Read Angguruk Yali AYUB 40 Bible Online

AYUB 40 - Angguruk Yali bible

AYUB 40

¹Hiyag itfagma siyelu apmane NINIKNI Allahn Ayub fam ele uruk lit,

²”Hat aben turuk ane turuk lit hambong se roho nolohotma unduhuk lit kapal hiyaminon tu hebeloho hiyag nitmihin:

³Haren alem Allah fam eneg wereg, an nubam eleg uruk lahen? Allahn mun ane man ane fano roho haltuk eleg peruk lahen?

⁴An ninggik nine reg lahi hag toho hat hinggik oho hine reg? An nele ululu sipuk turuk hag toho haren eke ari roho uruk lahen?

⁵Hat mondabi palimu welahenon, ketiya haliliyangge lahapmihinteg hebe umbagpag toho unduhuk lamin!

⁶Ininggareg enewelwel taruk inap yet isamihinteg hat holok peruk ane ik osohowon hag toho enebene hilil isaruk lit apmayap enepmihin.

⁷Enebe hemet toho turuk inap hondo isamihinmu apma amusa. Siyag ane turuk inap ketiya wereg ambeg huyuhen sobir isamihin.

⁸It arimano kinangma sal enepmihin. Ap warehon wereg ambeg pilap enepmihin.

⁹Ihi ane obog toho timihin halug hat hine roho palimu ahen ulug wel haptuk latmin.

¹⁰Wam kuda humon-hamon ik Nil ikma werehon unuk Behemot ino wenggel hamihin. Anden hat wal haptik iyag hag toho ar oho wal tiyag. Inggilangge wam sapiyen naruk hag toho aren oho naruk angge famen

¹¹at ebe ine anggolo regma umanggen unu fam hunduhukon oho ine reg.

¹²At ahaye e arikon hag tegma andeng ine roho pung teg.

¹³Ubahar uwag tembaga ine hag toho wereg. Uyug uwag besi arikon hag teg.

¹⁴Anden wal eneptik iyag angge enesehelimu we at eneg ine roho wereg. We An wal tiyag nahunen eneg apmayap tihi ha reg.

¹⁵Wam pak mene enehiyeg toho punu ke yunggultuk ambeg inggilangge werehon at na laruk.

¹⁶Sabelep lum turuk ambeg hele alohon sahuk angge apma longgop sehelimu hirako yinggig lit wereg.

¹⁷Alog aheleyen mapmu regma e ik ayegma werehonen walinggoho kilabeg.

¹⁸Ik fituk halug akolen uwag elek turuk eleg. Ik ele le ke kuruk halug oho indi yuwag toho yinggig.

¹⁹Ap san il hupni feselug kumbi ililmin ulug usunggat fam ambiyangmangge wabuk teg?

²⁰Manu humon unuk Lewiatan ino ikan watuk angge fam lisehen ha reg? Ambilikanggen hele fam pug tehen ha reg?

²¹Ambiyangma kumbi ililehen ha reg? Iyahundema ayeg angge fam hak tehen ha reg?

²²Lol napmihin ulug ele anggolo roho hubam heng habuhu ano? Hindi niyimin ulug ele fano roho hubam uhu ano?

²³Hat hamingmingangge mondabi welaruhuk ulug sali hubam umbuhu ano?

²⁴Naholani inindi enehiyehap enebukag ulug suwe hag toho kumbi ililoho endetuk lahen ha reg?

²⁵Ikan watuk inaben Lewiatan ino ap winon fam ayeg wabuk teg? Senggeltug uang onggo hila reg?

²⁶Haren fit fam ahapma hak hehen ha reg? Sehe fam unggul uwagma hik hehen hama ahako folok tuk teg?

²⁷Misihim eneg ki harukmen yik hubam sahali uhuwon ino hapeleg am fug angge wereg lit nin eke sen hahun fug.

²⁸Ap san Lewiatan ino watmin ulug iraham laruk angge famen ebe yet halug akolen kinangma ying atuk.