Read Angguruk Yali AYUB 35 Bible Online

AYUB 35 - Angguruk Yali bible

AYUB 35

¹Elihu inowen nin ele uruk lit,

²”Haren hele uruk lit, ’Anden Allah olohotma siyag ane tirikik fug,’ irikinon fahet tem toho irikik ulug wenggel haruk lahen ano?

³Haren te, ’Nungge fahet siyag ane tuk fug angge welaruhuk? Siyag ane turukon fahet saplangge nirim peruk lahi,’ irikin.

⁴Ari irikinmu hat horiyen holegma anden hebeloho hiyag hitminon tu:

⁵Hil pohol fil lahap harukmen hat apma regma hina mondabi palimu weregma yet hamihin.

⁶Hat apma welahenonen siyag ane turuk lit Allah siyahap tuk teg lahen ano? Holok ane anggolo turuk lahenon ariyen At siyag atuk eleg.

⁷Haren fano ane turuk lahen ariyen nungge-nungge At inggikmu atuk ano? Allahn peruk ane hikit toho turuk lit At let tuk fug teg lahen.

⁸Haren siyag ane turuk lit ap kinangmon hat men wirim tehon eneg siyahap eneptuk lahen. Fano ane turuk lit it hahon eneg let eneptuk lahen.

⁹Ap suwon-suwon arimanowen unumalikisi siyahap eneptukmu ili og nenebik maniyek ulug enele hum toho uruk angge famen

¹⁰iren, ’Allah nit wal nenepfag ahun kema wereg?’ uruk eleg. Ap o hik tegma werehon let eneptuk ahun ino yami ruruk eleg.

¹¹Aren mun ane man ane milal neneptukmu nit ap fuki roho wenggel ha reg laheyon men wam mene suwe men ambi reg lahe fug angge famen it arimanowen At fahet wenggel haruk eleg.

¹²Iren ili og nenebik maniyek ulug enele hum toho uruk angge famen enebe hemet til noruk lit onolok ane eneg turukmu yet isaruk lit Allahn enele holmin fug ulug alpal eneptuk.

¹³Saplangge enele urukmu Allah mondabi ineyonen hol isaluhen yet isaruk eleg.

¹⁴Allahn ap arimano enele hol isaruk eleg halug haren hele urukmu nangginoho Allahn hol heyelep? Haren te, ’Anden Allah yet haruk lahi fug,’ irikinon ino fahet hat hele holtuk eleg. Haren uruk lit, ’Alem nubam werehon hal nabin ulug hiyag itikik angge famen At amusun turuken nangno reg lahi.

¹⁵Allahn ap onolok ane turukon fahet hayen peruk lit undama ahe laharukmu oho ap unusuruk eleg,’ irikin.

¹⁶Ayub nare, hat hambilik iya reg lit hele urukmen warukmen mun ane man ane fahet hapelehen ket-ker ane eneg wiliptuk lahen,” ibag.