Read Angguruk Yali MAZMUR 102 Bible Online

MAZMUR 102 - Angguruk Yali bible

MAZMUR 102

¹Ap eke ilaheg toho wereg lit ine elehen indi anggin toho wenggel haruk ane NINIKNI Allah ubam hiyag utukon tu:

²NIKNI Allah, anden Hat hubam sembahyang uruk lahiyon hol niyimin! Let nabik ma ulug heng haptuk lahiyon holeg lamin!

³An asengseng toho wereg sambil horohole hirag ta fug! Anden nele hi roho hubam uruk sul hol niyalug hebeloho hele hiyag nuruhun.

⁴An nuwag indoken narukmu inahan turuk hag toho naptukmu hubu folo-folo teng uruk hag toho welahi.

⁵Hoholangge halo uruk hag toho an nindi ine eleg atisimu nasuburu naruk ane napeleg atisi.

⁶Nindi angginen ngesekum turukmen eneg an nuwag eleg atisimu nunu eneg tamuk tegma welahi.

⁷Suwe kohoni leimu werehon hag atikik. Siyo-mayo o pumbuk halog toho lin isaruk ambeg ei wiroho wereg hag toho welahi.

⁸An nindi angginen nohuk fug teg lahi. Suwe kuwilon embeselug larukmu amu wereg lit unggama heriyehon hag toho welahi.

⁹Likiya famen tulug ap an men seli roho werehonen an inda yako ninggaliyap naptukmen eneg hup atuk. Iren ap eke huluwap tul peruk halug an nunuk uruk lit, ”Hun ari wereg hag toho har oho welaruhun,’ ulug huluwap turuk.

¹⁰Hat hundaman ahe laharukmu an nubahet holok haruk lit sen naptikinteg hik niyarikinmu an likiya hupmu uba yatuk lit nil ahaluwe ik men mangno roho naruk lahi. Suburu ubalma ul eneg naruk lit welahi.

¹²Mo ubuk urukmu ap enehuhe yat atikim folo-folo o hik atuk hag toho an oho we tot welaruhukmu hik nubam aruhu. We tem toho hoholangge halo urukon hag toho welahi.

¹³NIKNI Allah, Hat lehoma heriyegman eneg mondabi welaruhun. Niren endebuhukonen endebuhubon arimanowen oho Hat hunuk uruk lamuhup.

¹⁴Hat in aruhunteg o Sion fahet nindiyen ulug let turuk laruhun. Haren o Sion hebeloho hindi reg laruhun li horog atisi.

¹⁵O pumbuk Sion ari ap seliyonen pin halog toho kuruk lit helep lilibug toho lin isaruson eneg wereg angge famen nit Hat hamingmingangge welaheyonen helep arimano oho ninindi reg lahe.

¹⁶Ap o pumbuk enele wal-wal werehonen Hat NINIKNI Allah hunuk fahet enekol toho welamuhupmu onowesi suwon it fet enesuhon arimanowen Hat hebe umbagpag turuk lahenon holohotman ininggareg apmayap taruk lamuhup.

¹⁷NINIKNI Allah ebe umbagpag til inam arik waruhureg o pumbuk Sion hebeloho wiri fuhu.

¹⁸Inibamen yanggal eneptuson arimano Allahn hebeloho aluke yig isaruk lit iren At ubam sembahyang urukon nirim puk fug angge holtuk laruhu.

¹⁹Allahn ari roho turuk laruhuwon fahet it fobik indag atuk lamuhubon onoluk amuhuben suwesingga fam haharoho umbuhupmu ap o pumbuk Allahn fobik wal enebuhuwon arimanowen NINIKNI Allah wel turuk lamuhup.

²⁰NINIKNI Allah poholma wereg lit ibam fanoman kinang pilap haruk.

²¹Ap hele wat eneptusonen ngesekum turukon hol isaruk laruhu. War amag ulug kong toho emberuson onoluk welamuhup ulug wilip eneptuk laruhu.

²²Ari roho tuhumu ap o pumbuk enele wal-wal urukon onowesi suwon menen NINIKNI Allah wel turuk lamuhuk ulug palu arik wamuhupteg tom Sion famen NINIKNI Allah unuk palimuwap turuk lit o Yerusalemen At fog turuk lamuhup.

²⁴An kabini reg lit nine roho turuk latikikon Allahn hondo naptuk lit sabalon unubabut hag nubaharisi.

²⁵Anden nele uruk lit, ”NIKNI Allah, an nebe kabini angge war aruhuk tohon fet nasug laruhun. Niren endebuhukonen endebuhubon eleg amuhup angge famen Hat mondabi weregman eneg welaruhun.

²⁶Haren wal tilmu kinang ahongge yaho finareg hinggiken pohol laltik inag.

²⁷Haren wal tinag angge arimano obog toho siyag aruhu angge famen Hat eneg mondabi welaruhun. Pohol ha kinang ha sum miningon kiririp til laruk hag toho eleg aruhu. Aben sum miningon hog toho hik isalug sum keron wan taruk hag toho Haren oho mun angge man angge mining atukon embeserukmu wo uruk angge famen

²⁸Hat eneg nin am fug angge mondabi welaruhun.

²⁹Hat mondabi weregma nit Hat hamingminganggeyen nunumalikisi indag taruk lamuhukon arimano inindi yuwag toho welamuhup. Iren endebuhubon oho Haren wanggi waroho fet enesug laruhunmu fano welamuhup,” irikik.