Read Angguruk Yali AYUB 4 Bible Online

AYUB 4 - Angguruk Yali bible

AYUB 4

¹Ari ibagma Elifas inowen ele hiyag utuk lit,

²”Ayub nare, anden hubam nele iminon holmihin ano? Nele eleg angge welatikik angge famen ketiya nele imin ulug wenggelihi ane pilabuk fug teg lahi.

³Haren ap anggolo hele hiyag isaruk lit inine elehon inineyap eneptuk latikin.

⁴Ap mako wambuk hag toho welatuson inindi enehiyehap eneptuk lit salog-malog angge roho wat tarukon ininggik lisoho unduhuk feseruk latikin angge famen

⁵ketiya hat hinggareg hubam atisi ane fahet yuk lagmag uruk lit fano aruhuk fug peruk lahen.

⁶Allah fahet hakol toho wereg lit fano ane eneg turuk latikin angge re Allahn fanowap nabuhu ulug hindi se roho welahen ha reg.

⁷Ap misihen siyag ane tuk fugmen ari roho siyag am fug teg ulug wenggel haruk lamin. Ap fano ane eneg turuk famen ari roho war atisi urukon eke holtikin?

⁸Ap san alem siyahon yatuk halug anggen oho siyahon tahan tarukmu yet isaruk latikik.

⁹Allahn it unubam olok haruk lit ambilik ahe fu isarukmu mondabi longgo uruk.

¹⁰It enele onolok toho uruk lit olomeneyen hilak-hilak ap mug isaruk hag toho turukmu Allahn eneyeg upuk-upuk hik isaruk.

¹¹Olomene pak waroho na fug angge wereg lit war atukmu umalik linggik-longgo uruk hag toho onolok ane turuk inap oho ari hag toho turuk.”

¹²”Misihim sambil ap ekeyen ele orog-orog hiyag nutukmu nisanggo fam holtikik.

¹³Hubanggo noho napeleg toho nohorukmen nei siyag toho waruk lit

¹⁴nakolen nuwag elek-elek angge ruruk latikik.

¹⁵Homhomo hag toho nolohotma fu rurukmu namenderuk ambo misig-misig angge ririsi.

¹⁶Niraham ahime pingga ruruk latisi angge famen ebe fuki roho yet harikik fug. Ele orog-orog urukmu hol harikikon te tu:

¹⁷’Allah olohotman siyag ane turuk elehon wereg ano? Wal tibag ahun inowen ap misig fano ane eneg turukon wereg puk teg ano?

¹⁸Notsi malaikat unubabut fano wereg ulug wenggel isaruk eleg. Iren oho siyag ane turukmu yet isaruk.

¹⁹Ap kinang fam lal enepfahon fahet fano wereg peruk ulug wenggel haruk lahen? Kinang alinlan fam werehap enepfahon arimano leng himbit isarukmu war atuk hag toho war atuk.

²⁰Ap misig likiya oluk wereg angge famen unukoho aben ha fugmen mondabi war atuk.

²¹Fano welahi ulug turukmen inindi wenggel ha fug angge war atuk.’ ”