Read Angguruk Yali AYUB 30 Bible Online

AYUB 30 - Angguruk Yali bible

AYUB 30

¹Ayuben nin eke ele uruk lit, ”Ketiya notsi an men ambi reg elehonen inda yag naptuk. Indam it iniknisi inindi sohu rehen mene men ambiyeg let toho nambohom foroho lam fug teg ulug embeserikik.

²Ininggik ine eleg inaben nungge fahet yabuk wit numuhup perikik.

³It suburu oboken unuwag eneg teg lit anggenman e umanggen ilimon eneg sali-sali naruk latusa.

⁴War amuhuk tohon ulug sehentep inggila men umanggen men yami roho naruk latusa.

⁵Ap misihen ap enenggengge hirag tamin ulug turukmen aben enele ngik-ngog uruk lit yanggaltuk hag toho it arimano oho onoriyen yanggal eneptusa.

⁶Yanggal eneptusama larusareg fanggongma men kiling elma men owikmu men yug toho wereg.

⁷Wereg lit alog-alog angge sehelimu palu atug olomeneyen uruk hag toho enele ya nga uruk.

⁸It inindi sohuwon ununuk elehon aruma nit men ambiyeg welamuhuk fug ulug onoriyen sabiyap alem fam unusuruk lit yanggal eneptusa.

⁹Ketiya unumalikisiyen an nabug uruk lit inda yako kelem sini nebene uruk.

¹⁰Iren ininggali eleg toho an nolohotma wasubag sup isaruk lit me nenepeyen ulug enembol yig nutuk.

¹¹Allahn ine eleg amag ulug an nasehen inggila kobog teberisimu an yet niyalug it arimano wam kumbi loloho larukon aben senetuk elehon hag atuk lit an siyahap naptuk.

¹²Ninggik pikit filen it kabiniyon onolokon arimano luhaloho watlug fuk toho wabukag ulug miyal naptuk lit pinggi wabul ulug kilap nasug.

¹³Kilap nasuhen an longgo ik lamin perikik ke lare ferusa. An nuwabul ulug turukmu ap misihen oho sen eneptuk eleg.

¹⁴Ap seliyonen elehet o pumbuk walinggoho ohowon halog toho pin kuruk hag toho asan-asan angge luhaloho nuwarik waharuk.

¹⁵Nuwabul ulug waharukmu nakolen yuk lagmag uruk lahi. Aben an wel naptuk ane siyeluwen walug laruk hag toho longgo irisi. Nindi yuwag toho welatikik ane hina homhomowen fu isarukmu mondabi laruk hag toho eleg atisi.

¹⁶Ik hilil isarukmu laruk hag toho an war am hag ane turuk lahi. Likiya hupmu alem siyahon eke hag eke hag nubam atuk lit an sen nasug.

¹⁷Hubanggo ouk waruk lahiyon ariyen umbusuk fug angge an nebe sali heheg naruk hag toho nuwatukmu nuwag obog toho eleg atuk.

¹⁸Sum wan teg latikikon Allahn inggik ine roho seneg lit nanggolop pete roho

¹⁹sabelepma hik niyarisimu kinang alinlan hag atikik.

²⁰An nele hi roho hindi niyimin urukmu Haren hebeloho hele hiyag nutuk lahen fug. Anden sembahyang imin ulug holohotma unduhukmu Haren let nabuk fug angge hilen eneg kim niyaruk lahen.[9]

²¹Hat hubabut nin atuk lit an men seli atikinteg hinggik ineyonen holok ane eneg nubam turuk lahen.

²²Haren an siyelu emberimu numbahik laharikinmu siyeluwen an og naplug larukmen ululu sup turukmu mondabi siyag aruhuk.

²³Ap obog toho palu atuk lamuhup ambeg Ayub oho lawag ulug Haren wenggel haruk lit ap warehon weregma hondog naplug lahenon an noluk.

²⁴Ap eke asengseng toho wereg lit ele hi roho let nabik maniyek uruk halug aben let turuk eleg ano?

²⁵Ap enesengseng toho wereg lit uba yatukmu an oho uba yatuk latikik fug ano? Ap inine elehon fahet an nindi anggin toho wenggel haruk latikik angge famen

²⁶anden fano ane nubam aruhu ulug wenggel harikikmen siyag ane nubam atisi. O seleg fanowon nubam aruhu perikikmen hik nubam atisi.

²⁷Likiya hupmu asengseng-pasengseng toho welahiyon fahet nundama ahe laharukmen eneg welahi.

²⁸Nindi angginen norohole hilik toho la wam turuk lahimu mowen yet niyaruk lit nindi inahanap naptuk eleg. Ap palu roho wereg ambehen in atuk lit nele hi roho let nabiyok ulug ap unubam heng eneptuk lahi.

²⁹An olomene ele kuwa rurukon are hag atikik. Suwe siyomayo men ambi reg lahi.

³⁰Inahanen an nuwag lilog atukmu nahap sing atisireg nahamut hog toho wamburuk.

³¹Indam an nahiyehen pinggong men waruk men watuk latikik angge famen ketiya uba yako piya sini eneg uruk lahi,” ibag.