Read Angguruk Yali AYUB 39 Bible Online

AYUB 39 - Angguruk Yali bible

AYUB 39

¹Olomene ur elma ei wiroho wereg lit pak sap tegma haren pak sil isa waharuk lahen? Sil isa waharuk lahenma unumalikisi war isarukmu enehum ouk toho naruk?

³Suwe umalik suburu obok ulug Allah fam enele ya nga urukmu iniknisi la wam turuk lit naruk angge yami ruruk halug ap san og isaruk?

⁴Wam kambing tom fam werehonen unumalik endetuk li hat holuk? Wam rusa farema werehon ekeyen umalik indag tarukmu yet harikin?

⁵Unumalik fet talugmen pikalem nowen larukmu indag taruk peruk lahen?

⁶Noenam welatug enembol simbuk toho wereg lit unumalik endetuk?

⁷Unumalikisi arimano su reg lit unuwag wirik toho farema lalug inisingasi enembeg suhuloho waharuk eleg.

⁸Wam keledai farema lawag ulug san kumbi ho ribisibag?

⁹Anden ohimu yug toho welamag ulug imbisiyag. Saho ahik yenggelehon iraham welamag ulug yanggaloho imbisik liyag.

¹⁰O pumbukmu ap enele anggolo uruk ambeg lul fug ulug selma eneg weregma aben yabuk wit numag ulug mingming eneptuk eleg.

¹¹Inggilangge nul ulug tom walinggoho yami ril laruk.

¹²Wam sapi farema werehonen hat hiyabuk wit hum teg? Hubanggo haren o wir enesug lahen ambeg nohoruk?

¹³Yabuk fahet kinang habul numag ulug kumbi ililoho lisilug lahen ha reg?

¹⁴At ine anggolo wereg peruk lit yabuk wit numag ulug mingming tuk teg lahen?

¹⁵Roti anggen kong toho werehon walug ahap waruk ambeg imbik la reg peruk lahen?

¹⁶Huhubiyen inggik ahiyeg toho lam turuk angge famen suwe pibalu hag toho pali ke laruk eleg.

¹⁷Anggen kinangma ondoho felug walinggig lam fug angge embeselug larukmu kinangen inahanap turuk.

¹⁸Aben ano wamen ano unuyuhen sobir isa nowen ulug wenggel haruk eleg.

¹⁹An numalikisi fug peruk lit fano roho fet enesug eleg. Umalikisi siyag atuk halug nungge fahet lisag toho endetikik ulug wenggel haruk eleg.

²⁰Anden at indi sohuwa fisiyagma indi anggat teg eleg angge famen

²¹pupu angge ap kuda fam laruk inap pisan isalug laruk lit inda yag eneptuk.

²²Ayub nare, haren wam kuda ineyap turuk lit oruk yaron anduhunmu wilibihon arimano og itikin?

²³Heren puluwe hag toho hik tombo lahamihin ulug hiyag utuk lahen? At ele nga urukmu ap obog toho enekol haruk.

²⁴Tog aptuk ambeg lamin ulug tonggoma uyug seyap turuk lit wamen sehene paltuk hag toho ine roho turuk.

²⁵Nungge-nungge fahet akol eleg toho wereg lit tog elman akolen suhuloho waharuk eleg.

²⁶Ap kuda fam laharukonen minggin tog lilibug turuk lit karog men fit men umbagpag til laruk.

²⁷Wam kuda ino pupu angge larukmu uyug aplohok ululu ele hag toho uruk. Tog abul ulug waruk ele tung urukmu hol halug in am fug angge laruk.

²⁸Waruk ele hol-hol laruk lit aren oho ele hi roho uruk. Yatman amben somug harukmu tog aptukon amben ambiyangma laharuk. Sehen seneg inap onowesiyen milal eneptikim enele ngik-ngog urukon aren holtuk.

²⁹Suwe kut lam-lam laruk ane haren milaltuk lahen? Ik ambut fil lamin ulug aherabul wiriloho laruk.

³⁰Suwe tunguni haren hiyag utukmu ei tom ayegma wituk?

³¹Tom ayeg ili reg ambeg helep unggulmu ibam wit taruk.

³²Ibam wereg lit naruk angge wat tamin ulug ilen eneg walinggoho yami ruruk lit wereg.

³³Tohen unusurukmu war atukon weregma namin ulug laruk. Umaliken oho pak mep lup-lup naruk.

³⁴Ayub nare, An mondabi nine roho welahiyon nubam alem embemin peruk lahen? An men suwahal imin peruk lahen ano, nakolen imin fug peruk lahen ano?” ulug hiyag itfag.

³⁶Hiyag itfagma Ayuben NINIKNI Allah fam ele uruk lit,

³⁷”Nikni, an nebe toronen nungge ane hebeloho hiyag hitmin. Nele uk fug teg lahi.

³⁸Fahe nele anggolo ihi angge re nin eke imin fug,” ulug hiyag itfag.