Read Angguruk Yali AYUB 27 Bible Online

AYUB 27 - Angguruk Yali bible

AYUB 27

¹Ayuben nin eke ele uruk lit,

²”Alem nubam lombohap naptuson Allah mondabi ineyonen haloho umbuk fug angge nindi angginap naptuk. At olukon inowen holeg lit weregma anden tem toho iminon tu:

³Allah ambilik ahe an nubam fu roho kilap napfahon weregma an noluk wereg li

⁴nambiliken un ane uruk lit ap enele ying eneptuk laruhuk fug.

⁵Hit henele an nubahet tem toho irikip ulug anden uruk laruhuk fug. Anden siyag ane tirikik fug uruk lahiyon ari senegman eneg war aruhuk.

⁶An nindi pikit toho wereg lit Allahn peruk ane eneg tirikik uruk lahiyon ari umbusuhuk fug. Misihim oho anden siyag ane tirikik fug ulug nindimu wenggel harukmen eneg welaruhuk.

⁷Ap onolokon alem angginon unubam atuk hag toho an men seli roho werehon unubam amag! Allah fahet enepelehon siyag atuk hag toho an men ninirim perukon arimano oho siyag amag!

⁸Allah fam wenggel haruk elehon enehime Allahn wol eneptuk halug iren fano amuhuk ulug wenggel ha reg ano?

⁹Alem angginon unubam aruhu halug iren let nenebik ma ulug enele hi roho urukmu Allahn hol isahu ano?

¹⁰Iren At mondabi ineyon fahet enehiyeg haruk lit likiya hupmu ubam sembahyang uruk lamuhup ano?

¹¹Allah inggik ineyonen turuk ane fahet anden hiyag hisamin. At mondabi ineyonen mun ane man ane turuk laruhuk ulug indimu foroho ane anden hit fahet inamap timin.

¹²At ineyonen turuk ane hit hinilen yet harikip halug nungge fahet henele sibiling-sibiling ane uruk lahep?

¹³Aben Allahn peruk ane windal isaruk lit onori siyahap eneptuk halug Allah mondabi ineyonen hebeloho unusuhuk ulug kong toho emberisi ane anden hiyag hisamin:

¹⁴It unumalikisi anggolo indag taruk lamuhup angge famen tog elman war amuhupmu unumbusagsi suburu obok harukmen eneg welamuhup.

¹⁵Iren ondohowonen endebuhubon we tor angge onoluk welamuhubon arimano ouk alem suwonen unusuhumu unuhesi lin isahubonen it fahet hunu sini uruk lamuhup fug.

¹⁶It arimano uang ik yinggi mondeg hag toho ngi reg lit sum wan tarukon palu lahabil laharuk lamuhup angge famen

¹⁷ap Allahn peruk ane hikit toho turukonen sum arimano hilalug wan tarukmu alem unubam elehonen uang arimano fibir amuhup.

¹⁸Inibam fanowon arimano hep-hep ahalonggok kong toho laruk hag toho siyag atuk. O sabo aben yabukmu witukon hag toho folo-folo tantum turuk.

¹⁹Tung toho wereg lit nohik laruk angge famen in atuk lit yet harukmen mun angge man angge iren tohon elegma yet haruk.

²⁰Ik fu waharuk hag toho alem eke hag eke hag unubam aruhumu enekolen yuk lagmag uruk lamuhup. O hup aruhumu siyeluwen og eneplug lahu.

²¹Siyelu ino yali filen waharuk lit it inibamen lisoho og eneplug larukmu linggik-longgo uruk lamuhup.

²²Siyelu inowen ine roho unubam fu ruruk lit sen enebik ohoman it longgo ul ulug folo-folo laruk.

²³Folo-folo larukmu siyelu ino enembol filen waharuk lit aben wasubag sup isalug ininggaliyap eneptuk hag toho unubam turuk,” ibag.