Read Angguruk Yali AYUB 8 Bible Online

AYUB 8 - Angguruk Yali bible

AYUB 8

¹Ayuben ele ibagma o Suah ahun Bildad inowen hebeloho hiyag utuk lit,

²”Siyelu ine roho fu ruruk hag toho haren hele urukmen warukmen eneg welahen. Noenam welaruhunteg hele ari hag toho uruk lahenon umbusuhun?

³Haren te Allahn pikiron hareyap turuk peruk lahen ano? Fanowon tu, siyahon tu ulug imbibag ane At mondabi ineyonen apmayap turuk ulug wenggel haruk lahen ano?

⁴Hat humalikisiyen Allah olohotman siyag ane turusa ane ari fahet Aren alem angginon unubam emberisi.

⁵Ari fahet haren Allah yami ruruk lit hindi niyimin ulug At mondabi ineyon ino fam heng timihin.

⁶Hat hubabut fano reg lit pikir ane eneg turuk lahen halug Allah in aruhureg hat hebeloho fanowap haptuk lit hibam suhuloho og huruhu.

⁷Hat indam we tot fano roho welatikin ane men fobik Allahn fanowap habuhumu mondabi fano roho welaruhun ane men wirim teg laruhu fug.

⁸Nunumbasiyen milal taruk latfag ane fahet hindi wenggel haruk lamin!

⁹Nit we ket eneg indag atukukon ap enehime pingga rurukon folo-folo teng uruk hag toho turuk lahe, mun ane man ane nenepeleg.

¹⁰Nunumbasiyen milal taruk lit inindimu foroho latfag ane holeg lit hat hindi anggar aruhu.

¹¹Iren enele uruk lit, ’Ik wereg ambehen eneg hame wilip atuk, kinang lilohon fam olonggop su am fug teg.

¹²Ik eleg halug olonggop asimit we ket wilip atukmu kong turuk li uwanma ilim atuk.

¹³Allah enembol yig utuk lit At fahet enepeleg atukon arimano ari hag toho wereg. Iren fano ane nunubam aruhu ulug wenggel haruk ane halo uruk.

¹⁴Nit siyag amuhuk fug ulug inindi yuwag toho peruk ane hep-hep ahalonggok pundu rurukon hag toho wereg.

¹⁵Iren ahalonggok ino fam timi roho in atukmen ine elehen kong toho laruk.

¹⁶Allah fam wenggel haruk eleg inap arimano yatuk angge mowen yet harukmu fano wilibihon hag toho weregma unggum yaluk-faluk isil laruk lit yabuk obog toho hondo ruruk.

¹⁷Yatuk ambeg helep pun weregma umanggen helep honggolegma wamburuk angge famen

¹⁸yaho angge arimano ap ekeyen heneko hik isahumu at yet haruk latusonen awiya waruk lit, ’At yet harukuk fug,’ uruk lamuhup.

¹⁹Ari hag toho Allah fam wenggel haruk eleg ahun ekeyen fano welahi perukmen longgo urukmu at ubalma yatuk angge winon kinangman wilip aruhu.

²⁰Allahn ap unubabut fanowon miyaloho hik isaruk eleg. Siyag ane turukon ininggik seneko inineyap eneptuk eleg.

²¹Aren hebeloho hahiyehap habuhumu hat inda yatuk lit hele hine roho sini yunggultuk laruhun.

²²Hat fahet ninirim perukon arimano ininggali haruk lamuhup. It Allah enembol yig utukon inibam siyag aruhu,” ulug hiyag itfag.