Read Angguruk Yali AYUB 38 Bible Online

AYUB 38 - Angguruk Yali bible

AYUB 38

¹Siyelu apmane NINIKNI Allahn Ayub fam ele uruk lit,

²”Nungge fahet hindi anggat teg elehen Allahn fuki roho wenggel ha fug angge mun ane man ane turuk ano uruk lahen?

³Ketiya hat aben turuk ane turuk lit hambong se roho nolohotma unduhuk lit kapal hiyaminon tu hebeloho hiyag nitmihin.

⁴Anden kinang wal tiyag sambil ino hat kema welatik inag? Hindimu holuk toho welahen halug hiyag nimin!

⁵Kinang atogman atogma hele fam ap san wirim tibag? Hat mun ane man ane noluk teg lahi peruk lahenonen hiyag nimin!

⁶Kinang ahongge kema pilapfagma ine roho wereg? Helep tuwaliyen kinang apma werehon san imbibag?

⁷Imbibag sambil ino o ket sakan turukmu suhal hutuk teg lit sini yunggultikim Allah otsi poholmonen oho enehiyeg toho enele uruk latfag.

⁸Ik kinang apman sup toho wilip atukmu ap san sok latfag?

⁹Ik saho ahik Anden hina fam hondo reberuk lit hiken hililip tiyag.

¹⁰Anden ik saho ahik fam nele uruk lit, ’Haglabut hum toho watuk lit amumu pisan toho la fug angge we ariya yenggeleg laruhun,’ ulug hili emberuk lit sok laroho kila fiyag.

¹²Ayub nare, hat hebe totman angge ketiya oho haren o sakan tukag ulug hele irikinmu sakan tirisi?

¹³O sakan turukmu seleg fam hele uruk lit, ’Kinang atogman atogma seneg lit yuk isamihinmu siyag ane turuk inap hirako wereg ambehen hik toho wilip amusa,’ ulug hiyag itikin?

¹⁴O unukoho tom altap toho werehon lahuk wambuk teg ke arimano obog toho seleg atuk.

¹⁵Allah eleg peruk inaben o unukoho aben yet nisahup ulug onolok ane hirako turukon embeseruk.

¹⁶Hat ik saho ahik ahum apma fil wambirikinteg ik eleruk wilip atuk ambeg walinggoho yami ririkin?

¹⁷Ap warehon wereg ambeg mondabi hik tegma sok kurukon ino yet harikin?

¹⁸Kinang atogman atogma yat teg ane hat holuk? Holuk halug An hiyag nimin!

¹⁹O hik men seleg men waharuk ambeg hat holuk?

²⁰Hik atuk ambeg men seleg atuk ambeg men hili-hilimu haloho embehen ha reg? Haren hik men seleg men unubam, ’Wahep ambeg wal toho aliyek!’ ulug hiyag isa reg lahen?

²¹An wal tilmu indag atik iyag nahun welahireg obog toho aruma noluk teg peruk lahen?

²²Osit helep anggen hahon foroho lahi ambeg pen ha larikin?

²³Osit aru alem angginon ap unubam emberuk lit pilaptukon fahet foroho lahi. Tog aptuk sambil ap seliyon siyag amag ulug wilibuhuken wep toho emberikik.

²⁴Mo lahik waharuk ambeg hat holuk? Homhomo yali filen waharukon ino wilip atuk ambeg harikin?

²⁵Osit hum toho wambik waharuk lamag ulug ap san sul teberuk? Pinel men ululu men laruk ke san haloho emberuk?

²⁶Lekma ap eleg ambeg ap san osit pilabik waharuk?

²⁷Kinang lilog teg ambeg ap san ik hililtukmu hoholangge si roho wilip atuk?

²⁸Osit ikni endetfahon wereg ano? Hibilil ap san endetuk?

²⁹Osit helep anggen hahon isinga wereg? Hibilil lekma werehon sa famen wereg?

³⁰Ap san ik famen helebap turuk? San ik saho ahik il arikap turuk?

³¹Suhal nikema iraroho werehon enemu-enemu am nowen ulug haren mangno roho het enebehen ha reg? Enemu-enemu welamag ulug lol enebehen ha reg?

³²Suhal winon wamburukmu nin winon laharuk li haren haloho embehen ha reg lahen? It laruk ke haren hondog eneptuk lahen?

³³Poholma wereg anggeyen turuk lamuhup ulug kong toho imbibahon hat holuk? Poholma wereg angge fahet kong toho imbibahon aru hikit toho mun angge man angge kinangma werehonen oho turuk lamag ulug haren tehen ha reg?

³⁴Haren hina fam hele uruk lit, ’Osit hum toho og nirik ma!’ ulug mingming tehen ha reg?

³⁵Haren lebeglu fam, ’Lebeg tin!’ ulug hiyag utukmu aren, ’Nikni, holihi,’ ulug lebeg turuk?

³⁶Suwe ibis ino san hiyag utukmu ik Nil firuhu ulug tam ele hiyag isaruk.[12] Suwe ayam san olukap turukmu osit namisi ulug ele uruk?

³⁷Ap sa indi anggat teg lit hina winahuk teg? San hina famen ik hililoho wiliptuk?

³⁸Ik inowen kinang ul hahon nikema topno atlug sabelep atuk.