Read Angguruk Yali AYUB 42 Bible Online

AYUB 42 - Angguruk Yali bible

AYUB 42

¹Hiyag itfagma Ayub inowen NINIKNI Allah fam ele uruk lit,

²”NIKNI Allah, Hat mondabi hine reg lit timin peruk lahen ane obog toho teko laruk ulug an noluk toho welahi.

³Haren an nubam hele uruk lit, ’Nungge fahet haren te Allahn fuki roho wenggel ha fug angge mun ane man ane turuk ano ulug wenggel haruk lahen? Hindi anggat teg elehen wenggel haruk lahen,’ ulug hiyag nerehen. Anden ap inindimu kuk fug teg ane wenggel haruk lahi. Alem anden wenggel ha fug tohon fahet nele uruk lahi.

⁴Haren te, ’An nele urukmu holeg lit Anden kapal hiyarukon hebeloho hiyag nitmihin,’ ulug nubam ehen.

⁵Tam Haren turuk ane fahet aben urukmu eneg holtuk latikik. Ketiya re an nilen kim hiyaruk lahi.

⁶Ari fahet an nele uwag oko hilaruk lit nambiken irikik ulug ulmu heriyeg lahi,” ulug hiyag itfag.

⁷NINIKNI Allahn Ayub fam ele obog toho hiyag itfareg Elifas fam uruk lit, ”An namingmingangge Ayub inowen An nubahet ele tem toho uruk latisi hag toho hat hori piren itano menen oho irikip fugmu Anden hit hunubahet nolok haruk lahi.

⁸Ari fahet ketiya wam sapi abon sabiren men domba abon sabiren men walug Ayub ambeg lalihipteg Allahn fanowap nenepmisi ulug waroho yaltihip. Yaltihipmu Ayuben hit hunubahet sembahyang imisiyon eneg Anden hol hamin. An namingmingangge Ayuben An nubahet ele tem toho uruk latisi hag toho hiren oho irikip fugmu alem angginon hunubam embele angge famen hininggaliyap henebuhuk fug,” ulug hiyag itfag.

⁹Allahn hiyag itfag ane hikit toho Elifas, Bildad, Zofar menen tibagma Ayuben sembahyang ibahon NINIKNI Allahn hol hibag.

¹⁰Ayuben ori hinahan itano fahet sembahyang ibagma NINIKNI Allahn Ayub anggengge siyahap tibahon arimano fahet ubalma og utuk lit nin piren-piren sebe roho og itfag.

¹¹Og itfagma owesi otsi ap angge hiyap angge men ori atamon men at ambeg watfagma seni esetfareg ambiyeg naruk latfag. Suburu naruk lit NINIKNI Allahn hat siyahap haptisimu asengseng toho welatikin ulug enele uruk lit indi seyap tibareg it enebe wal taneg arimanowen uang men sohomangge umbagpag turuk angge emas fam wirihon men og itfag.

¹²Atam Ayub uwan siyahap tuk fug li NINIKNI Allahn we tot toho og utuk latfag angge famen fobik nin fanowap turuk lit anggolo roho og itfahon ambohom teng-teng angge welatfag. Wam domba teng obog sehelet obog 14.000, wam unta teng-teng angge 6.000, wam sapi 2.000, wam keledai 1.000 og itfag.

¹³Og itfagma ap umalik sabiren, hilani umalik hinahan indag enepfag.

¹⁴Indag enepfareg hilani malik atamon unuk te Yemima[13] suwalfag, pulmuwon te Kezia[14] suwalfag, fobikon te Kerenhapukh[15] suwalfag.

¹⁵Hilani malik arimano su atfareg tuhum anggolo regma o winama it hahon eke welatfag fug. Ayuben hit ngi amuhup ulug anggengge amlohoki wal taneg hiyag isaruk lit aholani oho hiyag isibag.

¹⁶Hiyag isibareg Ayub oluk weregman eneg mo ilig am wirig am turukmu teng fuwaben 140 atfag. Ari roho wereg lit umbusagsiyen ondohowon oho ilen yet isibag.

¹⁷Mondabi sabal atfareg fano war atmin pibareg war atfag.