Read Angguruk Yali AYUB 28 Bible Online

AYUB 28 - Angguruk Yali bible

AYUB 28

¹Helep ili faya rurukon yami rurukon fahet ibag ane Perak ili rurukon tom fo roho hiyaharuk ambeg we tem toho wereg. Emas umbagpag turukon indok fam puhun tebeseruk ambeg oho wereg.

²Besi ineyon kinang fabuloho hiyaharuk. Ine angge tembaga ino helep elma weregma indok fam iringgurukmen wiyig atlug helep famen wilip atuk.

³Aben ili ruruk angge yami rul ulug iral walug laruk lit tom fo roho elma kuruk. Elma kulug yami ril laruk lit mondabi atogma lalug hik teg ambehen ili ruruk angge arimano hilaruk.

⁴Ap laruk eleg ambeg tom fo roho apma wamburuk. Apma wambul ulug hele yaron ililoho pilaptukon ino fene wamburuk.

⁵Kinang ino fam suburu fano wilibig angge famen kinang apmane aben kinanget helebet hebel-pebel toho warukmu indoken naruk ambeg hag atuk.

⁶Hebel-pebel toho waruk lit helep ili faya urukon il sing pohol hahon helep elma weregma hiyaharuk. Helep ili faya urukon arimano fene emas umbagpag turukon tot-tor angge lombog teg.

⁷Tom fo roho wamburuk ke suwe kut ino apeleg. Suwe tunguniyen oho yet haruk eleg.

⁸Olomene kebunggalem ari laruk eleg. Wam eliyen oho kalem ino soptuk eleg angge famen

⁹ap eneg laruk lit ili ruruk angge yami rul ulug helep arikon fele roho ilkal isaruk. Ilkal isil laruk lit helep tuwaliyen famen tulug atel fam tom obog toho hebeltuk.

¹⁰Tom ayeg undama ap laruk ke haltul ulug helep fo ril laruk lit kim harukmen helep ili faya rurukon eke hag eke hag wereg.

¹¹Helep fo reg ambeg ik kuhu rohon ulug ik tep-tep angge turuk ambeg lare feseruk. Ari roho turuk lit fano-fano angge kinangma hirahowon eke hag eke hag wiliptukmu aben yet haruk. Ap inindi anggar atuk ane yami rurukon fahet ibag ane

¹²Ap inindi anggar atuk ane kema yami rik lul? Fuki roho wenggel haruk ane kema wereg?

¹³Yami rik laruk ke ap obog toho enepeleg.[8] Kinang atogman atogma yami ril larukmen ap inindi anggar atuk ane ino hiyahakup fug.

¹⁴Ik suwon yenggelehon inowen ele uruk lit, ’Yami rik wahebon ari an nelma wereg eleg,’ uruk. Helep tuwaliyen inowen oho an men wereg eleg uruk.

¹⁵Ap inindi anggar atuk ane hulul ulug umbagpag turuk angge emas men perak men fam ayeg waroho hila fug teg.

¹⁶Emas mondabi fanowon o Ofiren hilarukon men helep ili faya rurukon il polu palehon hahon men il sing pohol hahon men wirim teg eleg.

¹⁷Ikag tebuwag emas fam wirihon men helep sili yanggowon hahon men oho ambi reg eleg.

¹⁸Melei men helep yanggowon ik il wirikon hahon men wirim teg ano ulug wenggel ha fug! Ilembani umbagpag turukon onggo anggolo fam warukon we tot siyag tegma ap inindi anggar atuk ane mondabi fano wereg.

¹⁹Helep il puhulik palehon hahon men emas ik il wirikon hahon men wirim tuk fug teg.

²⁰Ap inindi anggar atuk ane kema yami rik lul? Fuki roho wenggel haruk ane kema wereg?

²¹Ap inindi anggar atuk ane ino hiraho lit weregma lebe ruruk angge misihen oho hiyaharisi fug. Suwe pohol keyen larukonen oho yet harusa fug.

²²War atuk ambehen aben uruk hag toho ele uruk lit, ’Aben at fahet enele urukmu eneg holtikik,’ uruk.

²³Ap inindi anggar atuk ane kema wereg ulug Allah eneg oluk. At wereg ambeg laruk ke Ar oho oluk.

²⁴At poholma wereg lit mun angge man angge kinang atogman atogma werehon obog toho yet haruk.

²⁵Amukasi Allahn siyelu anggin ari hag toho welaruhu ulug fuki roho wirim halug imbibareg ik yenggelehon kema-kema welaruhu ambeg hili waroho imbibag.

²⁶O itano li osit pilabik waharuk ane oho pinel men ululu men laruk ke oho haloho imbibag.

²⁷Ari roho turukmen ap inindi anggar atuk ane yet hibareg fano reg ano siyag teg ano ulug wal harukmen fano wereg latfagma mondabi welaruhu ulug ineyap tibag.

²⁸Ineyap tibareg ap hiyag isaruk lit, ’Inikni Allah fahet enekol toho wereg ane ariyen eneg ap inindi anggar am teg. Siyag ane timin fug peruk ane ariyen eneg fuki roho wenggel haruk ane inam atuk,’ ibag,” ulug Ayuben ori hiyag isibag.