Read Angguruk Yali MAZMUR 104 Bible Online

MAZMUR 104 - Angguruk Yali bible

MAZMUR 104

¹An nindiyen NINIKNI Allah wel turuk lahi. NIKNI, Hat eneg suwon welahen. Hat mondabi palimu welahenon umbagpag fanowonen hililip hasug. Haren pohol o ungga hag toho sale feruk lit

³ik pohol palimu werehon emberimu hibam wiri fat taruk lahen. Hat hina fene larukmu homhomowen og haptug laruk.

⁴Homhomo ino hamingmingangge roho werehen Haren monde feruk lahen. Lebeglu inowen oho Hat let haptuk.

⁵Kinang ine roho welamag ulug helep tuwaliyen fam imbinagma yuk tuk fug angge eneg welaruhu.

⁶Kinang obog toho ik sene fam hondo ribinagma tom yaron oho iken yuhatuk latfag.

⁷Hat hele ululu sup turuk hag toho ine roho urukmu ik ino linggik-longgo ibag.

⁸Ik ino tom famen Haren lamisi pinag ane hikit toho tonggo ke laruk.

⁹Ik inowen nin hebeloho kinang obog toho hondo ruhu rohon ulug hili imbinag ambeg pisan isa fug angge laruk.

¹⁰Ik eleruk tonggo ke wili feruk lahenma punu honggoleg ke laruk.

¹¹Suwe pak farema werehonen ik ino narukmu wam eliyen oho ik obok atuk halug naruk.

¹²E ik ayegma werehon inggik fene suweyen ei wituk lit enele uruk.

¹³Poholman osit tom fene pilabik waharuk lahen. Hinggiken turuk lahenon famen mun angge man angge kinangma wereg atuk lit keleg uruk.

¹⁴Haren wamen naruk angge hoholangge wiliptuk lahen. Aben narukon fahet eiyangge yag tawag ulug emberuk lahen.

¹⁵Ik anggur ahaluwe ap inindi enehiyehap eneptukon men e zaitun ahaluwe orohole ke lahaptukon men naruk angge inine atukon men Haren og isaruk lahen.

¹⁶Tom Libanon fam NINIKNI Allahn e wali yatisiyon arimano inggarehen tohon werehen osit anggolo unubam pilabik waharuk.

¹⁷E arimano ondomi ke suwe winon men pibalu menen ei wituk.[16]

¹⁸Tom yaron arimano fene wam kambing hahon farema werehonen inibam wituk. Pak tabi hahon helep ele ke hiraho lit wereg.

¹⁹Aben pikalem inam atukmu tu sambil welahe peruk lamag ulug imbinag. Mo ubuk uruk li inggareg oluk toho welamag ulug imbinag.

²⁰Haren o hik amag peruk lahenma hup atukmu suwe pak farema werehon wilip atuk.

²¹Olomene kabiniyonen pak yami ruruk lit enele ya nga uruk. It arimanowen naruk angge og nisimin ulug Hat Allah hubam heng haptuk.

²²Mo lahik waharukmu nohoruk ambeg hirahoma lalug yinggig lit wereg.

²³Ari turukmu ap yabuk wibul ulug wilip atug yabuk witukmen eneg o hupmu atuk.

²⁴NIKNI Allah, Hat hindi anggat teg lit mun ane man ane teberuk lahen. Haren wal tinag angge arimanowen kinangma keleg uruk.

²⁵Ik saho ahik humon Haren wal tinag. Ik ahummu wereg angge suwon toron winag isa fug toho wereg.

²⁶Ik ahum pali ke ap kou fam laruk. Haren nindi nahiyehap naptuk laruhuwon ulug pisanggo humon wal tinahon unuk Lewiatan ino ik ahummu wereg.

²⁷It obog toho arimanowen suburu narukon horog teg li Haren og nisamisi ulug yet hasug lit wereg.

²⁸Haren naruk angge og isarukmu iren andog toho hilalug naruk. Haren hinggik fisalak teberuk lahenma it arimano suburu enehum toho naruk.

²⁹Haren hambol yig isaruk lahenma it arimano enekol toho wereg. Haren sat lisoho waruk lahenma war atlug hebeloho kinang alinlan atuk.

³⁰Haren sat og isaruk lahenma it wereg atuk. Haren kinang keronap turuk lahen.

³¹NIKNI Allah umbagpag turukon ino mondabi welaruhu! Inggarehen wal tibag angge arimano fahet ahiyeg toho welamag!

³²Aren kinang pilap harukmu kinang akolen yuk turuk. Aren tom sen harukmu indok hubu wilip atuk.

³³An noluk wereg li NIKNI Allah fahet sini yunggultuk laruhuk. An wereg lit nahiyeg toho Allah fahet tei uruk laruhuk.

³⁴Aren nindi nahiyehap naptukmu sini yunggultuk lahiyon fahet ahiyeg haruk laruhu.

³⁵Ap siyag ane turukon kinangman eleg atuk lamuhup. Onolok ane turuk inap mondabi longgo uruk lamag ulug sembahyang uruk lahi. An nindiyen NIKNI Allah wel turuk lahi. Hiren oho NIKNI Allah wel turuk lamek!