Read Angguruk Yali MAZMUR 107 Bible Online

MAZMUR 107 - Angguruk Yali bible

MAZMUR 107

¹Ap seliyonen hunusurukmu hit asengseng toho weregma Allahn windat heneptisiyon arimanowen henele uruk lit, ”NINIKNI Allah ubabut fanowon inowen indi nenesug lit eneg werehen At wel turuk lamul,” uruk lamuhup!

³Yali fil, hubula fil, ik eleruk fil, ambut fil ap winon inibam pohon hag toho weregma Allahn palu heneptisireg og heneplug waharisi.

⁴Hit winon o pumbuk ap wereg ambeg larukon henepelehen lekma la wam turuk latikip.

⁵Hit suburu men ik men elehen fano amul fug peruk latikip.

⁶Asengseng toho wereg lit NINIKNI Allah fam henele uruk latikipmu Aren windat heneptuk latisi.

⁷Aren kalem pikiron o pumbuk ap wereg ambeg hondog heneplug larisi.

⁸NINIKNI Allah ap indi enesuhon inowen su ane eke hag eke hag hunubam turuk latisimu hiren At wel turuk lamuhup.

⁹Aren ap suburu men ik men obok toho werehon fano-fano angge og isarukmu enehum toho naruk.

¹⁰Hit winon hele ineyon fam hininggik pug toho o hik tegma heriyeg lit asengseng toho welatikip.

¹¹Hiren Allah henembol yig utuk lit At mondabi palimu werehon ele sobir isaruk latikip.

¹²Inindi lombuk ukag ulug Allahn alem angginon hunubam emberuken mako wambirikipmu ap misihen oho let henebuk fug teg latisi.

¹³Asengseng toho wereg lit NINIKNI Allah fam henele uruk latikipmu Aren windat heneptuk latisi.

¹⁴Aren hele ineyon fam hininggik pug teberuson arimano kong teberisireg o hik teg ambehen hondoko wilip heneptisi.

¹⁵NINIKNI Allah ap indi enesuhon inowen su ane eke hag eke hag hunubam turuk latisimu hiren At wel turuk lamuhup.

¹⁶Hele waroho kilap heneptusa ambeg sok latukon hembit wirikon sombo roho hik isarisireg sok e ineyon fam wirihon arimano halog toho ilkal isarisi.

¹⁷Hit winon hinindi sohu roho wereg lit siyag-siyag ane turuk latikibon ariyen hininggarehen siyahap taruk latikip.

¹⁸Suburu narukon fahet me henepeyen war am hag toho welatikip.

¹⁹Asengseng toho wereg lit NINIKNI Allah fam henele uruk latikipmu Aren windat heneptuk latisi.

²⁰Aren ele uruk lit hihir heneptuk latisi. War alep angge famen Aren honolukap heneptuk latisi.

²¹NINIKNI Allah ap indi enesuhon inowen su ane eke hag eke hag hunubam turuk latisimu hiren At wel turuk lamuhup.

²²NINIKNI Allahn let neneptisi ulug At fahet hubu lahaptuk lamuhup. Fano ane nunubam tirisi ulug henehiyeg toho sini yunggultuk lit ap hiyag isaruk lamuhup.

²³Hit winonen aben tohon ayeg waroho hilahuk ulug ik ahum pali ke kou fam laruk latikip.

²⁴Hit ik ahum pali ke laruk lit yet harukmu NINIKNI Allahn alem fanowon eke hag eke hag turukmu yet harikip.

²⁵Aren siyelu monde ferukmu ik haglabut humon watuk latisi.

²⁶Ik haglabut inowen kou arimano ha roho pohol fil lahalug hik toho embeserukmu wamburuk lit hit war amul ulug hinindi anggin toho welatikip.

²⁷Hit ik olokon nalug nenek turuken mulilik la mulilik wam turuk hag toho turuk lit hinindi anggat teg ane eleg latisi.

²⁸Asengseng toho wereg lit NINIKNI Allah fam henele uruk latikipmu Aren windat heneptuk latisi.

²⁹NINIKNI Allahn siyelu ino eleg amin ulug yuwahap tirisimu ik haglabut ino eleg atisi.

³⁰Siyelu ino eleg atukmu yet harikipteg henehiyeg harikipmu ik ilanma lul perikip ambeg hondoko hunumbahik larisi.

³¹NINIKNI Allah ap indi enesuhon inowen su ane eke hag eke hag hunubam turuk latisimu hiren At wel turuk lamuhup.

³²Allah umalikisi palu roho weregma NINIKNI Allah suwon ulug unuk palimuwap turuk lamuhup. Honowesi palu atuk ambehen oho At wel turuk lamuhup.

³³Ik suwon larukon Aren firihap turukmu lekma hag atisi. Ik wilip atuk ambeg oho kinang lilohap turuk latisi.

³⁴Aben siyag ane turuken enengginang sei reg ambeg selap turukmu yabuk wibuk fug teg latusa.

³⁵Lekma ik sene yenggele feruk lit kinang lilog teg ambeg ik wilibi feruk latisi.

³⁶Lekma kinang seiyap tirisi ambeg ap suburu obok toho werehon inibam wit tawag ulug hiyag isaruk latisi.

³⁷It arimanowen yabuk wiri felug hele anggur yag tarukon arimano anggen tahanoho anggolo umbat taruk latusa.

³⁸NINIKNI Allahn indi enesug lit ap anggolowap eneptuk latisi, enembohom oho anggolo og isaruk latisi.

³⁹Ari turuk latisi angge famen alem siyahon eke hag eke hag unubam atisimu enembol simbuk lin uruk lit enebe tor angge welatusa.

⁴⁰Allahn onowesi it fet enesuhon inindi apmayap tirisimu lekma kalem eleg ambeg la wam turuk latusa angge famen

⁴¹ap enenggengge elehen siyag toho weregma Allahn let eneptuk latisi. Wam domba luhaloho werehon hag toho unumalikisi anggolo atusa.

⁴²Ari turukmu Allah fahet inindi wenggel harukonen yet haruk lit enehiyeg toho wereg angge famen onolok ane turuk inap enele uk fug angge wereg.

⁴³Ap inindi anggat toho werehonen alem obog toho arimano fahet wenggel haruk lit NINIKNI Allahn we tem toho indi nisaruk lit wereg ulug fag toho uruk lamuhup.