Read Angguruk Yali AYUB 7 Bible Online

AYUB 7 - Angguruk Yali bible

AYUB 7

¹Ayuben nin ele uruk lit, ”Ap kinangmon aben ininggik lisoho emberukon hag toho wereg lit iniyabuk lisag toho warukmen eneg enebe sabal atuk.

²Ap amingminganggeyen yabuk turuk lit sakoma kel taruk li folo horog amag ulug indimu sehet toho wenggel haruk. Mingming nabehekon inowen onggo og nitmisiyen folo-folo o hup amag ulug nangno ruruk.

³Ari hag toho an oho hup eke waharukon fam eke waharukon fam asengseng toho welahi. Pikalem inam am mum am turukmen anden saplangge yabuk wituk laruhuken nubam imbibag.

⁴O hupmu nohik kimin halug an in atminon folo-folo horog alep peruk lahi angge famen hubanggo an nindi angginen yat toho wenggel harukmen eneg folo-folo sakan turuk eleg.

⁵An nebe yowil abuhen sobo nasugmu sobon anggenen keleg teg. Yowil abug oko wamburukmu mulen wilip atuk.

⁶Likiya hupmu san let napmisi ulug anden saplangge wenggel harukmen eneg welahi. Hiyaben sum obog toho yihik ferukmu hekel atog folo horog atuk hag toho an war aruhukon oho horog atuk.

⁷Nikni Allah, an noluk welahi ane enembilik ahe fu roho longgo uruk hag toho wereg ulug wenggel himin. An nin hebeloho fano aruhuk ane nilen yet hahuk fug.

⁸We tot welaruhukmu ap an ketiya yet niyarukon arimanowen yet niyahup fug. Haren yami naptuk lit an nibil yet harukmen an eleg laruhuk.

⁹Hina poholman longgo uruk hag toho ap warehon wereg ambeg wamburukon arimano nin hebeloho lahik waharuk eleg.

¹⁰Ap eke war atuk halug nin suhuloho ibam waharuk eleg. At yet haruk latusonen at fahet wenggel haruk eleg.

¹¹Ari fahet nele imin pihi ane pilapmin fug. An nindi anggin haruk lahi ane wilipmin.

¹²Nikni Allah, nungge fahet Haren hun ino kilabiyek ulug ap an walinggoho in eneptuk lahen? Haren Ayub ino manu humon ano, ik suwon haglabut ano wereg peruk lahen?

¹³An heniyema yinggig lit nohorukmu nindi se alep ulug wenggel haruk latikik angge famen.

¹⁴Haren nei siyag toho wawag ulug an nakolap naptuk latikin.

¹⁵An asengseng toho welahi ane eleg aruhuwen aben nanggolop pete roho sen naplug pinggi nuwatep fano peruk lahi.

¹⁶An amusun toho welaruhuk ane nirim. Likiya hupmu saplangge welahi ane eleg amag ulug an numbahin!

¹⁷Nungge fahet nit ap kinangmon toron welahe angge famen Haren su amag ulug holohotma nunumbaharuk lahen?

¹⁸Nungge fahet Haren likiya hupmu pen nisa waharuk lit unubabut ke roho wereg ulug wal nisaruk lahen?

¹⁹Nosambil Haren an yet niyaruk lahen ane embeselug handuhun yig nuruhun? Il misig eneg Haren an numbahalen fano peruk lahi.

²⁰Hat nit ap kinangmon fet nenesug lahenon, an napelehen siyag ane turuk lit Hat siyahap haptikik ano? Haren te hun ariyen An nindi angginap naptukon fahet nirim ulug an nibil tog pising turuk lahen ano?

²¹Anden siyag ane turuk lahiyon nungge fahet Haren hambolmayap turuk lahen fug? An tot welaruhukteg war aruhukmu kinangma sal nabuhup. Sal nabuhupmu Haren yami naptukmen an eleg laruhuk,” ibag.