Read Angguruk Yali AYUB 9 Bible Online

AYUB 9 - Angguruk Yali bible

AYUB 9

¹Hiyag itfagma Ayuben ele uruk lit,

²”Haren ehenon tem toho ehen ulug an noluk aha. Ap ekeyen Allah men suwahal uruk lit siyag ane tirikik fug uk teg ano?

³Ap san Allah men suwahal imin puhu halug Allahn alem teng obog sehelet obog fahet kapal harukmen eneg misig oho hebeloho uk fug teg laruhu.

⁴Allah indi anggat tehon ine reg lit weregma At ele ying timin perukon fano welaruhu fug.

⁵Aben alem fanowon siyahon wenggel haruk elegman Allah indi oloken tom humon halog toho hik isaruk.

⁶Hik isarukmu o mek turuken helep tuwaliyen yuk turuk lit kinang muhultil laruk.

⁷Allahn mo lahik wam fug uruk halug lahik waharuk eleg. Suhal hutuk tuk fug ulug hiyag utuk halug hutuk atuk eleg.

⁸At amuwen pohol leho fibag. Ik haglabut watukon pali ke sobil laruk.

⁹Aren suhal tuwong men wap men lale feruk lit suhal ik ambut fil werehon enemu-enemu am nowen ulug nikema ilang enepfag.

¹⁰Aren alem suwon aben winahuk fug tehon anggolo turukmu niren ke roho turuk ulug ninindi nonghong uruk.

¹¹Allah an nolohotma pisan toho laruk halug anden yet haruk lahi fug.

¹²Aren ap elehap enepmin ulug turuk halug ap san At senebuk teg? Ap san nungge fahet ari hag toho turuk lahen ulug komo ruk teg?

¹³Allah undama ahe laharuk halug indi olok harukon imbik wamburuk eleg. Manu Rahab ibil atuk latfahonen oho At olohotman ininggareg apmayap taruk latfag.

¹⁴Anden At men suwahal imin pele halug nungge ane hiyag etle?

¹⁵An nubam alem wereg eleg angge famen At olohotman nele fag toho uk fug teg lahi. We hindi niyimin ulug At unggum nubam emberuk ahun fam heng tuk teg lahi.

¹⁶Anden nele urukmu Aren ele hebeloho elep halug oho anden ihiyon tem toho holehek pele fug.

¹⁷Ayub lilibug toho lin ukag ulug Allahn siyelu nubam monde fik waharuk lit saplangge nuwatukmen eneg wereg.

¹⁸Aren nindi angginap naptuken sat pong-pong angge turuk lahi.

¹⁹Ap ekeyen sa ine wereg ulug wal helep halug Allah eneg palimu welalep. Ap ekeyen alem Allah ubam embemin pelep halug oho alem kong turuk ambeg wamag ulug ap san wol tuk teg lalep?

²⁰An nindimuwen alem nubam wereg eleg perukmen nambiliken siyag ane tirikik ele halug anden hare ane tuk fug anggeyen ele.

²¹We tem toho siyag ane turuk latikik fug. An noluk wereg ane nirimen fano war aruhuk peruk lahi.

²²Saplangge noluk welahireg anden fag toho uruk lahiyon tu: Allahn ap siyag ane turukonet siyag ane turuk elehonet ambi roho unusuruk.

²³Ap siyag ane turuk elehon enepeleg toho weregman alem angginon ekeyen unusuruken eneliplip toho weregma Allahn yet isaruk lit inda yag eneptuk.

²⁴Allahn kinang aru onolok inap ininggikmu emberuk lit alem haloho emberuk inap inil hupni feserisi. Alem ari Allahn tirisi fug halug ap san tirisi?

²⁵Ap uyug ilaluwe roho larukon men an war aruhukon folo-folo horog atukon men wirim teg eleg. Fano ane nubam atukon yet ha fug angge tolum-tolum eleg aruhuk.

²⁶Kou ik ahum pali ke laruk angge folo-folo laruk lit longgo uruk hag toho an oho longgo uhuk. Suwe kuren pisanggo watmin ulug hug wambik waharuk hag toho an lagmag war aruhuk.

²⁷An nindi anggin toho welahi ane napeleg atukmu norohole seleg atmisi ulug nahiyeg harukmen

²⁸nin hebeloho ouk nubam atmisi ulug nakolen homhombuk naptuk. Allahn an fahet siyag ane tirisi ahun wereg perukon an noluk.

²⁹Aren alem nubam lombohap naptukmen anden nungge fahet At ubam nele urukmen warukmen eneg sat haruk lahi?

³⁰An nahap musan fam ho ruruk lit ninggik ik elerukmu umatle halug oho

³¹Allahn an lisoho sabelepma pilap naplepma nasum wan teg lahiyonen an fahet amben siyag ulug hog toho wambelep.

³²An ap kinangmon welahi hag toho Ar oho welalep halug anden fag toho nele hiyag etle. At men alem kong turuk ambeg lele.

³³At men an men honggolegma alem haloho emberuk ahun eke wereg eleg. Nunubabut hal nenebukag ulug nit pirenet ambiyeg apma lul ahun wereg eleg.

³⁴Allahn sabiyap alem fam nuwatukon umbusukag. An nakolap naptuk ane eleg amag.

³⁵Anden Allah olohotma nakol eleg toho nele ele angge famen nakolen fag toho uk fug teg lahi,” ibag.