Read Angguruk Yali MAZMUR 10 Bible Online

MAZMUR 10 - Angguruk Yali bible

MAZMUR 10

¹NINIKNI Allah, nit asengseng toho weregma nungge fahet yatma hiraho lit welahen?

²Hat Allah hele holtuk elehonen ininggali eleg toho ap inine elehon mug eneptug larukmu enekolen larukmen sapna elma luhur atuk.

³Ap arimanowen enebuwap fahet enewelwel tubat taruk lit Hat NINIKNI Allah habug uruk.

⁴Onorohole leko enele hemet toho uruk lit, ”Allahn alem nunubam embemisi fug. At wereg eleg,” uruk.

⁵Mun ane man ane tul perukon fano teko laruk. Allah alem kong turuk ahun ino poholma yitmi-yatma wereg peruk lit Haren komo eneptuk ane holtuk eleg. It men seli roho wereg inap arimano lukuram fam pet eneptuk.

⁶It inindimuwen peruk lit, ”Alem siyahon misig oho nit nunubam atuk elehen ninindi yuk tuk fug angge weregman eneg welamuhuk,” peruk.

⁷Enembiliken lukuram sipuk til enele si il ap pet enebil laruk. Enembilikanggenen ap siyahap enebil eneg laruk.

⁸O pumbuk horogman ap inine elehon senebul ulug kahal enesug lit alem unubam elegman hirako unusuruk.

⁹Olomene farema hirag atuk hag toho mapmumu wereg lit ap inilaheg toho werehon sap eneplug sum fam hol kete roho sen eneptuk.

¹⁰Sen eneplug unuwal halog heheg unusurukmu kinang ke waroho lin-lan uruk.

¹¹Ari turuk lit ap arimano inindimuwen, ”Niren turuk laheyon Allahn yet isamin fug ulug orohole saloho wereg lit fobik oho yet nisahu fug angge re niren siyag ane eneg turuk lamuhuk,” peruk.

¹²NIKNI Allah, in atmihinteg hinggik ineyonen unusimihin! Ap inilaheg toho werehon fahet hapeleg am fug!

¹³Nungge fahet Allah ele holtuk eleg inap inindimuwen, ”Allahn alem nunubam embemisi fug,” ulug Hat habug uruk?

¹⁴Ari turukmu Haren yet isaruk lahen. Ap asengseng toho wereg lit inindi anggin haruk ane alpal isaruk lahen fug. Hat hinggik ineyonen eneg windat enebuk teg lahen. Ap inine elehon men malik suwarehon menen Allahn eneg let nenepmisi ulug Hat halukema waharuk.

¹⁵Onolok ane turuk inap ininggik fala ribisin! Hat hele holuk fug angge siyag ane turukon mondabi eleg amag ulug alem angginon unubam imbin!

¹⁶NINIKNI Allah, Hat eneg suwon wereg lit kinang aru ki regman eneg mondabi welaruhun angge famen ap o pumbuk kema-kema werehon Hat hele holtuk elehon arimano Hat hangginang famen eleg amuhup.

¹⁷Ap inine elehonen Hat hubam heng haptukon hol haruk lit inindi inineyap eneptuk lahen.

¹⁸Ap inilaheg toho werehon men malik suwarehon men ili og eneptuk lahenma ap kinangmon misihen oho ap winon enekolap enebuhu fug.