Read Angguruk Yali MAZMUR 103 Bible Online

MAZMUR 103 - Angguruk Yali bible

MAZMUR 103

¹Dauren sini milaltuk lit yunggultuk latfahon tu: NINIKNI Allah an nindiyen wel turuk laruhuk. At unuk fanowon nebe abir anggeyen fog turuk laruhuk.

²NINIKNI Allahn fano ane nubam turuk latisiyon ino napeleg am fug angge an nindiyen wel turuk laruhuk.

³Siyag ane turuk lahiyon Aren elehap turuk. Ouk anggolo nubam atukmu Aren hihit naptuk.

⁴Mondabi war alema sal naplep angge famen Aren nolukap naptukmu welahi. Aren indi nasug lit naliliyangge lahap naptuk.

⁵An noluk weregma fanowon eneg og nutuk. An nine keron og nutukmu suwe tunguni ine roho laruk hag toho ap kabiniyonen tuk teg ane turuk lahi.

⁶Aben apmayap eneptukon Aren inibil atuk lit unggum unubam werehon hale feruk.

⁷NINIKNI Allahn undaman pibag ane Musa fam fag toho hiyag itfag. Israel inap iniline alem ekeyon-ekeyon ine roho turuk latfag.

⁸ NINIKNI Allahn inilaheg peruk lit fanowap neneptuk. Indimu folo-folo olok am fug angge indi anggolo nisaruk lit wereg.

⁹Hundig-hundig olok ane wenggeltuk laruhu fug. Ahummu het-pet teg lit eneg welaruhu fug.

¹⁰Niren siyag ane turukon fahet nunuselep angge famen nunumbaharuk. Niren tuk fug ane turukon fahet ayeg wat neneptuk eleg.

¹¹Pohol kinang men wirim tuk fug teg hag toho At ele holtuk inap indi enesug ane oho mondabi humon wereg.

¹²Mo yali filen lahik watug yatma larukmen ubuk uruk hag toho niren siyag ane turukon Allahn yatma hik isaruk.

¹³Ikniyen umalikisi indi enesug hag toho NINIKNI Allah ubahet enekol toho wereg inap indi enesug.

¹⁴Nit kinang fam lal eneptik iyag ulug At oluk teg lit kinang alinlan hag toho welaheyon nisaruk.

¹⁵Nit ap kinangmon hoholangge hag toho welahe. Nenebe e owil tehon hag toho welahe.

¹⁶Homhomo fu harukmu loloho wamburuk. Loloho wambuhureg longgo uhumu aben hahup fug.

¹⁷NINIKNI Allah fahet enekol toho wereg inap mondabi indi anggolo isaruk laruhu. Unumbusagsi unubam oho fano ane turuk laruhu.

¹⁸An numalikisi welamuhup ulug hiyag isibagma tem toho peruk inap Aren let eneptuk laruhu. Ari roho turuk lamuhup ulug komo enepfagma fano holtuk inap Aren fet enesug laruhu.

¹⁹NINIKNI Allah poholma heriyeg lit weregma kinangmon poholmon obog toho At apma wereg.

²⁰Allah otsi poholmon suwon hinineyon Aren ele hiyag hisarikim holtuk lahep. Aren urukon hikit toho turuk lahebonen NINIKNI Allah wel turuk lamuhup.

²¹Allah umalikisi poholmon obog toho At amingmingangge wereg lit Aren perukon hikit toho turuk lahebonen NINIKNI Allah fog turuk lamuhup.

²²Mun angge man angge Allahn wal tibahon o kema-kema At apma werehon obog tohowen At wel turuk lamuhup. An nindiyen NINIKNI Allah wel turuk laruhuk.