Read Angguruk Yali MAZMUR 108 Bible Online

MAZMUR 108 - Angguruk Yali bible

MAZMUR 108

¹Dauren sini yunggultuk latfahon tu:

²Nikni Allah, an nindi yuwag toho wereg lit sini fam Hat wel haptuk latmin. An nindi in amag!

³Pinggong men puhuli men in amiyek! O sakan tukag ulug mo elel hamin.

⁴Ap o pumbuk kema-kema werehon onolohotman sini yunggultuk latmin. Ap obog tohowen holukag ulug anden Hat NIKNI wel hapmin.

⁵Haren ap hindi enesug lahen ane inowen kinang obog toho hondo reg lit poholma laharuk. Haren hinggik kobog isa fug angge ap let eneptuk lahen ane ari hina o kema-kema laruk hag toho kinang atogman atogma inam atuk.

⁶Nikni Allah, in atmihinteg pohol pali fil lahin! Hat hebe umbagpag turuk lahenonen kinang atogman atogma hondo reg latmihin.

⁷Anden Hat hubam nele uruk lahiyon hol niyamihinteg nit Hat hindi nenesug lahen ninap hinggik hineyonen windat nenebin!

⁸Allahn ibamen ele uruk lit, ”O Sikhem An numalikisi ngi amuhuben nahiyeg toho og isamin. O Sukot tonggo oho fibir isaminen wirim hamin.

⁹O Gilead kinang men Manasye kinang men An ngi reg lahi. Efraim kinang An nunggul asum hag toho wan teg lit Yehuda kinang ap suwonen wanggun senehon hag toho seneg lahi.

¹⁰Moab kinang An nebe ik umag taruk laruhuk ambeg aruhu. Edom kinang An ngi atmin ulug nuyug hililip angge hik timin. Filistin inap arimano An napma welamuhup ulug nahiyehen nele hi roho imin,” uruk.

¹¹O pumbuk suwon elehet walinggoho ohowon ino ilmig taminen ap san an hondog naplug lamisi? Edom kinang senerik laminen ap sa an nalukema lamisi?

¹²Nikni Allah, Haren nit hambol yig nisarikin angge re nit men ambiyeg tog elma lul fug ano?

¹³Ap seliyonen nit siyahap nenebul ulug turuken Haren let nenebik ma! Ap kinangmonen nit windat nenebuk fug teg.

¹⁴Allah nit men weregma mun ane man ane ninine roho turuk lamuhuk. At amuwen ap seliyon arimano uyuhen sobit-sabar isaruk laruhu.