eleg.

¹⁹Hibilil mowen yet harukmu eleg atuk hag toho ap unubabut onolokon arimano oho war atuk.

²⁰Inisingasiyen it fahet wenggel isaruk elegma it wareg angge imbalowen unduk fano ulug narukmu aben it ununuk enepeleg aruhu. E fala ruruk hag toho onolok toho turuk ane ino fala roho laruk.

²¹Ap onolokon arimanowen hiyap yuwohon enele ying eneptuk lit hiyap malik indag taruk elehon siyahap eneptuk.

²²Allahn ap onolok ane turukon arimano ininggik lisoho hik isaruk. Hik isamin ulug in atuk halug war amul ulug inindi fir atuk.

²³Atamtam Allahn inindi yuwahap eneptukmu iren timi roho unduhuk lahe ambeg wereg peruk angge famen Allahn it kema laruk ulug fuki roho kim isaruk.

²⁴Kim isarukmu it arimano su atuk lit we il misig eneg palimu weregman e owil folo-folo halo atukon hag toho loloho wamburuk. Roti anggen paloho emberukmu ilim atukon hag toho welamuhup,’ uruk lahep.

²⁵Anden un ane ihi fug. Nele si ane ihi halug ap san Ayuben alem eleg ane ehek imisi?” ulug hiyag isibag.