Read Angguruk Yali AYUB 26 Bible Online

AYUB 26 - Angguruk Yali bible

AYUB 26

¹Bildad inowen ele ibagma Ayuben hebeloho hiyag utuk lit,

²”An nine elehon haren fanik-fano roho let nabehen. Ninggik ine elehen nungge-nungge tuk fug teg lit weregman haren windat nabehen.

³Haren mun ane man ane alem obog toho holuk teg lit an nindi sohu roho welahiyon fano komo nabehen.

⁴Ap san milal habehekma hele hiyag nerehen? Ap san indi anggat toho wenggel haruk ane hat feneyen wilip aha?

⁵Allah ineyon fahet ap warehon enehime arimano ik suwon yenggelehon ahum apman enekolen elek-elek angge ruruk.

⁶Ap warehon wereg ambeg ino abilit lareg elehen Allahn ap mondabi siyag atuk ambeg ino oho pilap haruk.

⁷Mun angge man angge elegman Allahn pohol leho fibag. Ahongge wereg elegman kinang hondo ribibag.

⁸Aren osit hina elma hinanggo ferukmu hina arimano tararag turuk eleg.

⁹Aben yet hahup tohon ulug At hur atuk ambeg hinan hililip turuk.

¹⁰O hik men seleg men amu-amu welamag ulug ik suwon yenggelehon walinggoho wirim haruk lit hili waroho imbibag.

¹¹Allahn ele pararag turukmu pohol ahongge yuk elek turuk.

¹²At indi anggat toho werehonen manu Rahab al senggeloho ilkal tebeseruk lit ik suwon haglabut watukon ino yuwahap tibag.

¹³Ambilik ahe fu isarukmu pohol obog toho sing pohol eneg atuk latfag. Inggik ineyonen pisanggo humon folo-folo kululung toho larukon ware fisibag.

¹⁴Allahn turuk latfag ane arimano fahet aben enele enenggolop elman ahuri roho uruken niren fuki roho hol isaruk lahe fug. Hol isa fug tehen anden Allahn turuk latfag ane winon embeselug we tor angge eneg tintilihi. Ari halug At ele ululu sup turuk hag toho uruk lit mun ane man ane ine roho turukon ap san oluk teg?” ibag.