Read Angguruk Yali AYUB 3 Bible Online

AYUB 3 - Angguruk Yali bible

AYUB 3

¹Atfagma Ayub inowen nungge fahet indag napfag ulug ele uruk lit,

³”An indag napfag sali eleg alep. Hup an nisinga ahummu atik iyag sambil ino enepeleg amag.

⁴Indag napfag sambil ino hik amag! Allah poholma welahenon o ino sambil fahet hapeleg amag! O ino sambil nin sakan aruhu fug!

⁵Hina singonen hililip tuhumu o mum aruhu. Unukoho famen o hup atuk hag toho tukag.

⁶O ino hiken nonghonga feserukmu an indag napfag sali mo tu fam, pikalem aru fam ulug winag ha fug teg lamuhup.

⁷Hup ino sambil malik eke indag amuhup fugmu ap enele enehiyeg toho uruk ane eleg laruhu.

⁸Ap o hup amag ulug huluwap turukon enekol eleg toho manu Lewiatan[4] nohorukmu eleltuk inap arimanowen an indag napfag sali huluwap turuk lamag!

⁹Wap mo uwan lahik wam fugmu hutuk tehon ino o ino sambil hutuk aruhu fug. Hup ino sakan timisi ulug saplangge nangno ruruk lamag.

¹⁰Hup ino an nisinga malik ahummu atuk angge sok lare fisibag fugmu an indag napfagma alem angginon eneg nubam atuken hup ino sambil huluwap turuk lahi.

¹¹Nungge fahet an nisinga ahummuwen war atik iyag fug? Nungge fahet indag naptikim nong atik iyag fug?

¹²Nungge fahet nisingan ondoko ahoma waling napfareg ag mon napfag?

¹³O ino sambil war alereg nindi yuwag toho kel taruk lit nohoruk lale.

¹⁴Ap suwon men onotsi iniraham werehon menen o fanowon indam witfahon famen siyag atfahon nin keron wit taruk latfag inap tam war atfahon arimano men ambiyeg nohoruk lale.

¹⁵Ap suwon-suwon inibam umbagpag turuk angge emas perak anggolo foroho inap war atfahon arimano men ambiyeg nohoruk lale.

¹⁶Malik isinga ahummuwen war atukon mo yet ha fugmu sale feseruk hag toho kinangma sal naplep.

¹⁷Siyag ane eneg turuk inap war atlug laruk ambeg arimanowen onolok ane eleg atuk. Yabuk lisag toho witukmen sat eleg atukon oho war atlug kel taruk lamuhup.

¹⁸Ininggik hele waroho wereg inap oho war atlug laruk ambeg arimanowen inindi se roho welamuhup. It fet enesug inaben enele onolok toho unubam urukon arimano nin fobik holtuk lamuhup fug.

¹⁹Nonoluk wereg lit ap tu suwon, tu toron uruk lahe angge famen war atlug laruk ambeg arimanowen it obog toho we ambi roho welamuhup. Ap enemingmingangge oho mingming eneptuk lamuhup fug.

²⁰Nungge fahet sat haruk lit wereg inap onoluk eneg wereg? Nungge fahet inindi anggin toho werehon seleg og isaruk?

²¹Iren mun angge man angge fanowon fahet wenggel ha fug angge war atukon fahet eneg wenggel haruk. War ala peruk angge famen onoluk eneg wereg.

²²War alepma kinangma sal eneplep halug eneg enehiyeg toho welalep.

²³Allahn it kema-kema lahup tohon ulug walinggoho kilap enesugmu it fobik welamuhup ane fahet inindi nonghong uruk.

²⁴An suburu nele hag toho uba yatuk lahi. Nele nilaheg toho uruk lahimu nil ahaluwe ik hag toho wilip atuk.

²⁵Alem siyahon nubam am nowen ulug nakol toho wenggel haruk latikik angge famen alem arimano obog toho nubam atisi.

²⁶An nindi yuwag toho wereg lit kel taruk laruhuk peruk latikik angge famen alem eke hag eke hag nubam atuk,” ibag.