Read Angguruk Yali AYUB 33 Bible Online

AYUB 33 - Angguruk Yali bible

AYUB 33

¹Elihu inowen nin ele uruk lit, ”Ayub nare, ketiya nele hiyag hitminon fuki roho holeg lamin!

²An nambilik husuruk lit nele imin ane ak turuk lahi.

³An nindi pikit toho wenggel haruk lahi ane wiliptuk lit un ane uk fug angge noluk teg lahiyon fag toho hiyag hitmin.

⁴Allah mondabi ineyonen ambilik ahe an nundama kilaptuk lit werehap napfag. Allahn werehap napfahon welahiyonen nele uruk lahi.

⁵An nele iminmu haren hebeloho uk tehon wereg halug seleg toho hiyag nitmihin.

⁶An oho Allahn kinang tor angge oko wibareg wal napfag angge re At olohotma an men hat men ambi reg lahe.

⁷Ambi reg lahereg haren te an nindi angginap napmisi puk fug angge an fahet hakol ha fug!

⁸Anden holeg lit weregma haren uruk lit,

⁹’Anden siyag ane tirikik fugmu alem nubam wereg eleg, siyahon nubam tag teg eleg angge famen

¹⁰Allahn an seliyap naptisireg an mako wambukag ulug alem eke hag eke hag yami rurukmen eneg wereg.

¹¹An o kema-kema lahu rohon ulug Aren yet nasug lit nuyug e suwon fo rehon fam kilap nasug,’ irikin.

¹²Ari roho uruk lit tem toho irikin fugmu anden hebeloho hiyag hitminon tu: Allah suwon ino men ap kinangmon men ambi reg eleg.

¹³Haren nungge fahet Allah fam suwahal uruk lit, ’Anden nele urukmu Haren hebeloho hele hiyag nutuk lahen fug,’ uruk lahen?

¹⁴Allahn perukon hiyag nisaruk ane wal-wal wereg angge famen niren holtuk lahe fug.

¹⁵Hubanggo ap noho enepeleg toho nohorukmen Allahn peruk ane nei fam hiyag isaruk.

¹⁶Nei fam seleg toho hiyag isaruk lit, ’Tu men ari men turuk lamuhup fug,’ ulug komo eneptukmu enekolen yuk lagmag uruk.

¹⁷Aben enebe hemet til noruk lit siyag ane tuhup tohon!

¹⁸Nei fam komo eneptuk lit inale lahabeg ambeg kulug war amuhup tohon ulug windat eneptuk.

¹⁹Ouk waruk lit heniyema yinggigmu inahanen unuwag elek-elek angge rurukon ari feneyen Allahn ap komo eneptuk.

²⁰Suburu naruk ane me ape ruruken unduk fano angge oho nirim ulug naruk eleg.

²¹Unu elegma uwag eneg atuk. Uwag unuwen mapmu rehon ketiya inam atuk.

²²We tot welaruhureg war atukon horog aruhumu kinangma saluhup.

²³Allah otsi malaikat teng-teng angge werehon sehelimuwon ekeyen ili wamin ulug iraham waharuk halug Allahn peruk ane hikit toho laruk ane hiyag utuk laruhu.

²⁴Hiyag uruhureg ilaheg ulug malaikat inowen Allah ubam ele uruk lit, ’Ap warehon wereg ambeg lahu rohon ulug windatmihin. Windatmihinen onggo og hitmin peruk lahiyon wep toho foroho lahi,’ uhu.

²⁵Ari roho uhumu ouk waruk ahun ino nin hebeloho fano aruhureg ebe kabinimu welatisi hag toho welaruhu.

²⁶Wereg lit Allah fam sembahyang urukmu Aren indi haruk lit holeg laruhu. Holeg laruhumu Allah orohole yet haruk lit Nikniyen hal nabehek ulug ahiyeg toho yunggultuk laruhu.

²⁷Aren ap obog toho onolohotman sini uruk lit, ’Anden pikir ane hareyap turuk lit siyag ane anggolo turuk latikik angge famen Allahn ayeg waroho nuwatisi fug.

²⁸An ap warehon wereg ambeg lahu rohon ulug Allahn windat naptisimu noluk wereg lit o seleg fanowon yet haruk lahi,’ uruk laruhu.

²⁹Allahn ari obog toho inggik pirenam ano hinahanam ano ap unubam teberuk.

³⁰It ap warehon wereg ambeg horogma larukmen Allahn onoluk wereg lit o seleg fanowon yet hawag ulug suhuloho hondog eneptuk.

³¹Ayub nare, anden nin eke nele hiyag hitminen hele uk fug angge wereg lit fuki roho holeg lamin!

³²Haren nele hebeloho imin peruk lahenon wereg halug hiyag nitmihin. Alem hat hubam werehon hal alep ulug anden oho wenggel haruk lahireg hat hindi se roho hele imihin.

³³Nele imin fug peruk lahen halug anden ap inindi anggar atuk ane fahet hiyag hitminen hele uk fug angge wereg lit holmihin,” ibag.