Read Angguruk Yali AYUB 29 Bible Online

AYUB 29 - Angguruk Yali bible

AYUB 29

¹Ayuben nin eke ele uruk lit,

²”Indam Allahn wanggi waroho fet nasugmu fano welatikik hag toho ketiya oho fano welale peruk lahi.

³Allah iral hag toho wereg lit an selehap naptuk latisi. An o hik tegma larukmu oho Aren hondog naptuk latisi.

⁴An kabinimu Allah niraham wereg lit nibam foroho latisi.

⁵At mondabi ineyon ino an men weregma numalikisi an walinggoho welatusa.

⁶Nambohom ag owe ik wilip atuk hag toho anggolo weregma helep punumuwen oho e zaitun fano roho wilip atukmu ahaluwe anggolo wereg latisi.

⁷Onowesi roho werehon arimano elehet o pumbuk huk toho ohowon sokolma heriyeg lit alem haloho emberuk ambeg an oho lalug heriyegma

⁸yet niyaruk lit ap kabiniyon arimano an fahet enekolen hirag atukmu sabalon arimano in atuk latusa.

⁹In atug ap suwon-suwon arimano ininggiken enembilik lareg lit enele sahaltuk ane embeseruk latusa.

¹⁰Palimu wereg inap enembilikanggen lam-lamma topno regma hag toho enele uk fug teg latusa.

¹¹Ap an fahet hol haruk latuson arimanowen an wel naptuk latusa. An yet niyaruk latuson arimanowen fano ane nubahet uruk latusa.

¹²Ap inilaheg toho werehon let nenebik ma ulug enele hi roho urukon anden let eneptuk latikik. Malik suwarehon ap inibil atuk elehon arimano anden ili og eneptuk latikik.

¹³Ap war amul ulug turukmen anden windat eneptuk latikikon arimanowen an nubam Allahn fet hasug laruhu uruk latusa. Hiyap yuwohon inibil atuk lit inindi seyap eneptuk latikikonen enehiyeg haruk latusa.

¹⁴Sum wan turuk hag toho Allahn perukon turuk ane wan teg lit alem fano haloho emberuk ane ino unggul asum langguk taruk hag toho wan teg latikik.

¹⁵Ap inil hupnihon fahet an it inil fanowon atuk lit unuyug siyahon fahet unuyug fanowon atuk latikik.

¹⁶Ap inine elehon fahet inikni wereg lit ap an napelehon aben pet eneptukon fahet alem yami ruruk latikik.

¹⁷Ap ubabut olokon ekeyen nare mag-mag namin ulug turukmen anden iyahunde sengge ruruk lit are ayegman teltuk latikik.

¹⁸Ari roho turuk latikik li an nindimuwen wenggel haruk lit, ’An nibam amusun toho weregman eneg nindi yuwag toho war aruhuk.

¹⁹E umanggen kinang apma ik wereg ambeg pilaptukmu hubanggo hibilil pilabik waharuk ahen hag toho welaruhuk.

²⁰Aben an wel naptukmen eneg welamuhupmu nasehen siyag am fug angge mondabi fano regma ninggiken seneg laruhuk,’ perikik.

²¹Indam ap obog tohowen Ayuben ele hiyag nisamisi ulug enele eleg angge wereg lit anden komo eneptuk latikik ane fano holtuk latusa.

²²An nele obog toho uruk latikikmu ap misihen oho hebeloho ele uruk latisi fug. An nele uruk ane osit lililon pilabik waharuk hag toho inindi enehiyehap eneptuk latisi.

²³Aben niniyabuk ahaluweyap timisiyen osit wamag peruk hag toho ap obog tohowen Ayuben ele hiyag nisamisi ulug inindi sehet toho wenggel haruk latusa.

²⁴Ap inindi piren teg lit werehonen oho an nele fano holukag ulug naluke yihik lit nele hiyag isarukmu iren tem toho uruk ulug wenggel haruk latusa. An naluke yihik lit kim isaruk ane ariyen inindi wirik atuk latisi.

²⁵Ap suwon raja ekeyen otsi sehen senehon milal eneptuk hag toho anden ap obog toho milal eneptuk latikik ane hikit toho laruk latusa. Ap ekeyen ori inindi anggin toho werehon onggon eneptuk hag toho anden it obog toho inindi seyap eneptuk latikik,” ibag.