Read Angguruk Yali MAZMUR 105 Bible Online

MAZMUR 105 - Angguruk Yali bible

MAZMUR 105

¹ NINIKNI Allahn let neneptisi ulug wel turuk lit At unuk suwap turuk lamek! Aren turuk ane fahet ap o pumbuk obog toho hiyag isaruk lamuhup.

²Aren su ane turuk latisiyon fahet Allah asini yunggultuk lamuhup.

³At ebe mondabi fanowon ino anggengge nit welahe ulug henehiyeg toho welamuhup. At alukema welahebon arimano obog tohowen henehiyeg haruk lamuhup.

⁴Ine At famen heng turuk lamuhup. Likiya hupmu At orohole yami ruruk lamuhup.

⁵Allah amingmingangge Abraham umalikisi welahebon, Yakub umalikisi Allahn mumal heneptisiyon welahebon, Allahn fano ane turuk latisiyon wenggel haruk lit Aren anggin ane ap fam emberuk latisiyon oho honoluk toho welamuhup.

⁷Allah nit NINIKNI wereg. Aren alem kong toho emberuk ane ap kinang atogman atogma werehon unubam emberuk.

⁸Aren umalikisi fam An Hinikni aruhuk ulug sali imbibahon fahet likiya hupmu wenggel haruk lit numalikisiyen endebuhubonen endebuhubon welamuhup li oho apeleg aruhu fug.

⁹Sali ino atam Abraham fam imbibareg fobik Ishak fam oho imbibag.

¹⁰Nin Yakub fam emberuk lit Israel inaben seneg lamuhup ulug mondabiyap tibag.

¹¹Hiyag isaruk lit, ”Kanaan kinang aru hit mondabi ngi amuhuben og hisahuk,” ulug hiyag isibag.

¹²Indam enebe tor angge wereg lit ap pohon hag toho Kanaan kinangma welatfag.

¹³It arimano ap winon inibam o pumbuk eke la eke wam turuk latfag.

¹⁴Ari roho turukmu NINIKNI Allahn let eneptuken ap misihen oho it enele ying eneptuk latfag fug. It fahet Aren ap suwon komo eneptuk lit,

¹⁵”Anden mumal eneptikikon aruma eneleyap enebuhup fug. An namingmingangge nabi aruma honolok ane unubam turuk lamuhup fug,” ulug komo eneptuk latfag.

¹⁶ NINIKNI Allahn Kanaan kinang fam suburu obok monde fibagma naruk angge mondabi eleg atfag.

¹⁷Suburu obok uwanma Allahn Yusuf ino o Mesir monde fibagma owesi enelukema tam libag. Ap ekeyen ayeg waroho hilibagma amingmingangge atfag.

¹⁸Yusuf uyug hele fam pug tibareg anggolopma kumbi ineyon fam ililfag.

¹⁹Yusuf inowen fobik teko laruk ane fahet hiyag isibahon hikir atfag. NINIKNI Allahn ibag ane hikit toho at ubabut fanowon inam atfag.

²⁰Mesir inap onowe o pumbuk anggolo sen enesuhon inowen at inggik hele loloho wili feselihip ulug hiyag isibag.

²¹Mesir kinang aru seneg laruhun ulug hiyag itfareg nanggengge obog toho foroho laruhun ulug og itfag.

²²Haren an namingmingangge milal eneptuk lit numalikisi Mesir inap onowesi inindi anggarap eneptuk laruhun ulug hiyag itfag.

²³Ari tibagma Yakub o Mesir libareg ap pohon hag toho welatfag.

²⁴ NINIKNI Allahn umalikisi anggolowap enepfagma inine anggolo atuk lit Mesir inap it apmayap eneptuk latfahon arimano it men wirim teg latfag fug.

²⁵Allahn Mesir inap inindi hareyap eneptukmu iren At amingmingangge fahet inirim peruk lit enele ying eneptuk latfag.

²⁶Ari turuken Allahn amingmingangge Musa men Harun Aren mumal tibahon ino men it enembeg mon enepfag.

²⁷Mon enepfagma libareg iren NINIKNI Allahn hiyag isibag ane hikit toho o Mesir kinang fam alem eke hag eke hag aben tuk fug tehon it enesehelimuwen turuk latfag.

²⁸Allahn o hik monde fibagma Mesir kinang obog toho hik atfag angge famen Mesir inaben Allah ele apmayap turuk latfag.

²⁹It inahik obog toho Allahn il mebap tibagma ikan obog toho war atfag.

³⁰It enengginang yahiyehen keleg ibareg ap suwon ibam oho kuruk latfag.

³¹Allahn hombum men elemiyaha men monde fibagma it inibam obog toho hililip teg latfag.

³²Osit pilabik walep angge famen osit soho anggen hahon pilabik waharuk lit lebeglu oho monde fibag.

³³Allahn hele anggur men e ara men sanog toho hik isaruk lit e winon oho tukum toho ilkal isaruk latfag.

³⁴Aren herenangge monde fibagma watfareg anggolo keleg tehen winag isa fug teg latfag.

³⁵Herenangge arimanowen aben yatuk angge obog toho narukmu enenggengge yabukmu werehon obog toho eleg atfag.

³⁶Mesir inap unumalikisi wandabon inindi anggen tohon arimano obog toho unusibag.

³⁷Ari tibareg Allahn umalikisi Israel inap hondog eneplug wilip atukmu it enebe fano wereg lit fano-fano angge emas men perak men hilalug laruk latfag.

³⁸Mesir inaben Israel inap fahet enekol toho wereg lit it wilip atukmu yet isibareg fano lawag peruk latfag.

³⁹It larukmu Allahn hina fam wanggi wat eneptuk lit hubanggo seleg teg lamag ulug indok ambulpul monde feruk latfag.

⁴⁰Iren suburu oboken heng turukmu Allahn suwe yalma hahon monde feruk lit suburu roti poholman pilap isarukmu enehum toho naruk latfag.

⁴¹Aren helep pul ke pilang tibagma ik wilip atfareg ik suwon hag toho lekma laruk latfag.

⁴²NINIKNI Allahn amingmingangge Abraham fam sali imbibahon ino wenggel haruk lit ari obog toho tibibag.

⁴³Allahn umalikisi mumal enepfahon arimano hondog eneplug wilip atukmu enehiyeg toho sini yunggultil laruk latfag.

⁴⁴Ap o pumbuk winon enengginang Allahn umalikisi og isarukmu yabukmu sat toho yatuk latfag angge arimano iren ngi atuk latfag.

⁴⁵An numalikisiyen nele holtuk lit hit hunubabut ari roho welamuhup ulug komo eneptik iyahon hikit toho turuk lamuhup ulug wenggel hibareg kinang ino hiyag isibag. NINIKNI Allah wel turuk lamuhuk!