Read Angguruk Yali AYUB 31 Bible Online

AYUB 31 - Angguruk Yali bible

AYUB 31

¹Ayuben ori hiyag isaruk lit, ”Hiyap tuhumon eke yet halug an helele peruk laruhuk fug ulug kong toho emberikik.

²Hilahuk pele halug Allahn nubam ke roho telep? Aben siyag ane turukmu At mondabi ineyon inowen it unubam nangginoho turuk?

³Allahn siyag ane turuk inap unubam alem angginon eke hag eke hag monde feruk.

⁴An kema-kema laruk lahimu Aren yet niyaruk. Mun ane man ane turuk lahiyon oho At oluk.

⁵Misihim oho ap unubam nele si ane irikik fug ulug fag toho uruk lahi.

⁶Allahn an nindimu kim niyalug siyag ane tirisi fug ulug oluk aruhu.

⁷Nungge-nungge nilmu yet halug nindimuwen helele peruk lit kalem fanowon embeselug lelema ninggikmu siyahon tag teg lalep halug

⁸ap winonen yahongge anden tohon nin naruk lit nin winon heneko hik-hak eselep.

⁹Ap an niraham werehon uhe helele peruk lit at ibam sokolma hirako kahaleg lale halug

¹⁰an nuhe ap winon fahet suburu isag isarukmu at men ambiyeg nohoruk lalep.

¹¹Anden ari hag toho tele halug unggum kong turuk inaben alem mondabi siyahon tirisi ulug angginon nubam embelep.

¹²Anden teleyon indok ambulpul hag toho wereg lit an nebe ninaruk lit nanggengge obog toho nelep.

¹³Anden namingmingangge unubam siyag ane turuk latikikon fahet it nambeg waharukmu enele holoho embeseruk latikik fug.

¹⁴Holoho embesele halug Allahn hinog og niyarukmu an nangginoho At olohotma in alereg hebeloho hiyag etle?

¹⁵An wal napfag ahun inowen namingmingangge oho wal enepfag fug?

¹⁶Ap enengge elehonen an nubam heng naptukmu aliyek ulug yanggal eneptuk latikik fug. Hiyap yuwohon inindi anggin toho werehon oho embeseruk latikik fug.

¹⁷Malik suwarehon suburu obok toho weregma og isa fug angge an namu naruk latikik fug.

¹⁸An nebe totman angge malik suwarehon fet enesugmen ketiya oho let eneptuk lahi.

¹⁹Ap enengge elehon enesum wan turukon men nohoruk angge men elegma yet isalug

²⁰nambohom domba oruk fam yihikon og isaruk latikikmu iren enele uruk lit, ’Nahap sun toho weregma og nerehek,’ ulug inindi enehiyeg toho an hi naptuk latusa.

²¹Alem kong turuk ambeg nori anggolo werehen nibil amuhup ulug malik suwarehon enele ying eneple halug

²²ninggik abahum oko lelep.

²³Anden ari roho turuk laleyon fahet Allahn alem angginon nubam umbuhu ulug nakol toho wereg lit At palimuwon olohotma unduhuk lam fug teg lale.

²⁴Fano-fano angge anggolo foroho lahiyon ariyen alem siyahon nubam am fug angge we fano roho welaruhuk peruk latikik fug.

²⁵Yabuk anggolo witikikteg anggen anggolo ninggikmu atisi ulug nahiyeg haruk lit nawelwel taruk latikik fug.

²⁶Mo asinandi rurukon men pikalem umbagpag toho larukon men fahet nakolen

²⁷sembahyang imin ulug wenggel haruk lit ninggik kaya roho hi eneptikik fug.

²⁸Hi eneple halug unggum kong turuk inaben Allah poholma werehon unuk apmayap tirisi ulug alem angginon nubam embelep.

²⁹An men seli roho wereg inap alem angginon unubam atukmu fano asengseng haruk ulug nahiyeg toho welatikik fug.

³⁰An fahet ninirim peruk inap war amag ulug nele olok toho uruk lit huluwap eneptuk latikik fug.

³¹Ap sa-o sa-o an nibam waharukon suburu fano roho og isaruk latikik ane it an men werehon onoluk.

³²Ap yatman waharukon selma nohokup ulug an nibam sok husigmu kulug nohoruk latusa.

³³Ap winonen siyag ane turukon hiraho lit wereg hag toho anden hirako foroho latikik fug.

³⁴An fahet siyag ane tirisi ulug ap anggolowen enele sahaltil larukmu nakolen nele uk fug angge nibam welatikik fug.

³⁵Ap san anden uruk lahiyon aru holmisi? Anden uruk lahiyon aru we tik-tem toho uruk lahi. At mondabi ineyonen an nele hol niyalug hebeloho hiyag nuruhu! An fahet ninirim peruk inaben alem ubam wereg ulug suwesingga haharoho emberuson wereg halug an kim haminen og nirik maniyek!

³⁶Og nirik watlihipmu suwesingga ino naliliyangge hag toho nunggulmu lahaboho welaruhuk.

³⁷Nambong se roho Allah olohotma lahukteg mun ane man ane anden turuk latikikon fag tuhuk.

³⁸Kinang aben tohon huhulangge hilarikik fug.

³⁹Ap yabuk wiroho yag naptuk ahun ino suburu obok toho weregma suburu aren yatuk latisiyon an namu eneg nabit naruk latikik fug.

⁴⁰Ari hag toho tele halug roti anggen fobik yatleyon fano roho wilip am fug angge hele alohon men hoholangge men eneg wilip alep,” ulug Ayuben uruk latfag ane tiya fam emberuk lahe.