Read Angguruk Yali MAZMUR 106 Bible Online

MAZMUR 106 - Angguruk Yali bible

MAZMUR 106

¹ NINIKNI Allah wel turuk lamek! Allah fano ulug At fog tiyek! Aren umalikisi indi enesugmen eneg welaruhu.

²Ap san NINIKNI Allahn ine roho turuk latisi ane obog toho oluk teg lit hiyag isaruk lam teg? Mun ane man ane Allahn turukon fahet enepelehen ap misihen oho At ubabut wirim toho wel tuk fug teg.

³Allahn tu men ari men turuk lamuhup ulug kong toho imbibahon seneg lit likiya hupmu fano ane eneg turuk inap arimano enehiyeg toho welamuhup.

⁴NIKNI Allah, Haren humalikisi hebeloho hindi enesug laruhun hag toho an oho hindi nasug laruhun! Humalikisi windat enebuhun sambil an oho windat nabuhun!

⁵Hat humalikisi Haren mumal tarikinon fano welamuhup ane anden yet isaruk lit it men ambiyeg nenehiyeg haruk lamuhuken an let nabuhun. Let nabuhunmu andet humalikisiyet mangno roho Allah anggengge welahe ulug nenewelwel taruk lamuhuk.

⁶Nunumbasiyen siyag ane turuk latfag hag toho niren oho Haren nirim peruk lahenon turuk lit Hat hindi siyahap haptukuk.

⁷Nunumbasi o Mesir kinang fam weregma Allahn it iniline alem suwon aben tuk fug tehon eke hag eke hag turuk latfag angge famen nungge fahet turuk latisi ulug fuki roho wenggel haruk latfag fug. Allahn anggoloenam nindiyen ulug let eneptuk latfag angge famen iren enepeleg atfag. Enepeleg atfagma ik Longgop ayegma libareg wereg lit At mondabi palimuwon ele ying turuk latfag angge famen

⁸An nunuk siyag aruhu rohon ulug At inggik ineyon inamap turuk lit windat eneptuk latfag.

⁹Windat enepmin ulug ik Longgop pet turukmu itano ik ino pul ke minggir atfagma Allahn umalikisi kinang lilog atfag keyen hondog eneplug fuma fil nindig atfag.

¹⁰Ari roho turuk lit Allahn nunumbasi arimano ap seliyon it fahet ninirim peruk latfahon ininggikmuwen taluk eneptuk latfag angge famen

¹¹ap seliyon arimano iken hondo eneptuk lit obog toho unusibagma misig oho oluk atfag fug.

¹²Ari roho turukmu nunumbasiyen yet isibareg Allahn tem toho sali irisiyon hikit toho tehek ulug wenggel hibareg At sini fam wel turuk latfag angge famen

¹³we tot welatfareg Allahn turuk latfahon fahet enepeleg atfag. Enepeleg atfagma Allah undaman perisi ane hikit toho let neneptuk laruhu ulug nangno ruk fug angge welatfag.

¹⁴Ari roho wereg lit lekma libareg wam oboken ulug enele anggolo uruk lit Allah wal haruk latfag.

¹⁵At wal hul ulug Allah fam heng turukmu suburu og isaruk latfag angge famen nin tot welatfareg ouk alem angginon unubam monde fik watfagma inine mondabi eleg atfag.

¹⁶Tot welatfareg nunumbasi o sabo wiroho wereg lit Musa men NINIKNI Allah amingmingangge Harun men fahet inindi siyag atfag.

¹⁷Siyag atfagma kinang kuroho ele a ribibareg hun Datan pil isaruk lit Abiram ori men oho hondo enepfag.

¹⁸Hondo enepfagma indok ulog-alog haruk lit ap onolokon it piren inibil atfahon arimano obog toho han wiyaloho war atfag.

¹⁹Tom Sinai alma wereg lit nit nunumbasiyen tu Allah hag toho wereg ulug emas umbagpag turukon fam wam sapi umalik hag angge witfareg enelenggen fam hur atuk lit ininggiken lalfag angge ino fam sembahyang uruk latfag.

²⁰Sembahyang uruk lit Inikni Allah ebe umbagpag turukon ino ubalma wam sapi hoholangge narukon hahon wel turuk latfag.

²¹Allah o Mesir kinangman alem suwon eke hag eke hag turuk lit windat enepfag ahun ino enepeleg atfag.

²²O Mesir hun Ham angginang ino famen aben tuk fug teg ane Allahn turuk latfahon men ik Longgop famen ap enekolap eneptuk lit turuk latfahon men fahet iren wenggel haruk latfag fug.

²³Wenggel haruk latfag fugmu Allahn siyahap enepmin pibag ane hikit toho unuselep angge famen Allahn mumal tibahon Musa inowen ili og enepmin ulug Allah honggoleg nunumbasi honggoleg pulmu in arik libagma Allahn olok haruk lit unusimin pibag ane imbisibag.

²⁴Welatfagma nunumbasiyen Allahn kinang fanoma og hisahuk ulug sali imbibahon fahet ele si ane irisi ulug wenggel haruk lit kinang ino ninirimen nit ngi arik lahuk fug uruk latfag.

²⁵Olma wereg lit enele siyag toho uruk latfag. NINIKNI Allah ele holuk fug angge weregma

²⁶Allahn lekma tuman unusimin ulug inggik leho lit hiren ondohowonen endebuhubon oho o pumbuk kema-kema hik-hak isahuk ulug sali imbibag.

²⁷

²⁸Sali imbibagma o Peor libareg wereg lit Moab inaben nunumba ulug wel turuk latfahon Baal ino iren oho wel turuk latfag. Wel turuk lit usasum warehon fahet emberuk latfag ambohom arimano iren oho naruk latfag.

²⁹Ari roho turuk latfag ane ariyen Allah indi siyahap tibagma ouk alem suwon unubam atfag.

³⁰Ouk unubam atfagma Pinehas inowen alem unubam welatfahon haloho imbibag. Imbibagma ouk ino eleg atfag.

³¹Pinehas inowen tibag ane fahet Allahn fano pibag angge re it fobik indag atuk lamuhubonen oho at fahet wenggel harukmen eneg welamuhup.

³²Nunumbasi ik Meriba elerukmu wereg lit turuk latfag ane ariyen Allah indi olokap tibag. Olokap tibag ane fahet Musa indi inahan turukmu

³³undaman fuki roho wenggel ha fug anggeyen ele uruk lit alem ubamap taruk latfag.

³⁴Kanaan kinangma kibareg nunumbasiyen NINIKNI Allahn hiyag isibag ane sobir isalug Kanaan inap o pumbuk wal taneg welatfahon elehap enepfag fug.

³⁵Elehap enebuk fug angge it unumalikisi men Kanaan inap unumalikisi men og-og atuk lit enebe misig hag toho welatfag. Wereg lit Kanaan inaben turuk latfahon hikit toho iren oho turuk latfag.

³⁶Kanaan inaben tu Allah wereg ulug wel eneptuk angge arimano iren oho wel eneptuk lit yebangge yep taruk latfag.

³⁷Iren mungguwat fahet unumalikisi yuhon ap anggeyet hiyap anggeyet waroho hubu lahaptuk latfag.

³⁸Unumalikisi alem unubam elegman usangge Kanaan inaben tohon fahet unusuruk lit enemep hilili feruk latfag ane ariyen kinang siyahap turuk latfag.

³⁹Allah embeselug usasum ap winamonen tohon wel eneptuk lit yaying turuk latfag ane ariyen ininggareg siyahap taruk latfag.

⁴⁰Siyahap tarukmu yet isibareg NINIKNI Allahn nanggengge welamuhup ulug mumal tarikikon aruman me napeyap naptuk ulug umalikisi fahet undama inahan haruk latfag.

⁴¹Undama inahan haruk lit umalikisi ap o pumbuk winamon ininggikmu imbibagma it fahet ninirim peruk inap arimanowen sen enesug latfag.

⁴²It seliyonen enele ying eneptuk lit ininggik ineyonen apmayap eneptuk latfag.

⁴³Apmayap eneptukmu Allahn anggoloenam windat eneptuk latfag angge famen it inindimuwen Allah nenembol yig utuk lamul ulug wenggel harukmen eneg unubabut mondabi siyag atfag.

⁴⁴Siyag atfagma alem angginon eke hag eke hag unubam atuken enele ya nga urukmu Allahn hol isibareg yet isamin pibag.

⁴⁵Ari pibareg nininggik ahandip toho welamuhuk ulug sali unubam imbibahon fahet wenggel haruk lit indi anggolo isibareg it unubahet olok haruk latfag ane imbisibag.

⁴⁶Imbisibareg it ininggik hele waroho hondog eneplug o winama imbisik libag inap arimanowen inindi enesug lit lol enebukag ulug inindi kahal eneptuk latfag.

⁴⁷Allah NINIKNI, nit windat nenebik ma! Nit o kema-kema hik-hak nisarusa ambehen andog nenebik waruhun! Waruhunmu niren Hat hunuk fanowon palimuwap turuk lit nenehiyeg toho wel haptuk lamuhuk.

⁴⁸Israel ninap NINIKNI Allah ketiya famen tulug fobik oho mondabi wel turuk lamuhup. Israel inap obog tohowen, ”Amin! NINIKNI Allah wel turuk lahe,” uruk lamag.