Read Angguruk Yali AYUB 37 Bible Online

AYUB 37 - Angguruk Yali bible

AYUB 37

¹Ululu sipuk turukmu anden oho hol haruk lit nakolen nindi pong-pong angge ruruk.

²Allah ambilikmuwen ele pararag turukmu hol hemek! Olok atuken ele hum toho uruk lit

³pohol atogman atogma ilabut lebeg til kinang atogma laruk.

⁴Lebeglu tulug At suwonen ele hi roho uruk lit ululu sup turuk. Ululu sipuk tirikim tan pinel yan pinel til laruk.

⁵Allahn ele ululu sup turukmu itano alem suwon aben tuk fug tehon teko laruk. Aren su ane turukon ke roho turuk ulug nit nenepeleg.

⁶Osit helep anggen hahon ubam kinangma wambin uruk, osit humon fam tilihi-teloho pilabik ma ulug hiyag utuk.

⁷Allahn osit pilabik waharukmu ap obog toho iniyabuk wibuk fug tehen olma wereg lit wenggel harukmen ari obog toho Allahn eneg teberuk ulug inindi anggar atuk.

⁸Olomene oho hirag arik lalug ibam wereg.

⁹Ik eleruk filen siyelu wilip atuk. Ik ambut filen homhomowen o sun walug waharuk.

¹⁰Allahn ambilik ahe fu rurukmu o sunen ik yenggelehon helep hag atuk.

¹¹Allahn osit hina elma kilaptuk lit lebeglu lebeg til o kema-kema aliyek ulug hina monde feruk.

¹²Monde ferukmu hina arimano Aren hiyag isaruk ane roho umu fil ahamu fil lalug Aren peruk ane hikit toho turuk lit

¹³misihim kinang ahaluweyap turuk, misihim eke ap unusuruk, misihim eke Allahn indi enesug ane inam amag ulug pilabik waharuk.

¹⁴Ayub nare, anden uruk lahiyon ari hol halug Allahn alem suwon aben tuk fug tehon arimano fano roho kim hamihin.

¹⁵Allahn nangginoho hina arimano ele hiyag isaruk ulug hat holuk? Ke roho hina famen pinel lebeglu ruruk?

¹⁶Nangginoho hina pohol ke laruk ulug haren wenggel hehen ha reg? At mun ane man ane olukon inowen su ane turukon arimano fahet hat hindi anggar am teg ano?

¹⁷Ik eleruk filen siyelu waharuk li o hibi rurukmu hat mo oloken lisag anggolo haruk lit asengseng toho welahen.

¹⁸Ari roho welahenonen Allah men ambiyeg pohol ungga hag toho salehen ha reg? Saltuk lit halog toho wambuk nowen besi ineyon hag amag ulug ineyap tehen ha reg ano?

¹⁹Ayub nare, niren nungge ane Allah ubam ulusa peruk lahenon hiyag nisimin! Nit o hik tegma wereg lit fuki roho wenggel ha fug teg lahe.

²⁰Anden Allah men nenele ulen heng timin ano? Ap san At ubam ele urukon Aren pil isaruk lit tehen anden ubam nele imin fug.

²¹Mo hinan hondo ruruk halug inam atuk eleg. Homhomowen fu ruruk halug hina eleg atukmu mo inam atuk.

²²Ik eleruk filen seleg mondabi fanowon inam atuk lit Allah suwon umbagpag til waharukmu ap enekolen yuk lagmag uruk.

²³At mondabi ine rehon palimu wereg ambeg nit lahuk fug teg lahe. At mun ane man ane fano haltukon inowen alem haloho emberuk lit ap wal tanehen tohon apmayap turuk eleg.

²⁴Ari fahet ap obog tohowen At fahet enekol haruk angge famen ap san inggareg fahet nindi anggat teg nahun welahi perukon arimano Allahn yet isaruk eleg,” ibag.