Read Angguruk Yali AYUB 36 Bible Online

AYUB 36 - Angguruk Yali bible

AYUB 36

¹Elihu inowen nin Ayub hiyag utuk lit,

²”Anden Allah unuk fam nin eke nele iminen hindi apma roho wereg lit hol niyimin.

³O yitmi-yatma werehon famen teko laruk ane fahet aben enele urukmu hol halug noluk atisi ane hiyag hitmin. Hiyag hitmin ane ariyen an wal napfag ahunen mun ane man ane fano haltuk ane seleg atmisi.

⁴Anden un ane imin fug, mun ane man ane fahet nindi pikit toho wenggel haruk latikik nahun holohotma unduhuk lahi.

⁵Allah mondabi ine roho wereg angge famen ap apmayap eneptuk eleg. Mun ane man ane alem obog toho fahet At oluk teg.

⁶Ap onolok ane turukon amusun toho welamuhup fug ulug yet enesug lit ap inilaheg toho werehon ili og eneptuk.

⁷At ele holtuk inap ambol yig isa fug angge ap suwon raja heriyeg hag toho hur amag ulug lehoma imbik laharukmu palimu weregman eneg welamuhup angge famen

⁸iren Allahn nirim perukon turuken ininggik hele ineyon fam pug toho wereg lit enesengseng haruk halug

⁹it enebe hemet til noruk lit siyag ane turuk latuson fahet Allahn inindi anggarap eneptuk.

¹⁰Inindi anggarap eneptuk lit un ke laruk latikibon embeselug Anden komo heneptuk lahiyon hikit toho turuk lamuhup ulug seleg toho hiyag isaruk.

¹¹Hiyag isaruk ane ari holtuk lit At apma welamuhup halug likiya hupmu enebe fano roho inindi enehiyeg toho weregman eneg sabal amuhupteg war amuhup.

¹²Iren holtuk lamuhup fug halug inindi anggat teg elehen inale lahabeg ambeg kuhupteg war amuhup.

¹³Allah enembol yig utukon inindimu onolok haruk ane forohoman eneg wereg. Ininggik hele ineyon fam pug toho wereg halug oho enele hi roho Allah fam let nenebik ma ulug heng turuk eleg.

¹⁴Ininggali ane turukmen eneg kabini angge war atuk.

¹⁵Inilaheg toho werehon arimano alem siyahon unubam werehon onggoken Allahn inindi anggarap eneptuk lit fanowap eneptuk. An nele holukag ulug enesengseng haruk ane onggoken inisanggo hur eneptuk.

¹⁶Ari hag toho har oho asengseng haruk latikinmu Allahn windat haptisireg alem ekeyon ekeyonen hondo hasug laruhu fug ulug koloma humbaharisi. Koloma humbaharisimu hibam wam seiyen keleg teg latisi angge famen

¹⁷ketiya Allahn peruk ane suhan isaruk latikinon fahet unggum pikit haltuk ane roho alem hubam emberisimu hele ineyon fam pug toho wereg hag toho welahen.

¹⁸Ari roho welahen ane fahet holok haruk lit Allah ele ying tuhun tohon! Onggo anggolo og uruhuk halug windat nabuhu puk fug!

¹⁹Nanggengge anggolo werehen siyag am fug teg lahi peruk lahen ano?[11] Hine roho wal haruk lahenma lisag anggolo wilip atukon ariyen oho fano aruhun fug.

²⁰O mondabi hik aruhumu nit o pumbuk obog toho misihim eleg amuhuk li folo-folo horog alep ulug wenggel ha fug.

²¹Siyag ane tihi ha nowen ulug hil wirik toho welaruhun! Siyag ane turukon umbusukag ulug alem angginon eke hag eke hag hubam atisiyon hapeleg am fug!

²²Allah inggik ineyonen alem suwon eneg turuk. Aren ninindi anggarap neneptuk hahon winon eke wereg eleg.

²³Ap san kalem tu lamihin ulug hiyag um teg? Ap san siyag ane tirikin ulug komo ruk teg?

²⁴Aren su ane turukon fahet aben At wel turuk asini yunggultuk hag toho har oho hapeleg am fug angge unuk palimuwap turuk laruhun.

²⁵Aren alem suwon turukmu ap obog tohowen yatman yet haruk,” ibag.

²⁶Ari ibareg Elihu inowen Allah wel turuk lit, ”We tem toho Allah mondabi suwon fahet nit ninindi anggar am fug teg. At weregman eneg mo ilig am wirig am turukmu noenam atuk latfahon fahet nit nenepeleg.

²⁷At inowen ik kinangman lisoho lahabik watug hebeloho osit wambukag ulug kinangma mondotuk.

²⁸Osit ino hina famen lil-lil wamburuk lit ap anggolo werehon unubam pilabik waharuk.

²⁹Hina laruk ane fahet ap san wenggel ha reg? At poholma wereg ambehen ululu sup turuk ane fahet sa indi anggar am teg?

³⁰Allah famen pinel lebeglu ruruk lit pohol atogman atogma selehap turuk. Ik suwon yenggelehon ahongge aben yet hahup tohon ulug hiken hondo reberuk.

³¹Ari obog toho turuk lit Allahn ap o pumbuk wal-wal werehon fet enesug. Fet enesug lit naruk angge eke hag eke hag og isaruk.

³²Inggiken pinel seneg lit tog hag toho pising isarukmu unusik lamisi peruk ambeg laruk.

³³Ululu sup turukmu hol halug Allah indimu inahan turuk lit mun ane man ane siyahon elehap timin ulug waharukon horog aha ulug ap obog toho onoluk atuk.