Read Angguruk Yali AYUB 6 Bible Online

AYUB 6 - Angguruk Yali bible

AYUB 6

¹Hiyag itfagma Ayub inowen hebeloho ele uruk lit,

²”An nasengseng toho wereg lit nindi siyag toho wenggel haruk lahi ane ari aben anggin wirim turuk angge fam embelug wirim helep halug

³anggin anggolowen ik yinggi saho ahik ayegma werehon men wirim teg lalep fug. Ari fahet an nele ap sohuwonen ele uruk hag toho imin.

⁴At mondabi ine werehonen tog hirahandog nuwatisimu wik ino an nundama kirisi. Ap seliyonen o pumbuk eke waling enesug hag toho Allahn an nakolap naptukmen eneg wereg.

⁵Wam suburumu wereg angge famen oboken ele nga ruruk ano? Pak ekeyen e anggen naruk liren ele ngu ruruk ano?

⁶Ap san suburu inggila saho foluk fug angge ahiyeg toho naruk? Suwe anggen yanggowon famen unduk siyag turukmu ap san fano peruk?

⁷Naruk angge arimano fahet me nape naptuken anden sen haruk lahi fug.

⁸Anden Allah fam heng turuk lahiyon nungge fahet holtuk eleg? An fanowap naplep ulug nindi ouk toho wenggel haruk lahiyon nungge fahet an nubam turuk eleg?

⁹Allahn an arap toho nuwatmin ulug folo-folo kong toho embelep fano. Hiyap ekeyen sum obog toho yihik fihi ulug hekel atog paltuk hag toho an war amag ulug pal naplep.

¹⁰At ebe usa fulu rehonen ele hiyag nutuk latisi ane anden ap iniline awiya waruk latikik fug. Ari fahet nindi se roho wereg lit ouk mondabi angginon nubam atep halug oho nahiyehen yunggultuk lale.

¹¹An fano aruhuk ulug nangno ruruk laruhuken san nineyap nabuhu? Fano ane nubam aruhu fugmu ke roho nindi imbik wamburuk laruhuk?

¹²An nine helep sili ineyon hag toho welahi ano? An nebe ine angge tembaga fam wirig lahi ano?

¹³An ninggarehen fanowap ta fug teg lahi. An fanowap naptukon numbahalug yatma wereg.

¹⁴Ap san Allah mondabi ineyon fahet akol haruk elehon inowen are asengseng toho weregma oho indi haruk eleg.

¹⁵Hit an nori welahep angge famen ik fanowon famen firig atuk hag toho wereg lit an numbaharikip.

¹⁶Ik masag walug il kul tehon hag toho hit welahep.

¹⁷O hibi fam ik firitog atukon hag toho hiren an numbaharuk latikip.

¹⁸Aben ik nul ulug yami ril ik firig teg ahik som ilig atukmen ik elehen war atuk.

¹⁹Aben angge ayeg waroho hilarukon o Tema inap men Syeba inap men lekma laruk lit ik nul peruk ambeg lalug yet harukmen ik elehen ininggali haruk.

²¹Ari hag toho hiren an nubam turuk lahep. Hiren an siyag toho weregma yet niyaruk lit henekolen an numbaharuk lahep.

²²An nungge-nungge og nemek ulug heng heneptikik ano? An windat napmisiyen ap eke inggilangge og itlihip ulug hiyag hisarikik ano?

²³Ap onolokon ininggikmuwen tel naplihip ulug heng heneptikik ano? Ap inindi enesug elehon ininggiken helmag nasug angge windat nabiyek ulug hiyag hisarikik ano?

²⁴An un ke larikik halug hiren fag toho hiyag nemek! Hiren henele fano hiyag nitlihip halug anden hebeloho nele imin fug.

²⁵Aben tem ane urukon fahet an nindi siyag atuk eleg angge famen hiren nungge fahet henele uruk waruk lit an huluwap naptuk lahep?

²⁶An nele siyag toho uruk lahiyon fahet hiren at ubabut haltul peruk lahep ano? An nindi anggin toho uruk lahi ane fahet homhomowen fu ruruk hag toho uruk peruk lahep ano?

²⁷Onori ayeg waroho ap og isaruk inap hag toho welahep. Malik suwarehon sa ngi atmisi ulug unubam enehangge hik turuk inap hag toho hit welahep.

²⁸Ketiya heneluke yig nemek! Anden hit henelukeman nele si ane imin fug.

²⁹Anden siyag ane tirikik fug. Hiren an nubam hare ane tuhup tohon hinindi hebel amek!

³⁰Anden nele si ane uruk lahi ano? Fanowon tu, siyahon tu ulug anden haloho umbuk teg lahi,” ibag.