Read Angguruk Yali AYUB 5 Bible Online

AYUB 5 - Angguruk Yali bible

AYUB 5

¹”Ayub nare, hele ine roho imihinmu san holmisi? Allah ot malaikat sa ubam let nabik ma ulug heng timin peruk lahen?

²Hindi anggin toho wereg lit holok ane eneg wenggel harukmen eneg war aruhun tohon. Inindi anggat teg eleg inaben turuk hag toho turuk laruhun fug.

³Indam ap indi anggat teg elehon eke weregma yet harikik. Numanggen kinangma yaho lahi ulug turukmen ibam halog toho eleg atisi.

⁴Eleg atisimu at umalikisi ap misihen oho let eneptuk eleg. Unggum kong turuk ambehen oho inibil atuk eleg.

⁵It enesuburu yahal taruk angge famen ap winon suburu obok toho werehonen naruk. Suburu hele alohonen hililip turuk ambeg arimano oho ap winonen yahal talug naruk. Mun angge man angge niren eneg foroho lala peruk inaben it enengge oho hilila peruk.

⁶Alem siyahon ap unubam atuk ane kinang apman lahik waharuk eleg.

⁷Indok ambulpul famen asing singnag paltug laharuk hag toho ap ininggareg famen alem angginon unubamap taruk.”

⁸”Alem hat hubam atisiyon nubam alep halug an nubam wereg ane fahet seleg toho hiyag nimin ulug Allah fam heng tele.

⁹Aren alem suwon aben tuk fug tehon anggolo winahuk fug toho turukmu niren ke roho turuk ulug ninindi nonghong uruk.

¹⁰Aren osit pilabik waharukmu kinang owe ruruk.

¹¹Apma roho werehon Aren palimuwap eneptuk. Uba yatukon inindi enehiyehap eneptuk.

¹²Inindi anggat toho wereg inaben nonolok ane tul peruk ane Allahn eleha feseruk. Iren onolok toho wenggel haruk ane ino Allahn hebeloho ininggareg unubam emberuk.

¹⁴Unukoho famen it inil hik atukmu hubanggo hag toho fatil laruk.

¹⁵Ap enengge elehon aben unusurukmu Allahn windat eneptuk. Ap inine elehon inine roho wereg inap ininggikmuwen taluk eneptuk.

¹⁶Inilmu eleg toho werehon fano amuhup ulug inindi enehiyehap eneptuk. Onolok ane turuk inaben enele siyahon eneg urukmu enembilik lare feseruk.

¹⁷Allahn unubabut hal eneptuk inap enehiyeg toho welamag! At mondabi ineyonen hat hal amag ulug hubam tirisi ane fahet hat hindi siyag am fug.

¹⁸Allahn ouk og isalug nin hihir eneptuk. Inggiken unusulug nin fanowap eneptuk.

¹⁹Alem eke hag eke hag hubam atukmu Allahn windat haptuk laruhu.

²⁰Suburu obok laharukmu oboken war aruhu ulug let haptuk laruhu. Tog limu oho aben huwabuhup ulug hibil atuk laruhu.

²¹Aben habug urukmu hahap mapmu haptuk laruhu. Alem mondabi angginon hubam arik waharukmu hakol toho welaruhun fug.

²²Suburu obok men mun ane man ane alem siyahon fahet inda yatuk laruhun. Wam eli men olomene men fahet hakol haruk laruhun fug.

²³Hat hiyabukmu helep eleg laruhu. Olomene men pisanggo menen huwabuhup fug.

²⁴Hibam yuwag toho wereg lit hambohom winag isarukmu misig oho longgo uk fug angge fano roho welamuhup.

²⁵Hat humbusagsi hoholangge hag toho mondegma winag isa fug teg lamuhup.

²⁶Sak amusun toho welatug hulu atukmu tahantuk hag toho hat amusun toho welatug sabal aruhunteg war aruhun.

²⁷Ayub nare, alem ihiyon aru nit obog tohowen fuki roho kim harukukteg we tem ulug nonoluk atisi. Ari fahet an nele hol hamihinteg haren oho we tem peruk laruhun!” ulug hiyag itfag.