Read Angguruk Yali AYUB 41 Bible Online

AYUB 41 - Angguruk Yali bible

AYUB 41

¹Enembong se reg inaben oho nunusuhu rohon ulug elel ha fug teg. Ap misig oho iraham la fug teg.

²San watmin ulug iraham larukmen at hebeloho senggeluhu fug? Ap kinangma werehon misihen oho Lewiatan ino wabuk fug teg.

³Lewiatan ino ubam wilibig angge men ahap fano reg lit ine roho turuk ane men fahet hiyag hitmin.

⁴Ahap sing tog aptuk lit wan turukon hag toho arik anggolo rehen ap misihen oho nonggoloho hik isa fug teg. Tog fam oho ahapma kuk fug teg.

⁵Ayeg umaho lit olok anggolowen ap misihen oho ambilik fungguloho kim ha fug teg.

⁶Ahap ambol uwag onggok werehon sing hag toho arik teg.

⁷Sing il hik tegma homhomo kuruk eleg hag toho at ahap mondabi seleben teg.

⁸Sing il misig loloho hik isa fug teg hag toho at ambolma werehon oho tararag tuk fug teg.

⁹Lewiatan inowen hasig turukmu umbagpahen seleg atuk. Ilanggen mo ket lahik waharuk lit il huluwon yatuk hag teg.

¹⁰Ambilikmuwen indok ambulpul wilip atuk lit asing singnag paltug kema-kema laruk.

¹¹Ambiyang ele keyen hubu seni ahe laharuk hag toho wilip atuk.

¹²Ambilik ahe indok hag teg lit e olukon oho na reg.

¹³Anduhun mondabi ine rehen ap obog tohowen at yet halug enekolen linggik-longgo uruk.

¹⁴Unu ubam topno reg lit yuk turuk eleg.

¹⁵Indi helep simbuk hag toho ine anggolo reg lit lagmag uruk eleg.

¹⁶At in atukmu ap enembong se roho turuk inap oho enekolen enehime eleg atuk.

¹⁷Karog fam mutukmu ayeg watuk. Minggin tog fit fam watukmu oho kuk fug teg.

¹⁸Besi ineyon fahet hoholangge wiyihon hag peruk. Tembaga arikon fahet e fuburon peruk.

¹⁹Tog fam waroho yanggaluk fug teg. Helep fam ubag turukmu inggilangge hag toho ubam sa uruk.

²⁰E fam watukon hoholangge lilohon fam fetne turukmu hag toho ouk haruk eleg. Fit ebene hik harukmu aren inda yag eneptuk.

²¹Ahum sap ke helep atog nga nig nga nog uruk hag teg lit sabelepma lisil laruk ke ubale haleg.

²²Ik ahummu kurukmu ik osohoma hulug-hulug angge ruruk hag toho turuk.

²³Ik ahum pali ke larukmu ombolim ubale ik haglabut watuk lit il yanggo ruruk hag toho yanggo ruruk.

²⁴Kinangma werehon at hag angge misig oho wereg eleg. Anden wal eneptik iyag angge enesehelimu we at eneg mun angge man angge fahet akol eleg toho wereg.

²⁵Mondabi palimu werehon fahet aren obog toho toron eneg peruk. Lebe ruruk angge farema werehon unubahet at onowe suwon wereg,” ulug hiyag itfag.