Read Angguruk Yali AYUB 34 Bible Online

AYUB 34 - Angguruk Yali bible

AYUB 34

¹Elihu inowen nin ele uruk lit,

²”Nori, hit hinindi anggat teg lit fuki roho wenggel haruk lahebonen anden iminon holeg lamek!

³Suburu unduk fano ano ulug ambilikanggenen nek haruk hag toho ap ekeyen ele fano uruk ano ulug ap isanggowen fuki roho hol haruk.

⁴Niren alem ino ambiyeg yami rurukmen fanowon tu, siyahon tu ulug fuki roho wenggel halug haloho umbul.

⁵Ayuben ele uruk lit, ’Anden siyag ane tirikik fug angge famen alem nubam lombohap naptuson Allahn haloho emberuk eleg.

⁶Siyag ane tirikik fug irikikon ino fahet aben ele si ane irisi uruk. Alem nubam elegman ap tog fam unusuruk hag toho nuwatisimu fano am fug teg lahi,’ irisi.

⁷Ap sa Ayub hag toho wereg? Aben likiya hupmu ik naruk hag toho Ayuben Allah abug urukmen eneg wereg.

⁸Ap onolokon men palu atuk lit Allahn peruk ane windal isarukon men mangno roho wereg.

⁹Aren ele uruk lit, ’Saplangge Allah men nininggik ahandip toho welahe,’ irisi.

¹⁰Ari fahet hit hinindi anggat teg lahebonen anden iminon tu holeg lamek: Allahn siyag ane tuk fug teg. At mondabi ineyonen fano peruk ane inggarehen sobir isa fug teg.

¹¹Aben turuk ane hikit toho Aren ayeg war isaruk. Ap fano ane siyag ane turukon arimano hikit toho onggo og isaruk.

¹²We tem toho Allahn fano peruk ane inggarehen suhan isa fug teg. At mondabi ineyonen pikir ane hareyap tuk fug teg.

¹³Ap san kinang foroho laruhun ulug Allah inggikmu imbibag? Pohol ha kinang ha seneg laruhun ulug ap san hiyag itfag?

¹⁴Allah indimuwen wenggel haruk lit nambilik ahe ap undama kilaptik iyahon ino men nahime fanowon men uwag oko hilamin pelep halug

¹⁵onoluk wereg angge obog toho misihim eneg war atuk lit ap oho hebeloho kinang alep.

¹⁶Ayub nare, hat hindi anggat teg lahen halug anden nin iminon tu holmihin:

¹⁷Haren Allah suwon mun ane man ane haltuk ahun ino siyag peruk lahen ano? Allahn alem fano haloho emberuk ane nirim peruk ulug wenggel haruk lahen ano? Nirim pelep halug nangginoho kinang aru seneg lalep?

¹⁸Aren eneg ap suwon raja unubam, ’Henesukun siyag,’ uk teg, onowesi roho werehon unubam, ’Hit honolokon,’ uruk.

¹⁹Aren ap obog toho inggiken lal enepfag angge re ap ununuk suwon inibil am fug angge tu tungon, tu ilahehon ulug onorohole yami eneptuk eleg.

²⁰It obog toho lagmag war atuk. Hup humanoho enekolen yuk turuk lit mondabi siyag atuk. Inine roho werehon arimano ap ininggiken unusuk fugmen mako wamburuk lit eleg atuk.

²¹Ap kema-kema larukmu Allahn yet isaruk. Mun ane man ane turukon At oluk.

²²Ap onolok ane turukon arimano Allahn hiyag nenebuhu ulug hik tegma hirag atuk halug oho Aren yet isaruk.

²³Alem eke wereg halug haltuk sambil haluhuk ulug sali umbuk fug angge we pikit toho haloho emberuk.

²⁴Alem ap suwon-suwon unubam werehon yami ruk fug angge oluk teg lit werehen we pikit toho ilte-kalte isaruk lit unubalmangge in eneptuk.

²⁵Ari fahet Allahn iren turukon fum toho kim isalug enepeleg toho weregman hubanggo ilkal isarukmu al senggeloho lin-lan uruk.

²⁶Onolok ane iren turukon fahet ayeg war isamin ane ap obog tohowen yet hawag ulug o silimuwen unusuruk.

²⁷Iren At enembol yig utuk lit Aren mun ane man ane tukon fahet komo eneptukon hikit toho turuk latusa fug.

²⁸Iren onotsi inine elehon siyahap eneptukmu it inilaheg toho werehonen enele ya nga urukon Allahn holtisi.

²⁹Allahn norohole saloho welaruhuk peruk halug aben yet haruk eleg. Allahn kel taruk laruhuk pelep halug oho ap misihen oho Hat hubabut siyag uk fug teg angge famen Aren pumbuk wal-wal werehon men ap man-man werehon men fet enesug ane embeseruk eleg.

³⁰Ap Allah ninirim perukon ap suwon raja lahalug nunumalikisi luhur amag ulug yebangge yep enebuhup tohon ulug Allahn yet enesug.

³¹Ayub nare, haren Allah fam hele uruk lit, ’An un ke larikikteg fobik nin un ane turuk laruhuk fug,’ ulug fag toho hiyag itikin ano?

³²Hiyag utug At ubam heng turuk lit, ’Siyag ane tirikik angge famen napeleg atisiyon wereg halug hiyag nimin. Siyag ane tirikikon nin hebeloho turuk laruhuk fug,’ ulug sali emberikin ano?

³³Ari hag toho irikin fug angge famen Allahn anden turuk latikikon fahet ayeg waroho onggo fanowon og numag ulug wenggel haruk lahen ano? Anden famen fug, we haren eneg Allah ubam nungge ane imin ulug fano wenggel himin. Haren wenggel haruk lahenon holtulen hiyag nisa ma!

³⁴Ap inindi anggat teg lit an nele uruk lahiyon hol niyarukon arimanowen hiyag nutuk lit,

³⁵’Ayub mun ane man ane fahet apeleg toho wereg lit ket-ker ane uruk.

³⁶Ayuben Allahn nirim peruk inaben uruk hag toho uruk. Ari fahet alem ubam wereg ano ulug likiya hupmu yami rurukmen eneg welamuhup.

³⁷Aren siyag ane turukon lahabil laharuk lit Allah ele ying turuk. Nit niniline inda yako inggik tag turuk lit Allah abug uruk,’ uhup lit teg,” ibag.