Read Angguruk Yali AYUB 32 Bible Online

AYUB 32 - Angguruk Yali bible

AYUB 32

¹Ayuben anden siyag ane turuk latikik fug peruk ane umbusuk fug angge seneg lit wereg ulug ori hinahan itanowen onoluk atfareg at men enele sahaltuk latfag ane imbisibag.

²Imbisibagma yet isibareg o Bus ahun Barakheel unggul unuk Ram ahun amloho Elihu ino undama ahe laharukmu Ayuben alem nubam elegman Allahn nuwatuk peruk latfag ane fahet olok hibag.

³Ayub ori hinahan itanowen alem Ayub ubam werehon yami rurukmen hiyaharusa fug ulug Elihu inowen it fahet oho ahum ke het atfag.

⁴Ahummu het hibag angge famen an it hinahan onot welahireg iren tam ulusama eneg anden oho Ayub nele hiyag itmin pibag.

⁵Ari pibareg it hinahan itanowen Ayub nin hebeloho hiyag um fug teg ulug yet isibareg indi inahan toho ele uruk lit,

⁶”An kabini reg lahi, hit sabal teg lahepma ninggaliyen anden peruk lahi ane hiyag hisamin fug ulug nakol haruk lit nele irikik fug.

⁷Anden wenggel haruk lit, ’Tam ap sabalonen enele uruk lit amusun toho milal tarukmen eneg onoluk atfag ane hiyag nisawag!’ perikik angge famen

⁸Allah mondabi ineyonen ambilik ahe ap undama fu roho kilapfag. At ahime inowen inindi anggarap eneptuk.[10]

⁹Ap sabalon eneg inindi anggat teg, amusun toho welatusonen eneg tu fano, tu siyag ulug haluk teg puk fug!

¹⁰Ari fahet anden oho noluk teg lahi ane hiyag hisaminen holiyek!

¹¹Hiren alem yami ruruk lit hinindi wenggel halug nungge ane ulusa ulug nangno henesug latikik.

¹²Nangno henesug lit fuki roho kim henesugmen hit sehelimuwon misihen oho Ayub fam un ane ehen ulug fag toho hiyag itikip fug.

¹³Hiren te, ’Ketiya nonoluk aheyon tu: Ap kinangmonen Ayub apmayap tuk fug teg, Allahn eneg apmayap tuk teg,’ uk fug.

¹⁴Ayuben ele uruk latisiyon ino an nubam irisi fug, hit hunubam irisi. Ari fahet hiren uruk latikibon hikit toho uk fug angge anden peruk lahi ane eneg hiyag itmin.

¹⁵Ayub, nare, it hinahan aruma yuk lagmag uruk lit nungge ane ul ulug inindi sohu reg lit enele hebeloho hiyag hum fug teg.

¹⁶Enele uk fug angge unduhukmu yet isaruk lahireg fobik enele ulusa ano ulug nangno enesug latmin ano?

¹⁷Nori, hit henele obog toho ehepma ketiya anden peruk lahi ane hiyag hisaminon nubam aha.

¹⁸Mun ane man ane fahet nele anggolo imin peruk lahiyon ariyen nindimu keleg tehen nele uk fug angge welam fug teg lahi.

¹⁹Suburu sum keleg toho yuhatukmu tararag turuk hag toho nundama nele imin peruk lahiyon keleg teg lit nahum sup tuhu rohon!

²⁰Nambilik laroho welam fug teg lahi. Nele iminmu eneg nindi yuwag atmisi.

²¹An nele uruk lit ap tu suwon, tu toron ulug onorohole yami enepmin fug. Fano angge og numag ulug ap misig ubam oho nele fano-fano ane imin fug.

²²An napelehen nele fano roho uk fug teg lahi. Fano-fano ane ele halug an wal napfag ahun inowen folo-folo elehap naplep,” ibag.